Kpohọ eme nọ e riẹ eva

Kpohọ oria izoẹme

Iruẹru 5:1-42

EWARE NỌ E RIẸ EVA

  • Ananayas avọ Safira (1-11)

  • Ikọ na a ru eware igbunu buobu (12-16)

  • A fi rai họ uwou-odi je siobọno ai (17-21a)

  • A wariẹ rehọ ae ziọ aro Sanhẹdrin (21b-32)

    • ‘Yoẹme kẹ Ọghẹnẹ orọnikọ ahwo ho’ (29)

  • Ohrẹ Gamaliẹl (33-40)

  • Usi uwoma ota no uwou ruọ uwou (41, 42)

5  Whaọ ọzae jọ nọ a re se Ananayas, avọ aye riẹ Safira, a zẹ otọ jọ nọ a wo.  Rekọ ọ tẹ lẹlẹ si abọjọ igho na no, yọ aye riẹ ọ riẹ kpahe iẹe, ọ tẹ rehọ abọjọ ọvo se ikọ na.  Rekọ Pita ọ tẹ ta nọ: “Ananayas, fikieme whọ rọ kẹ Setan uvẹ ru udu ra ga nọ who bi ro gu ọrue kẹ ẹzi ọfuafo na, jẹ lẹlẹ si abọjọ igho nọ whọ zẹ otọ na no?  Kọ ogbẹrọnọ whẹ o wo otọ na? Yọ whọ make zẹe no na, kọ ogbẹrọnọ oware nọ u je owhẹ whọ rẹ rehọ ugho na ru? Fikieme who ro roro oware uyoma utiona evaọ udu ra? Ọghẹnẹ who gu ọrue kẹ na orọnikọ ahwo-akpọ họ.”  Nọ Ananayas o yo eme nana, o te kie fihọ otọ o te whu. Ozọ ulogbo u te mu ahwo kpobi nọ a yo kpahe onana.  Kẹsena emoha na a tẹ kpama, a tẹ rọ ehọ variẹ iẹe, a tẹ wọe vrẹ, a te ki ei.  Nọ oware wọhọ euwa esa e vrẹ no aye riẹ ọ tẹ nyaze, ọ riẹ oware nọ o via ha.  Pita ọ tẹ nọe nọ: “Ta kẹ omẹ, kọ unuigho nana whai imava wha zẹ otọ na?” Ọ tẹ kuyo nọ: “Ee unuigho yena.”  Pita ọ tẹ ta kẹe nọ: “Fikieme whai imava wha rọ tamu nọ wha rẹ dawo ẹzi Jihova?* Rri! Ahwo nọ a ki ọzae ra a kẹle unuẹthẹ na no, yọ a te wọ owhẹ vrẹ re.” 10  Ọ tẹ nwani kie fihọ aro riẹ o te whu. Nọ emoha na a ruọ eva, a tẹ ruẹ nọ o whu no a tẹ wọe vrẹ a te ki ei kẹle ọzae riẹ. 11  Fikiere ozọ ulogbo o tẹ ruọ ukoko na soso gbe ahwo kpobi nọ a yo kpahe eware nana. 12  Ofariẹ, ikọ na a te gbe je ru eware eka gbe eware igbunu evaọ udevie ahwo na; yọ aikpobi a jẹ hai kuomagbe evaọ Ogebara* Solomọn. 13  Evaọ uzẹme, amọfa nọ a wo iroro iyoma a gbe wo udu nọ a re ro kuomagbe ai hi; ghele na, ahwo na a jẹ ta ẹme ezi rai gaga. 14  U te no ere no, enọ i bi kurẹriẹ bru Olori na ze a je dhe evievihọ, ahwo buobu, te ezae te eyae. 15  A jẹ tubẹ wọ ahwo nọ a be mọ ziọ iyẹrẹ nọ i re zurie, a vẹ wọ ae fihọ ehru ehwa esese gbe ito re nọ Pita ọ be nyavrẹ, uwoho riẹ ọvo dede u ve te ejọ rai. 16  Ofariẹ, ogbotu ahwo a je zurie no ewho nọ e kẹle Jerusalẹm ze, avọ ahwo nọ a be mọ gbe enọ izi igbegbe e rrọ oma nọ a wọ lele oma, yọ a siwi rai kpobi. 17  Rekọ ozerẹ okpehru na ọ tẹ kpama, avọ enọ e rrọ kugbei kpobi, nọ e rrọ ahwo otu Sadusi, a tẹ wọ lahwe fiki ihri-eriọ. 18  A te kru* ikọ na, a te fi ai họ uwou-odi. 19  Rekọ evaọ aso, ukọ-odhiwu Jihova* o te rovie ethẹ uwou-odi na, rehọ ai lahwe jẹ ta nọ: 20  “Wha kpobọ etẹmpol na re wha gbẹ vuẹ ahwo na eme nọ e rẹ kẹ ae uzuazọ.” 21  Nọ a yo eme nana no, a te kpobọ etẹmpol na nọ oke o ke no, a te muhọ ewuhrẹ. Okenọ ozerẹ okpehru na avọ ahwo riẹ a nyaze a te se ogbẹgwae Sanhẹdrin na gbe ekpako emọ Izrẹl kpobi koko, a te vi ahwo re a nyae rehọ ikọ na no obọ uwou-odi ziọ aro rai. 22  Rekọ nọ elakpa na a te obei, a ruẹ e rai evaọ uwou-odi na ha. Fikiere a te zihe ze a tẹ ta oware nọ a ruẹ, 23  inọ: “Ma ruẹ ethẹ uwou-odi na nọ a kare ziezi, yọ iroiro na a rrọ inuẹthẹ na, rekọ nọ ma rovie ruọ eva ma ruẹ ohwo ọvo ho.” 24  Whaọ nọ oletu etẹmpol na gbe ilori izerẹ na a yo eme nana, a tẹ jẹ ruawa kpahe oware nọ u ti no onana ze. 25  Rekọ ohwo jọ ọ tẹ nyaze ọ tẹ vuẹ ae nọ: “Rri! Ezae nọ wha fihọ uwou-odi na a rrọ evaọ etẹmpol na, a dikihẹ bi wuhrẹ ahwo na.” 26  Kẹsena oletu na avọ elakpa riẹ a tẹ nyai mu ai ze, rekọ ababọ ozighi keme ozọ u je mu ai nọ ahwo na a te rọ itho fi ai. 27  A tẹ rehọ ai ze jẹ rehọ ai dikihẹ aro ogbẹgwae Sanhẹdrin na. Ozerẹ okpehru na ọ tẹ be nọ ae enọ 28  jẹ ta nọ: “Ma vẹvẹ owhai unu gaga inọ wha gbẹ rọ odẹ nana wuhrẹ ahwo ho, ghele na rri! wha rehọ uwuhrẹ rai vọ Jerusalẹm no, yọ wha gba riẹ mu nọ wha rẹ gba azẹ ọzae nana họ uzou mai.” 29  Pita avọ ikọ edekọ na a tẹ ta nọ: “Ọghẹnẹ họ osu nọ ma re yoẹme kẹ orọnikọ ahwo ho. 30  Ọghẹnẹ esẹ-ode mai ọ kpare Jesu no uwhu ze, ọnọ wha kpe ẹkwoma ure nọ wha kare riẹ fihọ. 31  Ọghẹnẹ ọ kẹ riẹ oruaro nọ ọ rehọ iẹe mu Ọnọ o bi ro ru iruo gbe Osiwi evaọ obọze riẹ, re o fiobọhọ kẹ Izrẹl kurẹriẹ je wo erọvrẹ izieraha. 32  Whaọ mai yọ isẹri eware nana, yọ ere ẹzi ọfuafo na re, onọ Ọghẹnẹ ọ rọ kẹ enọ i bi yoẹme kẹe inọ ọye họ osu rai.” 33  Nọ a yo eme nana, eva e tẹ dha ae thesiwa, a tẹ gwọlọ nọ a re kpe ai no. 34  Rekọ ohwo Farisi jọ nọ a re se Gamaliẹl ọ tẹ kpama evaọ Sanhẹdrin na; ọ jọ owuhrẹ Uzi na nọ ahwo kpobi a wo adhẹẹ kẹ, ọ tẹ ta nọ a rehọ ikọ na ruọ otafe evaọ omoke jọ. 35  Kẹsena ọ tẹ ta kẹ ae nọ: “Ahwo Izrẹl, wha yọroma kpahe oware nọ wha gwọlọ ru ezae nana. 36  Wọhọ oriruo, okejọ nọ u kpemu, Tiudas o mu ze, be ta nọ ọyomariẹ yọ ohwo jọ re, yọ ezae buobu, oware wọhọ egba ene (400) a kuomagbei. Rekọ a te ti kpei, enọ i je lele iei kpobi a tẹ vahabọ, ma gbe yo edo rai viere he. 37  Nọ u noi no, Judas ohwo Galili na o te mu ze evaọ etoke odẹ-ukerefihotọ na, o te si ahwo lele omariẹ. Ọzae yena o te je whu re, enọ i je lele iei kpobi a tẹ vahabọ. 38  Fikiere, epanọ eware na e rrọ na, mẹ be ta kẹ owhai nọ, wha whaha iruo ezae nana ha, rekọ wha vu ai wa. Keme otẹrọnọ obọ ahwo oye uwuhrẹ hayo iruo nana i no ze, i ti kie; 39  rekọ otẹrọnọ obọ Ọghẹnẹ i no ze, wha te sae whaha ae he. O gbẹ rrọ ere he, wha te tubẹ ruẹ nọ Ọghẹnẹ omariẹ wha be họre na.” 40  Fikiere a te lele ohrẹ riẹ, a te se ikọ na ruọ eva, a tẹ fa ae,* a tẹ vẹvẹ ai unu inọ a gbẹ rọ odẹ Jesu ta ẹme ofa ha, a te siobọno ai. 41  Fikiere a tẹ nyavrẹ no aro ogbẹgwae Sanhẹdrin na be ghọghọ fikinọ Ọghẹnẹ o rri rai te ahwo nọ a re kpomovuọ họ oma fiki odẹ Jesu. 42  Yọ kẹdẹ kẹdẹ evaọ etẹmpol na gbe no uwou ruọ uwou a tẹ ruabọhọ bi wuhrẹ ahwo ababọ eriosehọ je bi whowho usi uwoma na kpahe Kristi na, Jesu.

Oruvẹ-Obotọ

Rri oria Otofa Eme.
Rri eme-obotọ Jọ 5:2.
Hayo “mu.”
Rri oria Otofa Eme.
Hayo “kpe ai.”