Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 16:1-40

EWARE NỌ E RIẸ EVA

  • Pọl ọ salọ Timoti (1-5)

  • Ọ ruẹ ọzae Masidonia evaọ eruẹaruẹ (6-10)

  • Lidia o kurẹriẹ evaọ Filipai (11-15)

  • A fi Pọl avọ Saelas họ uwou-odi (16-24)

  • Oriekarọ avọ ahwo uwou riẹ a họ-ame (25-34)

  • Pọl ọ ta nọ isu na a re wounu kẹ ae (35-40)

16  Kẹsena Pọl o te te Dẹbi je te Listra. Whaọ olele jọ nọ a re se Timoti ọ jọ etẹe, ọmọzae aye Ju jọ nọ ọ rrọ Oleleikristi rekọ ọsẹ riẹ ohwo Griki,  yọ inievo nọ e rrọ Listra gbe Aikoniọm a ta emamọ ẹme kpahe iẹe.  Pọl ọ tẹ ta nọ ọ gwọlọ nọ Timoti o lele iei, ọ tẹ rehọ iẹe ọ tẹ yawo iẹe fiki ahwo Ju nọ a jọ eria nọ a be te nya na, keme aikpobi a riẹ nọ ọsẹ riẹ yọ ohwo Griki.  Nọ a bi no ewho ruọ ewho na, yọ a be vuẹ inievo nọ e rrọ etẹe izi nọ ikọ na gbe ekpako na evaọ obọ Jerusalẹm a rọwo fihọ na re a koko ai.  Fikiere ikoko na e tẹ jọ gaga evaọ ẹrọwọ na je bi vihọ no ẹdẹ te ẹdẹ.  Ofariẹ, a nya orọ Frijia gbe ewho Galesha, keme ẹzi ọfuafo na ọ whaha e rai inọ a ta ẹme na evaọ ubrotọ Esia ha.  Whaọ nọ a te Misia, a tẹ daoma epanọ a re ro kpohọ Bithinia, rekọ ẹzi Jesu ọ kẹ rai uvẹ hẹ.  Fikiere a tẹ nya Misia vrẹ a te kpohọ Troas.  Evaọ aso Pọl ọ tẹ ruẹ eruẹaruẹ jọ, ọzae Masidonia jọ o dikihẹ etẹe jẹ lẹe inọ: “Nyaze obọ Masidonia re who fiobọhọ kẹ omai.” 10  Nọ ọ nwane ruẹ eruẹaruẹ na no, ma tẹ wọ re ma kpohọ Masidonia, keme ma rehọ e riẹ nọ Ọghẹnẹ o se omai no re ma whowho usi uwoma na kẹ ae. 11  Fikiere ma tẹ ruọ okọ no Troas, ma te kpohọ Samọthrasi ovavo, rekọ okiokiọ riẹ ma te kpohọ Neapọlis; 12  ma te no etẹe kpohọ Filipai, nọ o rrọ otọ esuo Rom, onọ o rrọ okpẹwho nọ o mae viodẹ evaọ ubrotọ Masidonia. Ma jọ okpẹwho nana evaọ edẹ jọ. 13  Evaọ ẹdẹ Ẹdijala ma te kpohọ otafe okpẹwho na kẹle ethẹ jọ, oria nọ ma roro nọ ahwo a re kokohọ jọ lẹ, ma tẹ keria je mu usi uwoma họ ẹta kẹ eyae nọ i kokohọ etẹe. 14  Aye jọ nọ a re se Lidia, nọ ọ rẹ zẹ ehọ ogorurẹ, nọ o no ẹwho Thiatira ze jẹ be gọ Ọghẹnẹ, ọ jẹ gaviezọ, Jihova* o te rovie udu riẹ ziezi re ọ jẹ eme nọ Pọl ọ jẹ ta na rehọ. 15  Whaọ nọ tei te ahwo uwou riẹ a họ-ame no, ọ tẹ lẹ omai nọ: “Wha te rri nọ mẹ be gọ Jihova* ziezi, wha nyaze te jọ uwou mẹ.” Ọ tẹzẹ omai te epanọ ma rọ nya. 16  Whaọ ẹdẹjọ nọ ma je kpohọ oria olẹ na, odibo-ọmọtẹ jọ nọ o wo ẹzi idhivẹri nọ ọ jẹ kẹe ẹgba aruọruẹ ọ tẹ nyaku omai. Ọ jẹ hae rọ iruẹru ẹvaọgba riẹ rọ kọ igho buobu kẹ ilori riẹ. 17  Ọmọtẹ nana o te je lele Pọl gbe omai yọ ọ be rọ urru oruarua ta nọ: “Ezae nana yọ idibo Ọghẹnẹ nọ Ọ Mai Kpehru na, yọ a bi whowho edhere esiwo kẹ owhai.” 18  O je ru onana edẹ buobu. Uwhremu na o tẹ vẹso Pọl no, o te kuomarẹriẹ ọ tẹ ta kẹ idhivẹri na nọ: “Mẹ rehọ odẹ Jesu Kristi ta kẹ owhẹ nọ noi oma no.” O te noi oma no evaọ auwa yena. 19  Nọ ilori riẹ a ruẹ nọ oware nọ o jẹ wha ugho se ai o gbẹ riẹ hẹ, a te kru Pọl avọ Saelas a te si rai kpohọ oria eki na bru isu na. 20  Nọ a rehọ ai bru isu ẹwho na no, a tẹ ta nọ: “Ezae nana a be wha ozighi fihọ ẹwho mai na gaga. Ahwo Ju a rrọ, 21  yọ a bi whowho iruemu nọ i fo kẹ omai nọ ma re lele hayo koko ho, nọ orọnọ mai yọ ahwo Rom na.” 22  Ogbotu na kpobi a tẹ wọ ruru ai, isu ẹwho na a tẹ ta kẹ ahwo nọ a bẹre iwu rai no ai oma jẹ rọ ekpọ fa ae. 23  Nọ a fa ae gaga no, a te fi ai họ uwou-odi jẹ vẹvẹ oriekarọ na unu inọ o rou* rai ziezi. 24  Fikinọ a vẹvẹ e riẹ unu gaga, o te fi ai họ uwou-odi obeva kpobi jẹ kare awọ rai fihọ ekarọ.* 25  Rekọ evaọ ubrobọ udevie aso, Pọl avọ Saelas a tẹ jẹ lẹ jẹ be so ile ro jiri Ọghẹnẹ, ahwo uwou-odi na a jẹ gaviezọ kẹ ae. 26  Idudhe na, otọ u te nuhu gaga, otọhotọ uwou-odi na u te nuhu. Ofariẹ, ethẹ na kpobi e tẹ nwani rovie fihọ, eware nọ a rọ kare ahwo na kpobi e tẹ sawo no. 27  Nọ oriekarọ na o jojo no owezẹ ze jẹ ruẹ nọ ethẹ uwou-odi na i rovie fihọ, o te wolo ọgbọdọ riẹ be gwọlọ kpe omariẹ no, keme o roro nọ ahwo uwou-odi na a dhẹ no. 28  Rekọ Pọl ọ tẹ rọ urru oruarua ta kẹe nọ: “Who kpe omara ha keme mai kpobi ma rrọ etenẹ!” 29  Ọ tẹ ta nọ a rọ ikpẹ sei, ọ tẹ dhẹ ruọ evaọ uwou-odi na bi nuhu avọ ozọ, o te kigwẹ fihọ aro Pọl avọ Saelas. 30  Ọ tẹ rehọ ae ruọ otafe ọ tẹ ta nọ: “Eme me re ru hrọ re mẹ sai wo esiwo?” 31  A tẹ ta nọ: “Fi ẹrọwọ họ Olori na Jesu, who ti wo esiwo, te owhẹ te ahwo uwou ra.” 32  Kẹsena a tẹ ta ẹme Jihova* kẹe avọ ahwo uwou riẹ kpobi. 33  Ọ tẹ rehọ ae vrẹ evaọ aso yena jẹ rẹrote emela rai. Tei te ahwo uwou riẹ kpobi a tẹ họ-ame ababọ oke oraha. 34  Ọ tẹ rehọ ae ziọ uwou riẹ jẹ wọ emu fihọ emẹjẹ kẹ ae, ọyomariẹ avọ ahwo uwou riẹ kpobi a tẹ ghọghọ gaga fikinọ o fi ẹrọwọ họ Ọghẹnẹ no. 35  Nọ oke o ke no, isu ẹwho na a te vi elakpa nyae ta nọ: “Siobọno ezae na.” 36  Oriekarọ na ọ tẹ vuẹ Pọl uwou na inọ: “Isu ẹwho na a vi ahwo ze inọ a siobọno owhai imava na. Fikiere wha ruọ otafe re wha nyavrẹ tou.” 37  Rekọ Pọl ọ tẹ ta kẹ ae nọ: “A fa omai evaọ ẹgbede dede nọ ma reabe he,* yọ mai ahwo Rom, a te fi omai họ uwou-odi. Kọ a be gwọlọ lẹlẹ siobọno omai? Ijo! Jọ ae ọvo a nyaze re a su omai ruọ otafe.” 38  Elakpa na a tẹ ta eme nana kẹ isu ẹwho na. Nọ a yo nọ ezae nana yọ ahwo Rom, ozọ u te mu ai. 39  Fikiere a tẹ nyaze, a te wounu kẹ ae, nọ a su ai ruọ otafe no, a tẹ lẹ ae nọ a no ẹwho na. 40  Rekọ nọ a no uwou-odi na ze no, a te kpobọ uwou Lidia; nọ a ruẹ inievo na, a tẹ tuduhọ ae awọ, a tẹ nyavrẹ.

Oruvẹ-Obotọ

Rri oria Otofa Eme.
Rri oria Otofa Eme.
Hayo “rroro.”
Ẹwẹ-akpala nọ o wo ighogho nọ a jẹ hae rọ lahiẹ ahwo, onọ a re dhe abọ gbe awọ ohwo fihọ, a vẹ kare ae dhe etẹe.
Rri oria Otofa Eme.
Hayo “ababọ ẹdhọ nọ a rọ omai gu.”