Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 27:1-44

EWARE NỌ E RIẸ EVA

  • Pọl ọ ruọ okọ kpohọ Rom (1-12)

  • Ofou ọgaga o je fou okọ na (13-38)

  • Okọ na u zue (39-44)

27  Fikinọ a jiroro nọ ma ruọ okọ kpobọ Itali, a tẹ rehọ Pọl gbe amọfa nọ a rrọ uwou-odi kẹ oletu ogbaẹmo nọ a re se Juliọs, ọnọ ọ rrọ ogbaẹmo Ọgọstọs.  Nọ ma ruọ okọ jọ nọ u no obọ Adramitiọm ze nọ ọ gwọlọ kpohọ ewho nọ e rrọ akotọ abade evaọ ubrotọ Esia, ma te muhọ ebi vrẹ; Aristakọs ohwo Masidonia nọ o no obọ Tẹsalonika ze ọ jọ kugbe omai.  Okiokiọ riẹ okọ na o tẹ kpahe Saedọn, yọ Juliọs o dhesẹ uwowou* kẹ Pọl, ọ kẹ riẹ uvẹ re ọ nya bru egbẹnyusu riẹ re a rẹrotei.  Nọ ma lehọ no etẹe ma te bi akakotọ Saiprọs, keme ofou na ọ rọ suọ omai.  Kẹsena ma tẹ fa abade na vrẹ, ma te je bi akakotọ Silisia avọ Pamfilia, ma tẹ kpahe unueri nọ o rrọ Mira evaọ Lisia.  Oletu ogbaẹmo na ọ tẹ jọ etẹe ruẹ okọ jọ nọ u no obọ Alẹkzandria ze nọ u bi kpohọ Itali, ọ tẹ ta nọ ma ruọ okọ na.  Nọ okọ na o bi ẹmẹrera edẹ buobu no, ma tẹ rọ udugaga te Konaidọs. Fikinọ ofou na ọ jẹ kẹ omai uvẹ bi họ aro ziezi hi, ma te bi akakotọ Kriti evaọ ofẹ Salmoni, oria nọ ofou na ọ jọ ga tere he.  Nọ ma be rọ udugaga bi vrẹ na, ma te te oria nọ a re se Unueri Uwoma, onọ o kẹle ẹwho Lasea.  Whaọ, ma jọ etẹe raha oke gaga no, yọ u te oke nọ o gbẹ rọ foma ha no re a bi evaọ abade na keme oke emuọriọ-seba ọrọ Ẹdẹ Omavoro* na dede o vrẹ no, Pọl ọ tẹ jiroro jọ ze 10  kẹ ae nọ: “Ezae, mẹ be ruẹ nọ erẹ nana o ti kuhọ avọ uye, yọ orọnikọ ewha na gbe okọ na ọvo i bi ti vru hu rekọ te uzuazọ mai.” 11  Rekọ oletu ogbaẹmo na ọ tẹ gaviezọ kẹ ẹme ọkpokọ na gbe ọnọ o wo okọ na viukpọ ẹme Pọl. 12  Fikinọ unueri nana u fo oria nọ a rẹ jọ evaọ ezi uriri hi, ibuobu evaọ okọ na a tẹ ta nọ ma bi no etẹe, re a ruẹ sọ ma sai te Finiks re ma jọ etẹe evaọ oke uriri na, unueri Kriti nọ u wo inu ivẹ, ojọ u rri ofẹ obọze ẹkpẹlobọ ovatha-ọre, odekọ kọ ẹkpẹlobọ obọze ovatha-ọre. 13  Nọ ofou nọ o je no obọze ovatha-ọre na ze o je fou ẹmẹrera, a te je roro nọ a te sai te Finiks, a te si umuokọ no ame, a te lehọ bi bi akakotọ Kriti vrẹ. 14  Rekọ u ri kri hi na, ofou ọgaga nọ a re se Yurakuilo* o te mu okọ na họ efou. 15  Epanọ ofou na o je fou okọ na gaga yọ o jọ bẹbẹ re okọ na o rọ ovao dhe ofou na, ma tẹ seba ebio, ofou na ọ tẹ be wọ omai vrẹ. 16  O tẹ wọ omai vẹrẹ vẹrẹ kẹle ukoliko osese jọ nọ a re se Kauda oria nọ ofou na o jọ ga tere he, ghele na udugaga ma sai ro kru okọ osese nọ o rrọ emuokọ na daji. 17  Rekọ nọ a si rie ruọ eva no, a tẹ rọ eware gba obọ ẹruokọ nọ a bi bi na, yọ fiki ozọ inọ okọ na o sai ti mu uwẹkpẹ Siatis, a tẹ ra ifi nọ i kru ewẹ-ohọ okọ na, ehọ na e tẹ ziọ otọ, fikiere okọ na o te muhọ esu. 18  Fikinọ ofou na o je fou omai gaga, a te mu eware họ egbolo no okọ na re u vori evaọ okiokiọ riẹ. 19  Evaọ ẹdẹ avọ esa, ae ọvo a tẹ rehọ obọ rai gbolo ifi gbe ekwakwa okọ na efa fihọ ame. 20  Nọ ọre hayo isi e romavia edẹ buobu hu, yọ ofou ọgaga o bi fou omai, ẹruore nọ ma te zọ ọ gbẹ jariẹ hẹ. 21  Nọ ahwo na a jọ eveva te edẹ buobu no, Pọl o te dikihẹ evaọ udevie rai ọ tẹ ta nọ: “Ezae, otẹrọnọ wha rehọ ohrẹ mẹ, ma hai lehọ no Kriti hi, yọ ma hae ruẹ uye nana ha, eware nọ i bi vru na e hai vru hu. 22  Ghele na mẹ be tuduhọ owhai awọ nọ wha kru udu ga, keme ohwo ọvo o ti whu hu, okọ na ọvo o ti vru. 23  Aso nana ukọ-odhiwu Ọghẹnẹ nọ o wo omẹ, nọ mẹ be gọ na o dikihẹ kẹle omẹ, 24  ọ tẹ ta nọ, ‘Ozọ u mu owhẹ hẹ, Pọl. Who ti dikihẹ aro Siza hrọ, yọ rri! Ọghẹnẹ ọ be rọ fiki ra siwi ahwo kpobi nọ a rrọ okọ na kugbe owhẹ.’ 25  Fikiere wha kru udu ga, ezae, keme me fievahọ Ọghẹnẹ inọ o te via epanọ ọ ta kẹ omẹ na. 26  Rekọ okọ na o ti zue omai kẹle ukoliko jọ.” 27  Whaọ nọ u te aso avọ ikpegbene no yọ ofou o bi fou omai kpenẹ avọ enẹ evaọ Abade Adria, evaọ udevie aso ibiokọ na a te je roro nọ a be kẹle okpa jọ no. 28  A te dhe oware họ ame re a riẹ epanọ oria na u diwi te, a tẹ ruẹ nọ u diwi te esabọ udhe,* a te bi omojọ jẹ wariẹ dhe oware họ ame na, a tẹ ruẹ nọ u diwi te esabọ ikpegbisoi.* 29  Fiki ozọ nọ ma ti bi ruọ ehru itho, a tẹ jọ obọ emuokọ na gbolo imuokọ ene fihọ ame, a tẹ be lẹ re oke o ke vẹrẹ. 30  Rekọ nọ ibiokọ na a jẹ gwọlọ dhẹ no okọ na, a jẹ be wọ okọ osese na fihọ ame, bi ru wọhọ ẹsenọ a be gwọlọ jọ obọ ẹruokọ na fi imuokọ họ ame, 31  Pọl ọ tẹ ta kẹ oletu ogbaẹmo na avọ isoja na nọ: “Ajokpanọ ezae nana a rẹ daji okọ na, o gbẹ rrọ ere he wha te zọ họ.” 32  Isoja na a te bru ifi okọ osese na no, u te su vrẹ. 33  Nọ oke o be joma ke no, Pọl ọ tẹ be tuduhọ ahwo na kpobi awọ nọ a re emu o tẹ make kawo, be ta nọ: “Nẹnẹ họ ẹdẹ avọ ikpegbene nọ wha rọ rrọ awawa bi rẹro na ababọ emu nọ wha be re. 34  Fikiere mẹ be tuduhọ owhai awọ nọ wha re emu; keme o rrọ kẹ ewoma rai, keme makọ ubioto omọvo rai dede o ti vru hu.” 35  Nọ ọ ta onana no, ọ tẹ tọlọ ebrẹdi, ọ tẹ jọ iraro rai kpobi lẹ yere Ọghẹnẹ, ọ tẹ bẹre iẹe, o te muhọ ẹre. 36  Aikpobi a te kru udu ga, ae omarai a te mu emu họ ẹre. 37  Mai kpobi nọ ma jọ okọ na, ma bu te egba ivẹ gbe udhosa gbe ikpegbezeza (276). 38  Nọ a re eva vọ no, a te gbolo eka nọ e rrọ okọ na fihọ abade na re okọ na o ruẹsi vori. 39  Nọ oke o ke no, a je vuhu obonọ okpa o rrọ họ, rekọ a jẹ ruẹ oria jọ nọ uwẹkpẹ o rrọ, a tẹ gbaemu nọ a rẹ kpahe etẹe otẹrọnọ o sae lọhọ. 40  Fikiere a te bru ifi imuokọ na no i te kie fihọ abade na, a tẹ jẹ ra ifi nọ a rọ gba ivi na no; nọ a kpare ẹwẹ-ohọ nọ o rrọ obọ ẹruokọ na kpehru rri ofou na no, a te mu obọ unueri na họ ebi kpohọ. 41  Nọ a bi te oria nọ uwẹkpẹ u kokohọ evaọ otọ ame na, a te bi okọ na ruọ uwẹkpẹ na, ẹruokọ na o te mu, rekọ ẹkporo na ọ tẹ be tehe emuokọ na o te muhọ ebru ibribro. 42  Fikiere isoja na a tẹ jiroro nọ a re kpe ahwo uwou-odi na no, re ọvuọvo ọ gbẹ ya ame vrẹ dhẹ vabọ họ. 43  Rekọ oletu ogbaẹmo na ọ gba riẹ mu nọ o re siwi uzuazọ Pọl, ọ tẹ whaha ae oware nọ a jẹ gwọlọ ru na. Ọ tẹ ta kẹ enọ e rẹ sae ya ame re a la ruọ abade na re a kake ya kpahe okpa, 44  kẹsena enọ i kiọkọ a ve ti lele ai, ejọ evaọ ehru ewẹ-ekpala, ejọ ehru ewẹ okọ na. Ere ahwo na kpobi a ro te okpa gbẹsinẹdẹ.

Oruvẹ-Obotọ

Hayo “uwowou nọ a re dhesẹ kẹ ibe ohwo-akpọ.”
Onana o jọ amara ahwo Ju nọ a re se Tishri, onọ u kie fihọ amara Azie ruọ amara Akpe nẹnẹ, onọ o jọ emuhọ oke iso gbe oke nọ ẹkporo o re ro fi gaga.
Koyehọ, ofou nọ o re no obọze ẹkpẹlobọ ovatha-ọre ze.
Oware wọhọ imita 36 (irula 120).
Oware wọhọ imita 27 (irula 90).