Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 4:1-37

EWARE NỌ E RIẸ EVA

  • A mu Pita avọ Jọn (1-4)

    • Enọ i zihe ruọ ilele no a bu te ezae 5,000 (4)

  • A rehọ e rai gu ẹdhọ evaọ Sanhẹdrin (5-22)

    • ‘Ma rẹ sae siọ ẹme ba ẹta ha’ (20)

  • A lẹ kẹ aruọwha (23-31)

  • Ilele na a jẹ ghale eware rai kugbe ohwohwo (32-37)

4  Nọ Pita avọ Jọn a jẹ ta ẹme kẹ ahwo na, izerẹ na, oletu etẹmpol na, gbe otu Sadusi na a tẹ nya bru ai ze.  Eva e jẹ dha ae fikinọ ikọ na a je wuhrẹ ahwo jẹ be jọ ẹgbede whowho ẹkparomatha Jesu.  A te kru* rai, a te fi ai họ uwou-odi bọo okiokiọ riẹ keme oke u te owọwọ no.  Rekọ ibuobu nọ e gaviezọ kẹ eme rai a rọwo, ezae na a te ti bu te oware wọhọ idu isoi (5,000).  Okiokiọ riẹ, isu ahwo na, ekpako na, gbe otu ikere-obe na a te kokohọ evaọ Jerusalẹm,  yọ Anas olori izerẹ na, Kayafas, Jọn, Alẹkzanda, gbe imoni olori izerẹ na kpobi a jariẹ re.  A tẹ rọ Pita avọ Jọn dikihẹ udevie rai, a te mu ae họ ẹnọ inọ: “Ogaga vẹ hayo evaọ odẹ ono wha ro ru oware nana?”  Kẹsena Pita, avọ ogaga ẹzi ọfuafo na nọ ọ vọ riẹ oma, ọ tẹ ta kẹ ae nọ: “Isu ahwo na gbe ekpako na,  otẹrọnọ fiki oware uwoma nọ ma ru kẹ ọzae nọ ọ ko wha be rọ rehọ omai gu ẹdhọ nẹnẹ na, yọ wha gwọlọ riẹ ohwo nọ o siwi ọzae nana, 10  jọ whai kpobi gbe ahwo Izrẹl kpobi a riẹ inọ, evaọ odẹ Jesu Kristi ohwo Nazarẹt na, ọnọ wha kare fihọ ure kpe rekọ nọ Ọghẹnẹ ọ kpare no uwhu ze na, ẹkwoma odẹ riẹ ọzae nana o ro dikihẹ aro rai omakọkọ na. 11  Ọnana họ ‘utho nọ whai ebebabọ na wha rri vo nọ u zihe ruọ utho ubienẹ nọ o mai wuzou no na.’ 12  Ofariẹ, ohwo ọfa ọ riẹ hẹ nọ a rẹ rọ ẹkwoma riẹ wo esiwo, keme odẹ ofa o rrọ otọakpọ na ha nọ Ọghẹnẹ ọ kẹ nọ a re ro siwi omai.” 13  Whaọ nọ a ruẹ aruọwha nọ Pita avọ Jọn a be rọ ta ẹme, jẹ ruẹ nọ a kpohọ isukulu hu* yọ a viodẹ hẹ, u te gbe ai unu. A te ti muhọ evuhumu inọ a jọ kugbe Jesu. 14  Nọ a be ruẹ ọzae nọ a siwi na nọ o dikihẹ kugbe ai na, a sae ruẹ ẹme ọvo nọ a rẹ kpahe kẹ ae he. 15  Fikiere a tẹ ta kẹ ae nọ a ruọ otafe ọgwa Sanhẹdrin na, a te bi sumẹ, 16  be ta nọ: “Kọ eme ma re ru ahwo nana? Keme uzẹme riẹ họ, oware igbunu a gine ru na, yọ ahwo kpobi nọ a be rria Jerusalẹm a riẹ kpahe iẹe no, yọ ma rẹ sae vro riẹ hẹ. 17  Re onana o seba ẹvaha viere evaọ udevie ahwo na, joma ta eme nọ e rẹ lẹliẹ ozọ mu ai jẹ ta kẹ ae nọ a gbẹ rọ odẹ nana ta ẹme kẹ ohwo ọvo vievie he.” 18  Fikiere a te se ai ruọ eva, a tẹ vẹvẹ ai unu nọ a ta ẹme ọvo vievie he hayo rọ odẹ Jesu wuhrẹ hẹ. 19  Rekọ Pita avọ Jọn a tẹ kpahe kẹ ae nọ: “Sọ u kiehọ evaọ aro Ọghẹnẹ re ma gaviezọ kẹ owhai viukpọ Ọghẹnẹ, wha bruoziẹ na kẹ omarai. 20  Rekọ rọkẹ omai, ma rẹ sae siọ ẹme ba ẹta kpahe eware nọ ma ruẹ je yo ho.” 21  Fikiere, nọ a ta eme efa nọ e rẹ lẹliẹ ozọ mu ai no, a te siobọno ai, keme a jọ obọ rai ruẹ oruthọ ọvo nọ a rẹ rọ kẹ ae uye he gbe fiki ahwo na, keme aikpobi a je jiri Ọghẹnẹ fiki oware nọ o via na. 22  Keme ọzae nọ a rọ edhere igbunu siwi na ọ kpako vrẹ ikpe udhuvẹ. 23  Nọ a siobọno ai no, a tẹ nya bru ilele edekọ na, a te gbiku eware nọ ilori izerẹ gbe ekpako na a ta kẹ ae. 24  Nọ a yo onana, a tẹ rọ okugbe ọvo kpare irru rai lẹ se Ọghẹnẹ nọ: “Olori Ehrugbakpọ, whẹ họ Ọnọ ọ ma odhiwu gbe otọakpọ gbe abade gbe eware kpobi nọ e rrọ eva rai, 25  gbe ọnọ ọ kẹ Devidi ọsẹ-ode mai, odibo ra, ẹzi ọfuafo rọ ta nọ: ‘Fikieme erẹwho na a je bi muofu, yọ ahwo a bi roro kpahe eware ifofe? 26  Ivie akpọ na a mugba yọ isu na a kuomagbe wọhọ ọvo be wọso Jihova* gbe ọnọ o ro mu.’* 27  Ere o ginẹ via, te Herọd avọ Pọntiọs Pailet gbe ahwo erẹwho na avọ ahwo Izrẹl a kuomagbe evaọ okpẹwho nana wọso Jesu, odibo ra nọ ọ rrọ ọrẹri, ọnọ who ro mu, 28  re a ru oware nọ whọ rọ ogaga ra gbe oreva ra rọ jiroro riẹ kpahotọ no anwẹdẹ nọ o te via. 29  Whaọ, Jihova,* kezọ kẹ eme nọ a be ta rọ gwọlọ ru ozọ mu omai na, re whọ kẹ idibo ra aruọwha nọ a rẹ rọ ruabọhọ ta ẹme ra ududu, 30  re whọ gbẹ rọ ogaga ra ro siwi ahwo, re ma gbẹ rọ odẹ Jesu odibo ra nọ ọ rrọ ọrẹri na ru eware eka gbe eware igbunu.” 31  Nọ a lẹ no,* uwou nọ a kokohọ na u te nuhu, ẹzi ọfuafo na ọ tẹ vọ ai kpobi oma, a tẹ jẹ ta ẹme Ọghẹnẹ ududu. 32  Ofariẹ, ogbotu ahwo nọ a rọwo na a jẹ rọ eva evo ru eware, yọ ọvuọvo rai dede ọ jẹ ta nọ eware nọ o wo yọ erọ obọriẹ hẹ, rekọ a jẹ ghale eware kpobi kugbe. 33  Yọ ikọ na a ruabọhọ je se isẹri ziezi kpahe ẹkparomatha Olori na Jesu, yọ Ọghẹnẹ o je dhesẹ uwowou ulogbo kẹ ai kpobi gaga. 34  Evaọ uzẹme, oware ovo o kare ọvuọvo evaọ usu rai hi, keme ahwo kpobi nọ a wo etọ hayo iwou a jẹ zẹ ai a vẹ rọ igho na ze, 35  a vẹ rehọ ae kẹ ikọ na. Ikọ na a vẹ ghale igho na kẹ omomọvo wọhọ epaọ ẹgwọlọ riẹ. 36  Whaọ Josẹf, ọnọ ikọ na a je se Banabas re (onọ otofa riẹ o rrọ, “Ọmọ Omosasọ”), ohwo Livai, ọmotọ Saiprọs, 37  o wo otọ jọ, ọ tẹ zẹe, ọ tẹ rọ igho na se ikọ na.

Oruvẹ-Obotọ

Hayo “mu ai.”
Hayo “a kpohọ isukulu tere he,” koyehọ, a kpohọ isukulu nọ a rẹ jọ wuhrẹ otu-iwuhrẹ na ha; orọnikọ u dhesẹ nọ a riẹ ese hayo ekere he he.
Rri oria Otofa Eme.
Hayo “Kristi riẹ.”
Rri oria Otofa Eme.
Hayo “lẹ gaga no.”