Kpohọ eme nọ e riẹ eva

Kpohọ oria izoẹme

Ahwo Filipai 2:1-30

EWARE NỌ E RIẸ EVA

  • Omaurokpotọ Oleleikristi (1-4)

  • Omaurokpotọ Kristi gbe epanọ a rọ kpare iẹe kpehru (5-11)

  • Daoma thuẹhọ epanọ wha re ro wo esiwo (12-18)

    • Wha bi lo wọhọ ikpẹ (15)

  • O vi Timoti gbe Epafrodaitọs se inievo na (19-30)

2  Otẹrọnọ wha sae kẹ uduotahawọ jọ evaọ Kristi, kẹ omosasọ jọ fiki uyoyou, dhesẹ ọdawẹ kẹ ohwohwo, dhesẹ uvi uyoyou gbe ohrọ-oriọ,  wha ru re me wo oghọghọ ziezi ẹkwoma oghẹrẹ ovona nọ wha re roro, uyoyou nọ wha re wo kẹ ohwohwo, okugbe ọvo nọ wha rẹ jọ, je wo iroro evo.  Wha rehọ ẹwhọ hayo omorro ru oware ovo ho, rekọ avọ omaurokpotọ wha rri amọfa inọ a rro vi owhai,  wha gwọlọ ewoma obọrai ọvo ho, rekọ ewoma amọfa re.  Ẹsikpobi jọ wha wo oghẹrẹ iroro nana nọ Kristi Jesu o wo re na,  dede nọ ọ jọ wọhọ Ọghẹnẹ, o du roro epanọ o re ro mi ọkwa ha, koyehọ re ọ jọ ẹrẹrẹe kugbe Ọghẹnẹ.  Ijo, rekọ o siobọno eware kpobi, ọ tẹ rehọ oma ọrigbo o te zihe ruọ ohwo-akpọ.  Mae tubẹ rro na, nọ o zihe ruọ ohwo-akpọ no, ọ romakpotọ je yoẹme te epanọ o ro whu dede, ẹhẹ, uwhu evaọ ure-oja.*  Fiki onana, Ọghẹnẹ ọ tẹ kẹe ọkwa nọ o kpehru vi onọ ọ jọ vẹre jẹ kẹe odẹ nọ o rro vi odẹ ofa kpobi, 10  re ighilawọ kpobi i kigwẹ evaọ odẹ Jesu, ighilawọ enọ e rrọ obọ odhiwu gbe otọakpọ gbe obọ otọ ẹkpẹ na— 11  re ẹrọo kpobi ọ jẹ ta via nọ Jesu Kristi họ Olori, onọ o rẹ wha orro se Ọghẹnẹ Ọsẹ na. 12  Fikiere iyoyou mẹ, wọhọ epanọ wha be hai yoẹme ẹsikpobi na, orọnikọ nọ mẹ tẹ rrọ kugbe owhai ọvo ho rekọ maero oke nọ mẹ rrọ kugbe owhai hi na, wha hae daoma rehọ ozodhẹ gbe enuho thuẹhọ epanọ wha re ro wo esiwo. 13  Keme Ọghẹnẹ họ ọnọ ọ be kẹ owhai ẹgba nọ wha re ro ru eware nọ e rẹ were iẹe, ọ be kẹ owhai isiuru na gbe ogaga nọ wha re ro ru ere. 14  Wha hai ru eware kpobi ababọ eguago gbe avro-ọvro, 15  re wha sae kare afuẹwẹ jẹ kare abe, jẹ jọ emọ Ọghẹnẹ nọ e kare epe evaọ udevie oge omuomu nọ ọ vọ avọ uzioraha,* enọ wha be jọ udevie rai lo wọhọ ikpẹ evaọ akpọ na, 16  wha kru ẹme uzuazọ na gaga ziezi. Mẹ vẹ sae ruẹ oware nọ o rẹ lẹliẹ omẹ ghọghọ evaọ ẹdẹ Kristi nọ mẹ tẹ ruẹ nọ mẹ dhohrẹ kufiẹ hẹ hayo iruo mẹ e rrọ ivrẹvru hu. 17  Rekọ a tẹ maki bi ku omẹ wọhọ idhe udi fihọ ehru idheidhe gbe iruo odibọgba ọrẹri nọ ẹrọwọ rai ọ be wọ owhai ru, eva e be were omẹ, yọ me bi lele owhai kpobi ghọghọ. 18  Epọvo na re, jọ wha wereva je lele omẹ ghọghọ re. 19  Whaọ me bi rẹro nọ me ti vi Timoti ze kẹle na o tẹ ruọ Olori na Jesu, re me wo uduotahawọ nọ me te yo epanọ wha bi ru. 20  Keme me wo omọfa nọ o wo ọkpọ uruemu riẹ hẹ nọ ọ te rọ eva riẹ kpobi rẹrote eware nọ e rrọ ọdawẹ kẹ owhai. 21  Keme ahwo nọ a kiọkọ kpobi a be gwọlọ ewoma obọrai orọnikọ ọrọ Jesu Kristi hi. 22  Rekọ wha riẹ imuẹro nọ ọ kẹ kpahe omariẹ, inọ wọhọ ọmọ nọ ọ rrọ kugbe ọsẹ riẹ o lele omẹ ruẹ uye re usi uwoma na o nyaharo. 23  Fikiere, ọye họ ohwo nọ me bi rẹro nọ me ti vi ze nọ mẹ tẹ nwane riẹ oware nọ a ti ru omẹ no. 24  Evaọ uzẹme, me fievahọ Olori na inọ mẹ te nya bru owhai ze kẹle na re. 25  Rekọ evaọ enẹna me roro nọ u kiehọ re me vi Epafrodaitọs se owhai, oniọvo mẹ gbe ibe oruiruo mẹ, ọnọ ọ rrọ osoja Kristi re, ọ tẹ jẹ rrọ ọnyukọ rai nọ wha vi ze te rẹrote omẹ, 26  keme u bi si ei urru re ọ ruẹ owhai kpobi yọ ọ rrọ ọkora fikinọ wha yo inọ ọ jẹ mọ. 27  Ẹhẹ, ẹyao o kie rie nọ ọ tubẹ mọ kẹle uwhu dede; rekọ Ọghẹnẹ ọ re ohrọ riẹ, yọ orọnikọ ohrọ riẹ ọvo ho rekọ ohrọ mẹ re, re me gbe weri vi onọ mẹ rrọ na ha. 28  Fikiere me bi vi ei se owhai vẹrẹ vẹrẹ, re nọ wha tẹ ruẹ e riẹ, wha vẹ wariẹ wo oghọghọ, awaọruọ mẹ o ve je kpotọ re. 29  Fikiere wha rọ oghọghọ dede iei rehọ wọhọ epanọ wha be hai dede ilele Olori na rehọ na, wha hai rri inievo itieye na ghaghae, 30  keme o je ti whu no fiki iruo Kristi,* o fi uzuazọ riẹ họ ọza re o ru eware nọ wha hai ru rọ gbodibo kẹ omẹ.

Oruvẹ-Obotọ

Rri oria Otofa Eme.
Hayo “oge ọgẹgẹle.”
Hayo o sae jọ nọ, “iruo Olori na.”