Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 17:1-34

EWARE NỌ E RIẸ EVA

  • Pọl avọ Saelas evaọ Tẹsalonika (1-9)

  • Pọl avọ Saelas evaọ Bẹria (10-15)

  • Pọl evaọ Athẹns (16-22a)

  • Ẹme nọ Pọl ọ ta evaọ Areopagọs na (22b-34)

17  A tẹ nya Amfipọlis avọ Apolonia vrẹ, a te te Tẹsalonika, oria nọ uwou-egagọ ahwo Ju o jọ.  Wọhọ epaọ uruemu Pọl, ọ tẹ ruọ evaọ uwou-egagọ na, yọ evaọ ẹdijala esa ọ jẹ rọ Ikereakere na lele ai jiroro,  jẹ rọ eware nọ a kere fihọ otọ dhesẹ vevẹ jẹ kẹ imuẹro inọ u fo re Kristi na ọ ruẹ uye jẹ kparoma no uwhu ze, be ta nọ: “Ọnana họ Kristi na, Jesu nana nọ me bi whowho kẹ owhai na.”  Fikiere ejọ rai a te zihe ruọ ilele Jesu, a te kuomagbe Pọl avọ Saelas, yọ ere ogbotu buobu ọrọ ahwo Griki nọ a jẹ gọ Ọghẹnẹ a ru re gbe ibuobu eyae jọ nọ e viodẹ.  Rekọ fiki ihri-eriọ, ahwo Ju na a te koko ezae imuomu jọ nọ i je ghoro evaọ oria eki na họ, a tẹ wọ wọhọ otu-ugbarugba, wha ozighi fihọ ẹwho na soso. A tẹ vẹruọ uwou Jesin be gwọlọ Pọl avọ Saelas re a rehọ ae ziọ otafe kẹ otu-ugbarugba na.  Nọ a ruẹ e rai hi, a te si Jesin avọ inievo na jọ bru isu ẹwho na, be ta nọ: “Ezae nana nọ e gale otọakpọ na soso uzou vi* no na a ziọ obonẹ no re,  yọ Jesin o dede i rai rehọ fihọ uwou riẹ. Ezae nana kpobi a be wọso izi Siza, be ta nọ ovie ọfa jọ ọ riẹ, Jesu.”  Nọ ogbotu na avọ isu ẹwho na a yo onana, ozọ u te mu ai;  nọ Jesin avọ inievo edekọ na a hwa igho nọ a bru kẹ ae no, a te siobọno ai. 10  Nọ aso ọ nwani te, inievo na a te vi Pọl avọ Saelas kpobọ Bẹria. Nọ a te obei, a tẹ ruọ evaọ uwou-egagọ ahwo Ju. 11  Whaọ ahwo Ju nọ a rrọ Bẹria a wo emamọ eva vi enọ e rrọ Tẹsalonika, keme a rọ osegboja ọgaga dede ẹme na rehọ, be romatotọ kiẹ Ikereakere na riwi kẹdẹ kẹdẹ re a ruẹ sọ ere eware na e ginẹ rrọ. 12  Fikiere ibuobu rai i te zihe ruọ ilele, yọ ere ibuobu eyae Griki nọ e viodẹ gbe ezae Griki jọ nọ e viodẹ a ru re. 13  Rekọ nọ ahwo Ju erọ obọ Tẹsalonika a yo nọ Pọl ọ be jọ Bẹria whowho ẹme Ọghẹnẹ re, a tẹ nyaze te bẹbẹ ogbotu na họ ru ozighi. 14  Inievo na a tẹ nwani su Pọl vrẹ kpobọ abade na, rekọ Saelas avọ Timoti a tẹ gbẹ daji. 15  Rekọ enọ i je su Pọl na a lele i rie te obọ Athẹns, nọ Pọl ọ vuẹ ae no inọ a ta kẹ Saelas avọ Timoti re a nya bru rie ze vẹrẹ vẹrẹ, a te zihe. 16  Whaọ nọ Pọl ọ jẹ hẹrẹ ae evaọ Athẹns, o tẹ jẹ kẹe uye gaga nọ ọ ruẹ nọ emedhọ e vọ ẹwho na. 17  Fikiere ọ tẹ jẹ jọ uwou-egagọ na rehọ ẹme Ọghẹnẹ lele ahwo Ju na gbe amọfa nọ a be gọ Ọghẹnẹ jiroro, yọ o je ru epọvo na re kẹdẹ kẹdẹ evaọ oria eki na kugbe enọ ọ ruẹ kpobi. 18  Rekọ otu Ẹpikurọs jọ gbe egba-eriariẹ Stoik jọ a te je lele iei vravro, yọ ejọ e jẹ ta nọ: “Eme ọnana nọ o re gu ọriọriọ na ọ gwọlọ ta?” Efa e vẹ be ta nọ: “O wọhọ nọ ọ be ta kpahe eghẹnẹ jọ nọ ma riẹ hẹ.” A jẹ ta ere keme o je whowho usi uwoma kpahe Jesu gbe ẹkparomatha na. 19  Fikiere a te kru rie a tẹ rehọ iẹe kpohọ Areopagọs* na, be ta nọ: “Kọ whọ sai ru omai riẹ otọ uwuhrẹ okpokpọ nana nọ whọ be ta kpahe na? 20  Keme whọ be ta kpahe eware jọ nọ ma ri yo ẹdẹvo ho, yọ ma gwọlọ riẹ otọ eware nana.” 21  Evaọ uzẹme, ahwo Athẹns kpobi gbe erara nọ e be rria etẹe a rẹ rehọ oke eriosehọ rai ru oware ofa ha ajokpaọ iku nọ a re gbe kpahe oware okpokpọ jọ hayo gaviezọ kẹ oware okpokpọ jọ. 22  Pọl o te dikihẹ udevie Areopagọs na ọ tẹ ta nọ: “Whai ahwo Athẹns, mẹ ruẹ nọ evaọ eware kpobi wha wo ozodhẹ eghẹnẹ na vi amọfa. 23  Wọhọ oriruo, nọ mẹ jẹ nya evaọ ẹwho na, mẹ jẹ romatotọ muẹrohọ eware nọ wha be gọ, mẹ ruẹ agbada-idhe jọ dede nọ a kere fihọ nọ ‘Rọkẹ Ọghẹnẹ nọ A Riẹ Hẹ.’ Fikiere, ọnọ wha be gọ nọ wha riẹ hẹ na, ọye me bi whowho kẹ owhai na. 24  Ọghẹnẹ nọ ọ ma akpọ na gbe eware kpobi nọ e rrọ eva riẹ, ọye họ Olori odhiwu gbe otọakpọ na, fikiere ọ rẹ rria etẹmpol nọ a rọ abọ bọ họ; 25  yọ o du gwọlọ obufihọ ahwo-akpọ họ wọhọ ẹsenọ oware jọ o kare iẹe, keme ọye ọ be kẹ ahwo kpobi uzuazọ gbe ẹwẹ gbe eware kpobi. 26  Ọ ma ahwo erẹwho na kpobi no oma ọzae ọvo ze re a rria otọakpọ na soso, yọ o fi oke sa-sa họ gbe umuo oria nọ ahwo a rẹ rria, 27  re a ruẹse gwọlọ Ọghẹnẹ, a tẹ gwọlọ iẹe ziezi a rẹ ginẹ ruẹ e riẹ, keme o thabọ no omai omomọvo ho. 28  Keme ẹkwoma riẹ ma ro wo uzuazọ, be nya jẹ be rria, nwane wọhọ epanọ eketa obọrai jọ a ta inọ, ‘Keme mai yọ emọ riẹ re.’ 29  “Fikiere, nọ orọnọ mai yọ emọ Ọghẹnẹ na, u fo ho re ma roro nọ Ọghẹnẹ ọ wọhọ igoru hayo isiliva hayo utho, wọhọ oware nọ ahwo-akpọ a rehọ iroro obọrai gbe onaa ro ru. 30  Uzẹme, Ọghẹnẹ ọ kpairoro vrẹ oke ogbori yena no; rekọ enẹna ọ be ta kẹ ahwo kpobi evaọ oria kpobi nọ a kurẹriẹ. 31  Keme o fi ẹdẹ họ no nọ o ti ro bruoziẹ akpọ na soso evaọ ẹrẹreokie ẹkwoma ohwo nọ o ro mu no, yọ ọ kẹ ahwo kpobi imuẹro no ẹkwoma uwhu nọ ọ kpare riẹ no ze.” 32  Whaọ nọ a yo ẹme ẹkparomatha enọ i whu no, ejọ i te mu ẹkoko họ ese, efa e tẹ ta nọ: “Ma te wariẹ yo mi owhẹ kpahe onana oke ofa.” 33  Fikiere Pọl ọ tẹ nyase ae ba, 34  rekọ ezae jọ a te kuomagbei a te zihe ruọ ilele. Ejọ rai họ Diọnisiọs, ọnọ ọ jọ obruoziẹ evaọ okọto Areopagọs na, gbe aye jọ nọ a re se Damaris, gbe amọfa.

Oruvẹ-Obotọ

Hayo “wha ozighi fihọ otọakpọ na soso.”
Ukpehru jọ evaọ Athẹns anwae nọ okọto ukpehru na o jẹ hai kokohọ re.