Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Jọn 8:12-59

EWARE NỌ E RIẸ EVA

  • Jesu evaọ Ehaa Iwou-Udhu (1-13)

  • Jesu o wuhrẹ evaọ ehaa na (14-24)

  • Eriwo sa-sa kpahe Kristi na (25-52)

  • Ọsẹ na o se isẹri kpahe Jesu (12-30)

    • Jesu họ “elo akpọ na” (12)

  • Emọ Abraham (31-41)

    • ‘Uzẹme na u ti si owhai no igbo’ (32)

  • Emọ Ẹdhọ (42-47)

  • Jesu avọ Abraham (48-59)

8  12  Kẹsena Jesu ọ tẹ wariẹ ta kẹ ae nọ: “Mẹ họ elo akpọ na. Ohwo kpobi nọ o bi lele omẹ ọ te nya evaọ ebi vievie he, rekọ o ti wo elo uzuazọ.” 13  Fikiere otu Farisi na a tẹ ta kẹe nọ: “Who bi se isẹri kpahe omobọ ra; isẹri ra yọ uzẹme he.” 14  Jesu ọ tẹ kpahe kẹ ae nọ: “O tẹ make rrọ nọ me bi se isẹri kpahe omobọ mẹ, isẹri mẹ uzẹme, keme mẹ riẹ obonọ me no ze gbe obonọ mẹ be nya. Rekọ wha riẹ obonọ me no ze gbe obonọ mẹ be nya ha. 15  Okafe* wha re rri ro bruoziẹ kpe ohwo; me re brukpe ohwo ọvo vievie he. 16  Rekọ me te brukpe ohwo jọ dede, oziẹ mẹ o rẹ jọ uzẹme, keme mẹ ọvo ọ rrọ họ rekọ Ọsẹ na ọnọ o vi omẹ ze ọ rrọ kugbe omẹ. 17  Ofariẹ, a jọ Uzi obọrai kere nọ: ‘Isẹri imava yọ uzẹme.’ 18  Me bi se isẹri kpahe omobọ mẹ, yọ Ọsẹ na ọnọ o vi omẹ ze o bi se isẹri kpahe omẹ.” 19  Kẹsena a tẹ nọe nọ: “Bovẹ Ọsẹ ra ọ rrọ?” Jesu ọ tẹ kuyo nọ: “Wha riẹ omẹ hayo Ọsẹ mẹ hẹ. Wha hae riẹ omẹ, wha hae riẹ Ọsẹ mẹ re.” 20  Ọ ta eme nana evaọ oria nọ a fi ekpẹti okẹ-unevaze họ okenọ o je wuhrẹ evaọ etẹmpol na. Rekọ ohwo ọvo o kru rie he, keme auwa riẹ o ri te he. 21  Fikiere ọ tẹ wariẹ ta kẹ ae nọ: “Mẹ be nyavrẹ, yọ wha te gwọlọ omẹ, rekọ wha ti whu evaọ izieraha rai. Oria nọ me bi kpohọ wha te sae nyaze iẹe he.” 22  Ahwo Ju na a te muhọ ẹta nọ: “Kọ o bi ti kpe omariẹ? Keme ọ be ta nọ, ‘Oria nọ me bi kpohọ wha te sae nyaze iẹe he.’” 23  Ọ tẹ ta kẹ ae nọ: “Whai yọ erọ otọakpọ na; obọ ehru me no ze. Akpọ nana wha no ze; me no akpọ nana ze he. 24  Oyejabọ nọ mẹ rọ ta kẹ owhai nọ: Wha ti whu evaọ izieraha rai. Keme wha gbẹ rọwo nọ mẹ họ ọye he, wha ti whu evaọ izieraha rai.” 25  Fikiere a te mu ei họ ẹnọ nọ: “Whẹ yọ ono?” Jesu ọ tẹ kpahe kẹ ae nọ: “Fikieme me bi ro lele owhai ta ẹme dede? 26  Me wo eware buobu nọ mẹ rẹ ta kpahe owhai je ro gu owhai ẹdhọ. Evaọ uzẹme, Ọnọ o vi omẹ ze yọ ọrọ uzẹme, yọ eware nọ me yo mi ei mẹ be ta evaọ akpọ na.” 27  A riẹ hẹ inọ Ọsẹ na ọ be ta kẹ ae kpahe na. 28  Kẹsena Jesu ọ tẹ ta nọ: “Nọ wha tẹ kpare Ọmọ ohwo kpehru no, ẹsiẹe wha te riẹ nọ mẹ họ ọye, gbe nọ mẹ be rọ udu obọmẹ ru oware ovo ho; rekọ wọhọ epanọ Ọsẹ na o wuhrẹ omẹ ere mẹ be ta eware nana. 29  Yọ Ọnọ o vi omẹ ze ọ rrọ kugbe omẹ; ọ nyase omẹ ọvo ba ha, keme ẹsikpobi me bi ru eware nọ e rẹ were iẹe.” 30  Epanọ ọ jẹ rọ ta eme nana, ibuobu a te fi ẹrọwọ họ iẹe. 31  Kẹsena Jesu ọ tẹ ta kẹ ahwo Ju nọ a fi ẹrọwọ họ iẹe na nọ: “Wha te bi koko eme mẹ ẹsikpobi, yọ whai ginọ ilele mẹ, 32  yọ wha te riẹ uzẹme na, uzẹme na u ve ti si owhai no igbo.” 33  Enọ e rọwo ho na a tẹ kpahe kẹe nọ: “Mai yọ emọ Abraham, yọ ma re jọ erigbo kẹ ohwo ọvo ẹdẹvo ho. Emejabọ whọ be rọ ta nọ, ‘Wha ti no igbo’?” 34  Jesu ọ tẹ kẹ ae uyo nọ: “Uzẹme uzẹme mẹ be ta kẹ owhai, ohwo kpobi nọ ọ be raha uzi yọ ọrigbo uzioraha. 35  Ofariẹ, ọrigbo ọ rẹ jọ uwou olori riẹ bẹdẹ bẹdẹ hẹ; ọmọ olori na ọ rẹ jariẹ bẹdẹ bẹdẹ. 36  Fikiere, Ọmọ na o te si owhai no igbo, yọ wha gine zihe ruọ emuyẹ no. 37  Mẹ riẹ nọ whai emọ Abraham. Rekọ wha be gwọlọ omẹ kpe, keme wha rọwo iwuhrẹ mẹ hẹ. 38  Mẹ be ta eware nọ mẹ ruẹ okenọ mẹ jọ kugbe Ọsẹ mẹ, rekọ wha bi ru eware nọ wha yo mi ọsẹ rai.” 39  A tẹ kpahe kẹe nọ: “Abraham họ ọsẹ mai.” Jesu ọ tẹ ta kẹ ae nọ: “Wha hae rrọ emọ Abraham, wha hai ti ru iruo Abraham. 40  Rekọ wha be gwọlọ omẹ kpe, mẹ nọ mẹ ta uzẹme nọ me yo mi Ọghẹnẹ kẹ owhai. Abraham o ru ere he. 41  Iruo ọsẹ rai wha bi ru.” A tẹ ta kẹe nọ: “Ọfariẹ-ogbe* a ro yẹ omai hi; Ọsẹ ọvo ma wo, Ọghẹnẹ.” 42  Jesu ọ tẹ ta kẹ ae nọ: “O hae jọnọ Ọghẹnẹ họ Ọsẹ rai, wha hai ti you omẹ, keme obọ Ọghẹnẹ me no ze ziọ etenẹ. Yọ udu obọmẹ mẹ rọ nyaze he, rekọ Ọye o vi omẹ ze. 43  Eme wha gbe bi ro wo otoriẹ oware nọ mẹ be ta na ha? Fikinọ wha be gaviezọ kẹ ẹme mẹ hẹ. 44  Obọ ọsẹ rai Ẹdhọ wha no ze, yọ o rẹ were owhai re wha ru ẹgwọlọ ọsẹ rai. Ọyena ọ rrọ ojihẹ anwẹnọ o ro muhọ,* yọ o dikihẹ ga evaọ uzẹme na ha, keme uzẹme o rrọ eva riẹ hẹ. Ọ tẹ be ta ọrue ọ rẹ tae epaọ ẹkoma riẹ, keme ọtọrue ọ rrọ gbe ọsẹ ọrue. 45  Rekọ fikinọ mẹ be ta uzẹme na kẹ owhai, wha be rọwo ẹme mẹ hẹ. 46  Ono evaọ usu rai ọ rẹ sai lele uzioraha jọ ba omẹ? Otẹrọnọ uzẹme mẹ be ta, fikieme wha gbẹ be rọ rọwo ẹme mẹ hẹ? 47  Ọnọ ọ rrọ ọrọ Ọghẹnẹ ọ rẹ gaviezọ kẹ eme Ọghẹnẹ. Oyejabọ nọ wha gbẹ be rọ gaviezọ họ na, keme wha rrọ erọ Ọghẹnẹ hẹ.” 48  Ahwo Ju na a tẹ kpahe kẹe nọ: “Kọ ma gbẹ ta gba inọ, ‘Whẹ yọ ohwo Sameria gbe nọ idhivẹri ọ rrọ owhẹ oma’?” 49  Jesu ọ tẹ ta nọ: “Idhivẹri ọ rrọ omẹ oma ha, rekọ mẹ be rọ ọghọ kẹ Ọsẹ mẹ, yọ wha bi rri omẹ vo. 50  Rekọ mẹ be gwọlọ oruaro kẹ omobọ mẹ hẹ; Ọjọ ọ riẹ nọ ọ be gwọlọ iẹe yọ ọye họ obruoziẹ na. 51  Uzẹme uzẹme mẹ be ta kẹ owhai, ohwo kpobi nọ o koko eme mẹ o ti whu vievie he.” 52  Ahwo Ju na a tẹ ta kẹe nọ: “U mu omai ẹro no inọ idhivẹri ọ rrọ owhẹ oma. Abraham o whu, ere eruẹaro na re, rekọ whọ be ta nọ, ‘Ọnọ o koko eme mẹ, o ti whu vievie he.’ 53  Kọ whọ rro vi Abraham ọsẹ mai, ọnọ o whu? Eruẹaro na a whu re. Ono whọ be ta nọ whọ rrọ?” 54  Jesu ọ tẹ ta nọ: “Mẹ tẹ kẹ omobọ mẹ oruaro, yọ oruaro mẹ u fioka ha. Ọsẹ mẹ họ ọnọ ọ be kẹ omẹ oruaro, ọnọ wha be ta nọ ọye họ Ọghẹnẹ rai na. 55  Ghele na wha riẹ riẹ hẹ, rekọ mẹ riẹ riẹ. Yọ mẹ tẹ ta nọ mẹ riẹ riẹ hẹ, mẹ vẹ te jọ wọhọ owhai, ọtọrue. Rekọ mẹ riẹ riẹ yọ me bi koko eme riẹ. 56  Abraham ọsẹ rai ọ ghọghọ gaga fiki ẹdẹ mẹ nọ o je rẹro nọ ọ te ruẹ, yọ ọ ruẹ e riẹ ọ tẹ ghọghọ.” 57  Ahwo Ju na a tẹ ta kẹe nọ: “Whọ re kpako te ikpe udhuvẹ gbikpe he, whọ tẹ be ta nọ whọ ruẹ Abraham?” 58  Jesu ọ tẹ ta kẹ ae nọ: “Uzẹme uzẹme mẹ be ta kẹ owhai, taure a te ti yẹ Abraham yọ mẹ rrọ no.” 59  Fikiere a tẹ tọlọ itho re a ro fi ei, rekọ Jesu o te dhere jẹ nya no etẹmpol na.

Oruvẹ-Obotọ

Hayo “eriwo ohwo-akpọ.”
Evaọ Griki, por·neiʹa. Rri oria Otofa Eme.
Hayo “no emuhọ ze.”