Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 19:1-41

EWARE NỌ E RIẸ EVA

  • Pọl evaọ Ẹfisọs; ejọ e wariẹ họ-ame (1-7)

  • Pọl o je wuhrẹ ahwo (8-10)

  • Ekurẹriẹ enọ i je ru iruẹru-imizi (11-20)

  • Ozighi evaọ Ẹfisọs (21-41)

19  Whaọ nọ Apọlọs ọ jọ Kọrint, Pọl ọ tẹ nya orọ okpa ziọ Ẹfisọs. Ọ jọ etẹe ruẹ ilele jọ  ọ tẹ nọ ae nọ: “Kọ ẹzi ọfuafo o te owhai obọ okenọ wha ro zihe ruọ ilele Jesu?” A tẹ kẹe uyo nọ: “Ma ri yo vievie he inọ ẹzi ọfuafo ọ riẹ.”  Fikiere ọ tẹ nọ ae nọ: “O tẹ rrọ ere, ame-ọhọ vẹ a rọ họ owhai?” A tẹ kuyo nọ: “Ame-ọhọ Jọn.”  Pọl ọ tẹ ta nọ: “Jọn ọ jẹ họ ahwo ame ro dhesẹ nọ a kurẹriẹ no, yọ ọ jẹ ta kẹ ahwo na inọ a fi ẹrọwọ họ ọnọ ọ rrọ emu riẹ nyaze, koyehọ, Jesu.”  Nọ a yo onana, a tẹ họ-ame evaọ odẹ Olori na Jesu.  Nọ Pọl ọ rehọ obọ kpahe ae, ẹzi ọfuafo o te te ai obọ, a te mu evẹrẹ efa họ ẹjẹ jẹ be ruẹaro.  Ahwo na a bu te oware wọhọ ezae ikpegbivẹ.  Evaọ emerae esa soso ọ jẹ hae ruọ uwou-egagọ na jẹ ta ẹme ududu. Ọ jẹ hae kẹ ovuẹ kpahe Uvie Ọghẹnẹ, yọ ọ jẹ rehọ onaa ta ẹme re o sae daruọ ahwo oma.  Rekọ nọ ejọ e jẹ rọwo ẹme na vievie he jẹ be ta eme iyoma kpahe Edhere Na evaọ iraro ogbotu na soso, ọ tẹ nyase ae ba jẹ rehọ ilele na kugbe oma, yọ ọ jẹ hae kẹ ovuẹ kẹdẹ kẹdẹ evaọ ọgwa isukulu Tiranọs. 10  O ru onana ikpe ivẹ soso, u te ru nọ ahwo kpobi nọ a jẹ rria ubrotọ Esia a ro yo ẹme Olori na, te ahwo Ju gbe ahwo Griki. 11  Ọghẹnẹ o te gbe je ru iruo igbunu ilogbo ẹkwoma Pọl, 12  te epanọ a rọ rehọ emehọ gbe eprọno nọ Pọl ọ ba no oma no ro se ahwo nọ a be mọ, eyao rai i te kpo, izi imuomu na i te no ae oma. 13  Rekọ ahwo Ju jọ nọ a je no oria ruọ oria bi le idhivẹri no ahwo oma a jẹ gwọlọ rọ odẹ Olori na Jesu ro le izi imuomu no re; a jẹ ta nọ: “Mẹ be rọ odẹ Jesu ọnọ Pọl o bi whowho na rọ whọku owhẹ.” 14  Whaọ emezae ihrẹ erọ olori izerẹ ahwo Ju nọ a re se Skiva a je ru onana. 15  Rekọ ẹzi omuomu na ọ tẹ ta kẹ ae nọ: “Mẹ riẹ Jesu mẹ tẹ jẹ riẹ Pọl; kọ whai yọ amono?” 16  Koyehọ ọzae nọ ẹzi omuomu na ọ rrọ oma na ọ tẹ họrọ mu ae, mu ae họ ekpe unọjọ utọjọ, ọ tẹ ga obọ vi ae, fikiere a tẹ dhẹ no uwou na ẹbẹba* avọ ela nọ e vọ rae oma. 17  Ahwo kpobi a tẹ te riẹ kpahe onana, te ahwo Ju gbe ahwo Griki nọ a jẹ rria Ẹfisọs; ozọ o tẹ ruọ aikpobi oma, a te je jiri odẹ Olori na Jesu. 18  Yọ ibuobu nọ i zihe ruọ ilele no a jẹ nyaze te feva eware nọ a ru. 19  Evaọ uzẹme, ibuobu nọ i je ru iruẹru emajiki a kwa ebe rai kokohọ a tẹ mahe ae evaọ iraro ahwo kpobi. Nọ a roro unuigho rai kpobi kugbe, i te ewẹ-isiliva idu udhuvẹ gbe ikpe (50,000). 20  Fikiere evaọ edhere ologbo, ẹme Jihova* o te je do ruọ eria kpobi jẹ be kparobọ. 21  Nọ eware nana e vrẹ no, Pọl ọ tẹ jiroro evaọ udu riẹ nọ ọ tẹ nya Masidonia gbe Akeya re no, o re ti kpobọ Jerusalẹm. Ọ ta nọ: “Me te te obei no, me ti te Rom hrọ re.” 22  Fikiere o te vi imava jọ nọ i je fiobọhọ kẹe kpobọ Masidonia, Timoti avọ Ẹrastọs, rekọ ọyomariẹ ọ tẹ gbẹ jọ ubrotọ Esia omoke jọ. 23  Evaọ oke oyena, ukpokpoma ulogbo u te du lahwe rọsuọ Edhere Na.* 24  Keme ọzae jọ nọ a re se Demitriọs, ọnọ ọ jọ odhogu isiliva nọ ọ jẹ hae rọ isiliva ru imiwou ẹdhọ Atẹmis, o je ru enọ e rrọ idhogu isiliva wo igho buobu. 25  O te koko ibe iruiruo riẹ gbe idhogu efa họ ọ tẹ ta nọ: “Ezae, wha riẹ vevẹ nọ okọ nana ma bi wo efe mai no ze. 26  Wha be ruẹ je bi yo epanọ Pọl ọnana ọ rọ bẹbẹ ahwo buobu họ nwene iroro rai no, yọ orọnọ evaọ Ẹfisọs ọvo ho rekọ evaọ enwenọ ubrotọ Esia soso, be ta nọ eghẹnẹ nọ a rọ abọ ma yọ eghẹnẹ vievie he. 27  Ofariẹ, ozọ nọ u bi mu omẹ orọnikọ okọ mai nọ a be te ta eme iyoma kpahe ọvo ho, rekọ inọ a ti gbe se etẹmpol ọghẹnẹ-aye ologbo na Atẹmis gboware ovo ho, yọ a gbẹ te kẹ ọghẹnẹ-aye nana nọ a be gọ evaọ ubrotọ Esia soso gbe evaọ otọakpọ na soso na orro ho.” 28  Nọ a yo onana eva e tẹ dha ae thesiwa, a te muhọ ebo nọ: “Atẹmis ọrọ ahwo Ẹfisọs ọ rrọ ruaro!” 29  Okpẹwho na ọ tẹ jọ zighi zighi, aikpobi a tẹ họrọ ruọ afe-arozaha na ẹsiẹvo, yọ a bi si Geyọs avọ Aristakọs lele oma, enọ e rrọ ahwo Masidonia nọ i je lele Pọl evaọ erẹ riẹ. 30  Whaọ Pọl ọ jẹ gwọlọ nọ ọ rẹ ruọ eva bru ahwo na, rekọ ilele na a rọwo kẹe he. 31  Makọ ejọ evaọ usu enọ i wuzou ehaa gbe arozaha na, nọ e jọ egbẹnyusu riẹ a vi uwou sei be lẹe nọ ọ ruọ evaọ afe-arozaha na ha re ọ siọ uzuazọ riẹ ba efihọ ọza. 32  Ahwo na jọ a bi bo be ta oware jọ yọ efa a be ta ofa; keme ogbotu na ọ jọ zighi zighi, yọ ibuobu rai a riẹ ẹjiroro nọ a ro kokohọ họ. 33  Fikiere a te kru Alẹkzanda no udevie ogbotu na ze, ahwo Ju na a te gele iei kpobọ aro, Alẹkzanda o te veghe obọ be gwọlọ gu ẹkẹ-unu riẹ kẹ ahwo na. 34  Rekọ nọ a vuhu iei nọ ohwo Ju ọ rrọ, aikpobi a tẹ be rọ urru ovo bo evaọ oware wọhọ euwa ivẹ soso inọ: “Atẹmis ọrọ ahwo Ẹfisọs ọ rrọ ruaro!” 35  Nọ osu ẹwho na o ru ogbotu na fibo no ọ tẹ ta nọ: “Ahwo Ẹfisọs, ohwo-akpọ vẹ ọ riẹ hẹ inọ okpẹwho Ẹfisọs họ ọnọ ọ be rẹrote etẹmpol Atẹmis gbe ẹmema nọ o kie no ehru ze na? 36  Nọ orọnọ a rẹ sae vro eware nana ha na, wha rọ udu kpotọ, wha du rọ okpakpa ru oware ovo ho. 37  Whaọ ezae nana nọ wha rọ ze na a tho ekwakwa etẹmpol hayo ta eme iyoma kpahe ọghẹnẹ mai hi. 38  Fikiere otẹrọnọ Demitriọs avọ ibe idhogu riẹ a wo ẹme kugbe ohwo jọ, ma wo edẹ nọ a fihọ nọ a re ro gu ẹdhọ, ma te je wo isu ubrotọ; jọ a tu ohwohwo ẹdhọ ze. 39  Rekọ otẹrọnọ wha be gwọlọ oware ofa jọ nọ u vi onana, evaọ ẹgwae ẹwho a rẹ jọ tae. 40  Keme a rẹ sae rọ fiki oware nọ o via nẹnẹ na ro si uzi mu omai inọ ma be kpareso egọmeti, nọ orọnọ ma rẹ sae ruẹ oware ovo ta nọ oye o wha ozighi nana ze he na.” 41  Nọ ọ ta eme nana no, ọ tẹ ta kẹ ogbotu na nọ a kpo.

Oruvẹ-Obotọ

Ẹme Griki nọ a fa “ẹbẹba” na o sai dhesẹ ohwo nọ ewu otọ-oma ọvo ọ rrọ oma; orọnikọ ohwo nọ ọ nwane bafihọ riẹriẹriẹ ọvo ho.
Rri oria Otofa Eme.
Koyehọ, edhere uzuazọ Ileleikristi gbe iwuhrẹ rai.