Kpohọ eme nọ e riẹ eva

Kpohọ oria izoẹme

Taitọs 1:1-16

EWARE NỌ E RIẸ EVA

  • Uyere (1-4)

  • Ọ ta kẹ Taitọs nọ ọ rehọ ekpako mu evaọ Kriti (5-9)

  • Whọku enọ e be wọso (10-16)

1  Pọl ọrigbo Ọghẹnẹ gbe ukọ Jesu Kristi, ọnọ ẹrọwọ riẹ ọ rọwokugbe ẹrọwọ enọ Ọghẹnẹ ọ salọ gbe eriariẹ egbagba uzẹme na nọ e rọwokugbe omarọkẹ Ọghẹnẹ  yọ u no ẹruore uzuazọ ebẹdẹ bẹdẹ ze onọ Ọghẹnẹ nọ ọ rẹ sae ta ọrue he na ọ ya eyaa riẹ ugbanwẹdẹ;  rekọ nọ oke nọ o fihọ u te, o dhesẹ ẹme riẹ via ẹkwoma usi uwoma ota nọ a muhọ omẹ obọ na, wọhọ epaọ ujaje Osiwi mai, Ọghẹnẹ;  ro se Taitọs, uvi ọmọ ọnọ ma gbe wo ẹrọwọ ọvona: Jọ Ọghẹnẹ Ọsẹ na gbe Jesu Kristi Osiwi mai a dhesẹ uwowou ulogbo kẹ owhẹ jẹ kẹ owhẹ udhedhẹ.  Mẹ nyasiọ owhẹ ba Kriti re whọ kpọ eware nọ e thọ vi jẹ rehọ ekpako mu no ẹwho ruọ ẹwho, wọhọ epanọ mẹ ta kẹ owhẹ:  otẹrọnọ ọzae jọ ọ riẹ nọ ọ kare afuẹwẹ, nọ o wo aye ọvo, nọ emọ riẹ e rrọ ukoko na, yọ ahwo a be ta kpahe ae he inọ a bi yeri uzuazọ ofafariẹ hayo veghe uzou.  Keme orieyero Ọghẹnẹ, koyehọ ọsẹro, ọ rẹ kare afuẹwẹ, o re wo udu-ogaga ha, ọ rẹ kaki muofu hu, ọ rẹ jọ ọgba-udi hi, ọ rẹ jọ ohwo ozighi hi, o re theuvo erere nọ a rẹ rọ ewhariọ wo ho,  rekọ ọ rẹ jọ ọnọ o re dede erara rehọ, ọnọ o you ewoma, ọnọ o wo iroro egbagba,* ọnọ o kiẹrẹe, ọnọ o re ru ẹme riẹ gba, ọnọ o wo oma-onyẹ,  ọnọ ọ be nya lele ẹme uzẹme* na whawha evaọ onaa ewuhrẹ riẹ, re ọ sae rọ uwuhrẹ ogbagba* tuduhọ ahwo awọ jẹ whọku enọ e be ta ẹme wọso uwuhrẹ na. 10  Keme ahwo buobu a riẹ nọ e be wọso, nọ e be ta ugbẹta, gbe eviẹahwohọ, maero enọ i bi si ikẹ inọ ahwo a rẹ yawo. 11  O roja re a ruru unu rai, keme ezae nana a be raha ẹrọwọ iviuwou soso ẹkwoma eware nọ i fo ho nọ a bi wuhrẹ fiki erere nọ a rẹ rọ ewhariọ wo. 12  Omọvo rai jọ, ọruẹaro obọrai, ọ ta nọ: “Ọrue ọvo ahwo Kriti a rẹ ta, erao ijihẹ a rrọ, egba-ore nọ i re ru iruo ho.” 13  Ẹme nana uzẹme. Fiki onana, hae whọku ae gaga re a sae jọ gaga evaọ ẹrọwọ na, 14  a gbẹ gaviezọ kẹ iku-esia ahwo Ju hu gbe ijaje ezae nọ e nya siọ uzẹme na ba. 15  Eware kpobi e rrọ fuafo kẹ ahwo nọ a rrọ fuafo; rekọ rọkẹ ahwo nọ a rrọ gbegbe jẹ kare ẹrọwọ, oware ovo o fo ho, keme iroro rai gbe obruoziẹ-iroro rai i gbeku no. 16  A rẹ jọ ẹgbede ta nọ a riẹ Ọghẹnẹ, rekọ a be rọ iruo rai rọ se iẹe, keme a rrọ tọtọtọ jẹ be ghẹmeeyo, yọ a te kẹ oghẹrẹ iruo iwoma ọvo ho.

Oruvẹ-Obotọ

Hayo “areghẹ.”
Hayo “ovuẹ nọ a re fievahọ.”
Hayo “uwuhrẹ omokpokpọ; uwuhrẹ nọ o rẹ kẹ erere.”