Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 21:1-40

EWARE NỌ E RIẸ EVA

  • A rrọ edhere bi kpohọ Jerusalẹm  (1-14)

  • Nọ a te Jerusalẹm (15-19)

  • Pọl o lele ohrẹ ekpako na (20-26)

  • Ozighi evaọ etẹmpol na; a mu Pọl (27-36)

  • A kẹ Pọl uvẹ re ọ ta ẹme kẹ ogbotu na (37-40)

21  Nọ ma rọ udugaga nyase ae ba je lehọ no, ofou ọ tẹ wọ okọ na ovavo rite Kọs, evaọ okiokiọ riẹ ma te kpobọ Rods, je no etẹe kpohọ Patara.  Nọ ma ruẹ okọ nọ o be fa vrẹ kpohọ Fonisia, ma tẹ ruọ eva riẹ u te bi vrẹ.  Nọ ma te oria nọ ma jọ kparo ruẹ ukoliko Saiprọs, ma tẹ rọ ofẹ ẹkpẹlobọ* bi vrẹ riẹ, ma te bi vrẹ kpohọ Siria ma tẹ kpahe Taya, oria nọ a te jọ wọ ewha no okọ na fihọ otọ.  Ma tẹ gwọlọ ilele na, nọ ma ruẹ e rai no ma tẹ jọ etẹe edẹ ihrẹ. Rekọ ẹkwoma ẹzi ọfuafo na, ilele na a ta kẹ Pọl unuẹse buobu inọ o kpobọ Jerusalẹm ho.  Nọ oke mai evaọ etẹe u re no, ma tẹ wọ, ma tẹ ruabọhọ erẹ mai; rekọ aikpobi, te eyae te emaha na, a te su omai bẹsenọ ma rọ ruọ otafe ẹwho na no. Nọ ma kigwẹ evaọ unueri na ma tẹ lẹ  jẹ ta kẹ ohwohwo nọ wha jọ tou. Kẹsena ma tẹ ruọ evaọ okọ na, a te zihe kpobọ iwou rai.  Okọ na u te bi no Taya ma te te Tolẹmais, ma te yere inievo na jẹ jọ kugbe ai ẹdẹ ọvo.  Okiokiọ riẹ okọ na u te lehọ ma te te Sisaria, ma tẹ ruọ uwou Filip ọtausiuwoma na, ọnọ ọ jọ omọvo ezae ihrẹ nọ ikọ na a salọ evaọ Jerusalẹm, ma tẹ jọ kugbei.  Ọzae nana o wo emetẹ ene nọ i wo ezae he* enọ e jẹ ruẹaro. 10  Nọ ma jọ etẹe edẹ jọ no, ọruẹaro jọ nọ a re se Agabọs o te no obọ Judia ze. 11  Ọ tẹ nya bru omai ze ọ tẹ rehọ umueku Pọl, ọ tẹ rehọ iẹe gba abọ gbe awọ obọriẹ, ọ tẹ ta nọ: “Enẹ ẹzi ọfuafo na ọ ta, ‘Enẹ ahwo Ju nọ e rrọ Jerusalẹm a te gba ọzae nọ o wo umueku nana, a vẹ rehọ iẹe kẹ ahwo erẹwho na.’” 12  Nọ ma yo eme nana, te omai te inievo nọ e rrọ ẹwho na ma te mu ei họ ẹlẹ inọ o kpohọ Jerusalẹm ho. 13  Pọl ọ tẹ ta nọ: “Kọ fikieme wha be rọ viẹ be gwọlọ fi oyẹlẹ họ omẹ oma* evaọ oware nọ mẹ gba mu no nọ me re ru? Jọ u mu owhai ẹro inọ orọnikọ mẹ ruẹrẹ oma kpahe re a rọ ifi gba omẹ ọvo ho rekọ re me je whu evaọ Jerusalẹm fiki odẹ Olori na Jesu.” 14  Nọ ma sae ta iroro riẹ nwene he, ma gbe si ẹme na viere he* ma tẹ ta nọ: “Jọ oreva Jihova* u rugba.” 15  Nọ edẹ nana e vrẹ no, ma tẹ ruẹrẹ oma họ kẹ erẹ na ma te mu obọ Jerusalẹm họ ekpohọ. 16  Ilele na jọ nọ i no Sisaria ze a lele omai re, a te su omai kpobọ uwou Mnason ohwo Saiprọs, ọnọ ọ rrọ omọvo ilele nọ e kaki kurẹriẹ, keme uwou riẹ ma be te kpahe. 17  Nọ ma te Jerusalẹm, inievo na a dede omai rehọ avọ evawere. 18  Rekọ okiokiọ riẹ te Pọl te omai ma tẹ nya bru Jemis, yọ ekpako na kpobi a jariẹ. 19  O te yere ai ọ tẹ rọ unu kotọ gbiku eware nọ Ọghẹnẹ o ru evaọ udevie erẹwho na ẹkwoma odibọgba riẹ. 20  Nọ a yo eme nana a te mu Ọghẹnẹ họ ejiri, rekọ a tẹ ta kẹe nọ: “Oniọvo, whọ riẹ nọ ahwo Ju nọ a bu te idu buobu a zihe ruọ ilele Jesu no, yọ a se Uzi na gboja gaga. 21  Rekọ a yo nọ ahwo a be ta kpahe owhẹ inọ who bi wuhrẹ ahwo Ju kpobi nọ a rrọ udevie erẹwho na inọ a gbabọkẹ uzi Mosis, inọ whọ be ta kẹ ae nọ a yawo emọ rai hi hayo nya lele iruemu mai nọ i no anwae ze he. 22  Kọ eme ma re ru kpahe onana? A te seba eyo ho inọ whọ nyaze no. 23  Fikiere ru onọ ma be te ta kẹ owhẹ na: Ma wo ezae ene jọ nọ a rọ iroro obọrai ya eyaa kẹ Ọghẹnẹ. 24  Rehọ ezae nana kugbe oma re whọ nyai voro omara gbe oma ezae na jẹ hwosa araha rai, re a nware eto uzou rai no. Ohwo kpobi ọ vẹ te riẹ nọ eme nọ a bi yo kpahe owhẹ na ọrue, gbe nọ who bi ru eware kpatiẹ, je bi koko Uzi na re. 25  Rọkẹ ilele na nọ e rrọ ahwo erẹwho na, ma kere iroro nọ ma jẹ na se ai no inọ a siomano eware nọ a ro dhe idhe kẹ emedhọ, no azẹ, erao nọ i whu avọ azẹ,* gbe ọfariẹ-ogbe.”* 26  Okiokiọ riẹ Pọl ọ tẹ rehọ ezae na kugbe oma o te voro omariẹ gbe oma ezae na, a tẹ ruọ evaọ etẹmpol na re a fodẹ oke nọ edẹ omavoro na e te rọ gba a ve dhe idhe fiki rai omomọvo. 27  Whaọ nọ edẹ ihrẹ na e kẹle ekuhọ no, nọ ahwo Ju nọ a no obọ Esia ze a ruẹ e riẹ evaọ etẹmpol na, a te mu ozighi họ ẹwha fihọ ogbotu na soso, a te kru rie, 28  bi bo nọ: “Ahwo Izrẹl, wha dhẹze! Ọzae nana họ ọnọ ọ be jọ oria kpobi wuhrẹ ahwo kpobi wọso ahwo mai gbe Uzi mai gbe oria nana. Mai yoma dede na, ọ tubẹ wha ahwo Griki ziọ etẹmpol na je zue oria ọrẹri nana no.” 29  Keme a ruẹ Trọfimọs ohwo Ẹfisọs na kugbe Pọl evaọ okpẹwho na vẹre, a te roro nọ Pọl ọ rehọ e riẹ ruọ evaọ etẹmpol na. 30  Ẹwho na soso ọ tẹ jọ zighi zighi, ahwo a tẹ be dhẹze kokohọ, a te kru Pọl a te si ei ruọ otafe etẹmpol na, a tẹ nwani si ethẹ na họ. 31  Epanọ a jẹ rọ gwọlọ nọ a re kpei no na, usi na u te do te ọnọ o wuzou ogbaẹmo* na oma inọ Jerusalẹm soso o duwu ku no; 32  ọ tẹ nwane rehọ isoja gbe iletu egbaẹmo kugbe oma, a tẹ dhẹ bru rai. Nọ a ruẹ ọnọ o wuzou ogbaẹmo na avọ isoja na, a tẹ siọ Pọl ba ekpe. 33  Koyehọ ọnọ o wuzou ogbaẹmo na ọ tẹ nya te ai oma, o te kru Pọl, ọ tẹ ta nọ a rọ egbregba ivẹ rọ kare iẹe; ọ tẹ nọ re ọ riẹ ohwo nọ ọ rrọ gbe oware nọ o ru. 34  Rekọ ejọ evaọ ogbotu na a be ta ojọ, yọ efa a be ta ofa. Fikinọ ọ be sai kru ẹme ọvo dhobọ họ fiki edo na, ọ tẹ ta kẹ isoja na nọ a rehọ Pọl kpohọ ogba isoja na. 35  Rekọ nọ o te oria nọ a rẹ rọ gadiẹ kpohọ ogba isoja na, isoja na a tẹ wọe fiki ozighi ogbotu na, 36  keme ogbotu ahwo na a je su lele ai, bi bo nọ: “Wha kpei no!” 37  Epanọ a je ti ro su ei ruọ evaọ ogba isoja na, Pọl ọ tẹ nọ ọnọ o wuzou ogbaẹmo na nọ: “Kọ whọ sae kẹ omẹ uvẹ ta ẹme jọ kẹ owhẹ?” Ọ tẹ nọ Pọl nọ: “Whọ sae jẹ Griki? 38  Koyehọ whẹ họ ohwo Ijipti nọ ọ bẹbẹ ahwo họ kpareso egọmeti evaọ oke jọ nọ o vrẹ na ha, ọnọ o su igbulegbu idu ene (4,000) kpobọ udhude na?” 39  Pọl ọ tẹ ta nọ: “Evaọ uzẹme, mẹ yọ ohwo Ju, ọrọ Tasọs evaọ Silisia, ẹwho nọ ahwo kpobi a riẹ. Fikiere mẹ lẹ owhẹ, kẹ omẹ uvẹ re mẹ ta ẹme kẹ ahwo na.” 40  Nọ ọ kẹe uvẹ no, yọ Pọl o dikihẹ oria nọ a rẹ rọ gadiẹ kpohọ ogba isoja na, o te veghe obọ rọ ta kẹ ahwo na nọ a fibo. Nọ a fọ rirẹ no, ọ tẹ be rọ ẹvẹrẹ Hibru ta ẹme kẹ ae, inọ:

Oruvẹ-Obotọ

Hayo “ofẹ unueri.”
Evaọ Griki, “emetẹ nọ e riẹ ọzae he.”
Hayo “ru udu mẹ whrehe?”
Evaọ Griki, “ma te fibo.”
Rri oria Otofa Eme.
Hayo “erao nọ a bru uriohọ họ re azẹ o hwẹ no ai oma.”
Evaọ Griki, por·neiʹa. Rri oria Otofa Eme.
Osoja nọ o wuzou isoja odu ọvo (1,000).