Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 26:1-32

EWARE NỌ E RIẸ EVA

  • Pọl o gu ẹkẹ-unu riẹ evaọ aro Agripa (1-11)

  • Pọl o gbiku epanọ o ro kurẹriẹ (12-23)

  • Eme nọ Fẹstọs avọ Agripa a kpahe (24-32)

26  Agripa ọ tẹ ta kẹ Pọl nọ: “Who wo uvẹ nọ whọ sai ro gu ẹkẹ-unu ra.” Kẹsena Pọl ọ tẹ riẹ obọ riẹ o te mu ẹkẹ-unu riẹ họ egu, inọ:  “Agripa Ovie, eva e were omẹ nọ aro ra mẹ be te jọ gu ẹkẹ-unu mẹ nẹnẹ na kpahe eware kpobi nọ ahwo Ju a gu fihọ omẹ uzou na,  maero nọ orọnọ whọ riẹ iruemu ahwo Ju kpobi gbe eware avro sa-sa nọ e rrọ udevie ahwo Ju. Fikiere mẹ be lẹ owhẹ nọ rọ odiri gaviezọ kẹ omẹ.  “Evaọ uzẹme, ahwo Ju kpobi nọ a riẹ omẹ anwẹdẹ vẹre a riẹ oghẹrẹ uzuazọ nọ me yeri no emaha ze evaọ udevie ahwo* mẹ gbe evaọ Jerusalẹm,  yọ o tẹ ruọ ae nọ a re se isẹri, a riẹ nọ me yeri uzuazọ ohwo Farisi, ẹko-egagọ mai nọ a rẹ jọ lele uzi te oka.  Rekọ fiki ẹruore kpahe eyaa nọ Ọghẹnẹ ọ ya kẹ esẹ-ode mai a be rọ rehọ omẹ gu ẹdhọ na;  eyaa nana ọvona erua ikpegbivẹ mai a bi rẹro erugba rai nọ o be lẹliẹ ae gọ Ọghẹnẹ taso tuvo avọ ajọwha. Fiki ẹruore nana ahwo Ju a bi ro gu eware fihọ omẹ uzou na, O Ovie.  “Fikieme wha gbẹ be rọ rọwo ho inọ Ọghẹnẹ ọ rẹ kpare ahwo no uwhu ze?  Rọkẹ omẹ, u mu omẹ ẹro vẹre inọ u fo re mẹ rọ edhere kpobi wọso odẹ Jesu ohwo Nazarẹt na. 10  Ere me gine ru evaọ Jerusalẹm, mẹ kare erezi na buobu fihọ uwou-odi, keme ilori izerẹ na a kẹ omẹ udu; yọ a tẹ gwọlọ kpe ai no, mẹ jẹ rọwo fihọ ekpe rai. 11  Mẹ kẹ rai uye unuẹse buobu evaọ iwou-egagọ na kpobi re mẹ gba ae họ siọ ẹrọwọ rai; yọ fikinọ eva rai e jẹ dha omẹ gaga, mẹ tubẹ nya kpohọ ewho efa re me kpokpo ae. 12  “Nọ me je ru eware nana, ẹdẹjọ mẹ tẹ jọ edhere je kpobọ Damaskọs avọ udu nọ ilori izerẹ na a kẹ omẹ, 13  nọ mẹ jọ edhere na evaọ udevie uvo, O Ovie, elo jọ nọ ọ ga vi ọrọ ọre na o te lo no obọ ehru ze wariẹ omẹ họ gbe enọ ma gbẹ jọ usu. 14  Nọ mai kpobi ma kie fihọ otọ no, me te yo urru jọ nọ o rehọ ẹvẹrẹ Hibru ta kẹ omẹ nọ: ‘Sọl, Sọl, fikieme who bi ro kpokpo omẹ? Ekpọ esiọsiọle nọ whọ be rọ owọ fa na o be nwa owhẹ oma.’ 15  Rekọ mẹ tẹ nọ inọ: ‘Whẹ yọ ono, Olori?’ Olori na ọ tẹ ta nọ: ‘Mẹ yọ Jesu, ọnọ who bi kpokpo na. 16  Rekọ kpama dikihẹ. Fiki onana mẹ jẹ romavia kẹ owhẹ, re mẹ salọ owhẹ wọhọ odibo gbe osẹri kpahe eware nọ whọ ruẹ no na gbe enọ me ti dhesẹ kẹ owhẹ kpahe omamẹ. 17  Mẹ te thọ owhẹ no obọ ahwo nana gbe ahwo erẹwho na enọ me bi vi owhẹ bru na 18  re who rovie ibiaro rai, je ku ae rẹriẹ no ebi ziọ elo, je no obọ ogaga Setan bru Ọghẹnẹ, re a ruẹsi wo erọvrẹ izieraha gbe ukuoriọ evaọ udevie enọ a ru fo no fiki ẹrọwọ rai nọ a fihọ omẹ.’ 19  “Fikiere, Agripa Ovie, mẹ ghẹmeeyo kẹ ọnọ ọ romavia kẹ omẹ no obọ odhiwu ze na ha, 20  mẹ tẹ kake rọ ovuẹ na se ahwo nọ a rrọ Damaskọs, kẹsena mẹ tẹ nya bru ahwo nọ a rrọ Jerusalẹm, gbe ewho Judia soso, je ro se ahwo erẹwho na, inọ a kurẹriẹ je bru Ọghẹnẹ ze ẹkwoma eruo eware nọ i re dhesẹ ekurẹriẹ. 21  Fiki onana ahwo Ju na a ro kru omẹ evaọ etẹmpol na jẹ gwọlọ nọ a re kpe omẹ no. 22  Rekọ fikinọ Ọghẹnẹ o bi fiobọhọ kẹ omẹ, mẹ ruabọhọ bi se isẹri rite inẹnẹ na rọkẹ ahwo esese gbe ilogbo, yọ eware nọ Eruẹaro na gbe Mosis a ta nọ e te via mẹ be ta, 23  inọ Kristi na ọ te ruẹ uye, yọ wọhọ ohwo ọsosuọ nọ a te kpare no uwhu ze, o ti whowho elo rọkẹ ahwo nana jẹ rọkẹ erẹwho na.” 24  Whaọ epanọ Pọl ọ jẹ rọ ta eware nana ro gu ẹkẹ-unu riẹ na, Fẹstọs ọ tẹ rọ urru oruarua ta nọ: “Pọl, iroro ra e gbẹ gba ha! Uwuhrẹ ogaga u bi mi owhẹ iroro no!” 25  Rekọ Pọl ọ tẹ ta nọ: “Iroro mẹ e gba, Fẹstọs Oride na, eme nọ mẹ be ta na eme uzẹme e tẹ jẹ rrọ erọ iroro egbagba. 26  Evaọ uzẹme, ovie na nọ me bi lele ta ẹme ududu na ọ riẹ kpahe eware nana ziezi; u mu omẹ ẹro nọ eware nana ọvuọvo i vo rie ẹro ho, keme enana ọvuọvo e romavia evaọ oria nọ u siomano ho. 27  Agripa Ovie, kọ whọ rọwo eme Eruẹaro na? Mẹ riẹ nọ whọ rọwo.” 28  Rekọ Agripa ọ tẹ ta kẹ Pọl nọ: “Uviemenẹ whọ te ta omẹ kurẹriẹ zihe ruọ Oleleikristi no.” 29  Pọl ọ tẹ ta nọ: “Mẹ be lẹ nọ uviemenẹ hayo oke jọ evaọ obaro, orọnikọ whẹ ọvo ho rekọ te ahwo kpobi nọ a bi yo ẹme mẹ nẹnẹ na a rẹ jọ wọhọ omẹ, u te no egbregba nọ a rọ kare omẹ na no.” 30  Kẹsena ovie na ọ tẹ kpama, ọba na gbe Benaisi gbe ezae nọ e keria kugbe ae a tẹ kpama re. 31  Rekọ nọ a jẹ nyavrẹ, a tẹ be ta kẹ ohwohwo nọ: “Ọzae nana o ru oware ọvo thọ nọ o ro fo uwhu hayo uwou-odi hi.” 32  Agripa ọ tẹ ta kẹ Fẹstọs nọ: “Ma hẹ sai siobọno ọzae nana ọ gbẹ kpare ẹdhọ riẹ bru Siza no ho.”

Oruvẹ-Obotọ

Hayo “orẹwho.”