Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 6:1-15

EWARE NỌ E RIẸ EVA

  • A salọ ezae ihrẹ re a hae ghale emu (1-7)

  • A ta nọ Stivin ọ be ta eme-aghọ (8-15)

6  Whaọ evaọ edẹ yena, nọ ilele na i bi vihọ na, ahwo Ju nọ a be jẹ Griki a tẹ be go kpahe ahwo Ju nọ a be jẹ Hibru fikinọ a bi rri eyae-uku rai vo evaọ emu nọ a be ghale kẹdẹ kẹdẹ na.  Fikiere Ikpegbivẹ na a te se ilele na kpobi kokohọ a tẹ ta nọ: “U kiehọ họ re ma brobọno ewuhrẹ ẹme Ọghẹnẹ re ma ghale emu.  Fikiere inievo, whai ọvo wha jọ udevie rai salọ ezae ihrẹ nọ i wo odẹ-ezi,* enọ e vọ avọ ẹzi ọfuafo gbe areghẹ, re ma rehọ ai mu enọ e rẹ rẹrote iruo nana nọ i wuzou na;  rekọ ma vẹ roma kẹ olẹ gbe ewuhrẹ ẹme Ọghẹnẹ.”  Ẹme nọ a ta na ọ were ilele na kpobi, a tẹ salọ Stivin, ọzae nọ ọ vọ avọ ẹrọwọ gbe ẹzi ọfuafo, te Filip, Prokorọs, Nikanọ, Taemọn, Pamẹnas, gbe Nikolas, ohwo Antiọk nọ o kurẹriẹ ruọ egagọ ahwo Ju vẹre.  A tẹ rehọ ai bru ikọ na ze, nọ ikọ na a lẹ no, a tẹ rọ obọ kpahe ae uzou.  Fikiere, ẹme Ọghẹnẹ o te je do ruọ eria kpobi, unu ilele na u te je dhe ebuebu gaga evaọ Jerusalẹm; yọ izerẹ buobu i je kurẹriẹ ziọ ẹrọwọ na.  Whaọ Stivin, ọnọ aruoriwo gbe ogaga Ọghẹnẹ ọ vọ oma, o je ru eware igbunu gbe eware eka evaọ udevie ahwo na.  Rekọ ezae jọ erọ utu nọ a je se Uwou-Egagọ Enọ A Si No Igbo na a tẹ nyaze, gbe ahwo Sairini gbe ahwo Alekzandria jọ, gbe ejọ nọ i no obọ Silisia gbe Esia ze re a lele Stivin vravro. 10  Rekọ a sae rọ oma za areghẹ gbe ẹzi ọfuafo nọ ọ jẹ kpọe ta ẹme he. 11  Kẹsena a tẹ lẹlẹ bẹbẹ ahwo jọ họ re a ta nọ: “Ma yo nọ ọ jẹ ta eme-aghọ kpahe Mosis gbe Ọghẹnẹ.” 12  A tẹ bẹbẹ ahwo na gbe ekpako na gbe otu ikere-obe na họ, a te su ruru ei idudhe, a tẹ jabọ kru ei a tẹ rehọ iẹe vrẹ kpobọ Sanhẹdrin na. 13  A tẹ rehọ isisẹri erue ze enọ e ta nọ: “Ọzae nana ọ be ta eme iyoma ẹsikpobi kpahe oria ọrẹri nana gbe Uzi na. 14  Wọhọ oriruo, ma yo nọ ọ jẹ ta nọ Jesu ohwo Nazarẹt na o ti kporo uwou nana no je nwene izi gbe iruemu nọ Mosis ọ kẹ omai.” 15  Epanọ enọ e rrọ Sanhẹdrin na kpobi a je ro rri rie na, a tẹ ruẹ nọ ovao riẹ u bi lo wọhọ ovao ukọ-odhiwu.

Oruvẹ-Obotọ

Hayo “ezae ihrẹ nọ a be ta eme ezi kpahe.”