Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Iruẹru 13:1-52

EWARE NỌ E RIẸ EVA

  • A vi Banabas avọ Sọl re a jọ imishọnare (1-3)

  • A ta usi uwoma evaọ Saiprọs (4-12)

  • Ẹme nọ Pọl ọ ta evaọ Antiọk nọ ọ rrọ Pisidia (13-41)

  • A nya bru ahwo erẹwho na wọhọ epanọ a ruẹaro fihọ otọ (42-52)

13  Whaọ eruẹaro gbe iwuhrẹ a jọ ukoko nọ o jọ Antiọk: Banabas, Simiọn nọ a je se Naija, Lusiọs ọrọ Sairini, Manaen ọnọ avọ Herọd osu ubrotọ na a gbe kpohọ isukulu, gbe Sọl.  Epanọ a jẹ rọ gọ Jihova* jẹ be siọ emuọriọ ba na, ẹzi ọfuafo na ọ tẹ vuẹ ae nọ: “Wha siobọno Banabas avọ Sọl kẹ omẹ rọkẹ iruo nọ me se rai kẹ.”  Kẹsena nọ a siọ emuọriọ ba jẹ lẹ no, a tẹ rọ abọ kpahe ae uzou, a te vi ae vrẹ.  Ezae nana nọ ẹzi ọfuafo na o vi na a te kpobọ Sẹlusia, a te no etẹe ruọ okọ kpohọ Saiprọs.  Nọ a te Salamis, a te mu ẹme Ọghẹnẹ họ ewhowho evaọ iwou-egagọ ahwo Ju. Jọn ọ jọ kugbe ae re nọ o je fiobọhọ.  Nọ a nya ukoliko na soso duwu rite obọ Pafọs no, a tẹ nyaku ọzae Ju jọ nọ a re se Ba-Jizọs, ọnọ ọ jọ ọgbẹva gbe ọruẹaro ọrue.  O je ru iruo kẹ Sẹjiọs Pọlọs osu ubrotọ na, ọzae nọ o wo eriariẹ ziezi. Ọzae nana o te se Banabas avọ Sọl keme o jariẹ oja gaga nọ o re yo ẹme Ọghẹnẹ.  Rekọ Ẹlimas* ọgbẹva na, (keme otofa Ẹlimas oye) ọ tẹ jẹ wọso ae, jẹ daoma whaha osu ubrotọ na re ọ siọ ẹrọwọ ba efihọ Olori na.  Sọl, ọnọ a re je se Pọl, avọ ẹzi ọfuafo nọ ọ vọ riẹ oma o te rri rie kiọkiọkiọ 10  jẹ ta nọ: “O ọzae nọ oghẹrẹ ewhariọ kpobi gbe oghẹrẹ eyoma kpobi e vọ oma, whẹ ọmọ Ẹdhọ, whẹ ọwegrẹ oware kpobi nọ u kiẹrẹe, kọ whọ gbẹ siọ idhere egbagba Jihova* ba ẹraha? 11  Rri! Obọ Jihova* u mu owhẹ no, who ti tuaro, whọ te ruẹ elo ọre na evaọ omoke jọ họ.” Ẹsiẹvo na ẹgho avọ ebi ọlala i te ruru ei, ọ tẹ be nya wariẹ be gwọlọ ohwo nọ o re kru rie obọ re a su ei. 12  Nọ osu ubrotọ na ọ ruẹ oware nọ o via na, o te zihe ruọ olele Jesu, keme eware nọ o wuhrẹ kpahe Jihova* i gbe rie unu. 13  Pọl avọ egbẹnya riẹ a tẹ jọ Pafọs ruọ okọ, a te te Pẹga nọ ọ rrọ Pamfilia. Rekọ Jọn ọ tẹ nyase ae ba o te zihe kpohọ Jerusalẹm. 14  Rekọ ae omarai a te no Pẹga ziọ Antiọk nọ ọ rrọ Pisidia. Nọ a ruọ uwou-egagọ na evaọ ẹdẹ Ẹdijala, a tẹ keria. 15  Nọ isase ẹgbede orọ Uzi na gbe ebe Eruẹaro na i kuhọ no, enọ i wuzou evaọ uwou-egagọ na a te vi ahwo bru ai inọ: “Ezae, inievo, otẹrọnọ wha wo ẹme uduotahawọ jọ kẹ ahwo na, wha tae.” 16  Fikiere Pọl ọ tẹ kpama, nọ o veghe obọ riẹ, ọ tẹ ta nọ: “Whai ahwo Izrẹl gbe amọfa nọ a be dhozọ Ọghẹnẹ, wha gaviezọ. 17  Ọghẹnẹ ahwo Izrẹl ọ salọ esẹ-ode mai, yọ ọ kpare rai kpehru okenọ a jọ erara evaọ otọ Ijipti, ọ tẹ rehọ ai no eva riẹ ze avọ ogaga ulogbo.* 18  Yọ evaọ etoke oware wọhọ ikpe udhuvẹ, o thihakọ kẹ ai evaọ udhude na. 19  Nọ ọ raha erẹwho ihrẹ no evaọ ẹkwotọ Kenan, ọ tẹ rehọ otọ rai kẹ ae wọhọ ukuoriọ. 20  Eware yena kpobi e via evaọ oware wọhọ ikpe egba ene gbe udhuvẹ gbe ikpe (450). “Nọ onana o vrẹ no ọ tẹ kẹ ae ibruoziẹ ri bọo oke Samuẹle ọruẹaro na. 21  Kẹsena a tẹ yare nọ a gwọlọ ovie, Ọghẹnẹ ọ tẹ kẹ ae Sọl ọmọ Kish, ohwo orua Bẹnjamin, ọnọ o su rai ikpe udhuvẹ. 22  Nọ Ọghẹnẹ o si ei no ovie no, ọ tẹ rehọ Devidi mu ovie kẹ ae, ọnọ ọ ta kpahe nọ: ‘Mẹ ruẹ Devidi ọmọ Jẹsi no, ọzae nọ o kiehọ udu mẹ; o ti ru eware kpobi nọ mẹ gwọlọ.’ 23  Wọhọ epaọ eyaa Ọghẹnẹ, ọ kẹ Izrẹl osiwi no, Jesu, ọnọ o no uyẹ ọzae nana ze. 24  Taure ọyena ọ tẹ te romavia, Jọn ọ jọ ẹgbede whowho kẹ ahwo Izrẹl kpobi inọ a họ-ame ro dhesẹ ekurẹriẹ rai via. 25  Rekọ evaọ obọ ekuhọ iruo Jọn, Jọn ọ jẹ ta nọ: ‘Ono wha roro nọ mẹ rrọ? Mẹ họ ọye he. Rekọ rri! Ọjọ ọ rrọ emu mẹ nyaze nọ me te epanọ mẹ sae rọ ra ifi eviẹ riẹ hẹ.’ 26  “Whai ahwo, inievo, whai emọ uyẹ Abraham gbe amọfa nọ a rrọ udevie rai nọ e be dhozọ Ọghẹnẹ, a vi ovuẹ esiwo nana se omai no. 27  Ahwo nọ a be rria Jerusalẹm gbe isu rai a vuhu ọnana ha, rekọ, okenọ a je gu ei ẹdhọ, a ru eware nọ Eruẹaro na a ta gba, enọ a be hai se do via evaọ ẹdijala kpobi. 28  Dede nọ a jọ oma riẹ ruẹ oware nọ o ro fo uwhu hu, a tẹ ta kẹ Pailet nọ a gwọlọ nọ a kpei no. 29  Nọ a ru eware kpobi nọ a kere kpahe iẹe gba no, a tẹ rehọ iẹe no ure na ziọ otọ jẹ wọe fihọ uki.* 30  Rekọ Ọghẹnẹ ọ kpare riẹ no uwhu ze, 31  yọ evaọ edẹ buobu o dhesẹ oma via kẹ enọ i lele i rie no Galili kpohọ Jerusalẹm. Enana họ enọ i bi se isẹri kpahe iẹe kẹ ahwo na. 32  “Fikiere ma be vuẹ owhai usi uwoma orọ eyaa nọ a ya kẹ esẹ-ode na. 33  Ọghẹnẹ o ru eware nana kpobi gba kẹ omai emọ rai ẹkwoma Jesu nọ ọ kpare no uwhu ze; wọhọ epanọ a kere fihọ olezi avọ ivẹ na inọ: ‘Whẹ yọ ọmọ mẹ; me zihe ruọ ọsẹ ra no nẹnẹ.’ 34  Yọ ọ rehọ ẹkwoma ẹme nọ ọ ta ro ru onana vẹ inọ ọ kpare riẹ no uwhu ze re o gbe whu ofa ha, Ọ ta nọ: ‘Mẹ te kẹ owhai eware nọ mẹ rọ fiki uyoyou nọ o rẹ hiẹ hẹ ya eyaa rai kẹ Devidi na. Eyaa nọ a re fievahọ.’* 35  Fikiere ọ tẹ jọ oria ofa jọ evaọ ilezi na ta nọ: ‘Whọ te kuvẹ re ugboma odibo ra u gbo ho.’ 36  Whaọ, Devidi ọ gọ Ọghẹnẹ evaọ etoke riẹ, o te ti whu,* a te ki ei kugbe esẹ-ode riẹ, ugboma riẹ u te gbo. 37  Rekọ, ọnọ Ọghẹnẹ ọ kpare no uwhu ze na, ugboma riẹ u gbo ho. 38  “Fikiere, jọ wha riẹ onana inievo inọ ma bi whowho kẹ owhai nọ ẹkwoma ohwo nana a sai ro wo erọvrẹ izieraha, 39  yọ evaọ eware kpobi nọ Uzi Mosis na o sai jo ru owhai kiẹrẹe he, ohwo kpobi nọ o fi ẹrọwọ họ ọnana a re rri rie kiẹrẹe. 40  Fikiere, wha yọroma re eme nana nọ e rrọ ebe Eruẹaro na e gbẹ via kẹ owhai hi: 41  ‘Wha rri rie, whai otu ọjẹfiẹ, jọ u gbe owhai unu, je whu no, keme me bi ru iruo jọ evaọ edẹ rai, iruo nọ wha te rọwo vievie he nọ ohwo jọ ọ tẹ make rọ unu kotọ gbiku riẹ kẹ owhai.’” 42  Whaọ nọ a jẹ nyavrẹ, ahwo na a tẹ be lẹ ae nọ a wariẹ ta kpahe eme nana evaọ Ẹdijala nọ ọ be tha. 43  Fikiere nọ egagọ e fa no evaọ uwou-egagọ na, ibuobu ahwo Ju na gbe enọ i kurẹriẹ ziọ egagọ ahwo Ju nọ e be gọ Ọghẹnẹ a te lele Pọl avọ Banabas, enọ e jẹ rọ eme rai tuduhọ ae awọ inọ a daji uwowou ulogbo Ọghẹnẹ. 44  Ẹdijala nọ o lele i rie, enwenọ ahwo ẹwho na kpobi a kokohọ re a yo ẹme Jihova.* 45  Nọ ahwo Ju na a ruẹ ogbotu na, a tẹ vọ avọ ihri-eriọ a tẹ jẹ ta ẹme wọso eme nọ Pọl ọ jẹ ta. 46  Kẹsena Pọl avọ Banabas a tẹ ta kẹ ae ududu nọ: “O roja inọ whai a rẹ kake ta ẹme Ọghẹnẹ kẹ. Nọ wha be se iẹe je bi rri omarai nọ wha fo kẹ uzuazọ ebẹdẹ bẹdẹ hẹ na, rri! ma be nya bru ahwo erẹwho na. 47  Keme Jihova* ọ rehọ eme nana jie uzi kẹ omai inọ: ‘Mẹ rehọ owhẹ mu no wọhọ elo erẹwho na, re who whowho ovuẹ esiwo rite ọnyaba otọakpọ na.’” 48  Nọ ahwo erẹwho na a yo onana, a te muhọ ẹghọghọ je bi jiri ẹme Jihova,* yọ ahwo kpobi nọ a wo emamọ eva nọ e gwọlọ uzuazọ ebẹdẹ bẹdẹ a te zihe ruọ ilele Jesu. 49  Ofariẹ, a je whowho ẹme Jihova* evaọ orẹwho na soso. 50  Rekọ ahwo Ju na a tẹ lẹliẹ eyae nọ e viodẹ nọ e be dhozọ Ọghẹnẹ gbe ezae ẹwho na nọ a riẹ odẹ họ, a te ru nọ a rọ kpareso Pọl avọ Banabas, a te le ai no ẹwho rai. 51  Pọl avọ Banabas a te nuhu ovu no awọ rai,* a te kpohọ Aikoniọm. 52  Yọ ilele na a vọ avọ oghọghọ gbe ẹzi ọfuafo ẹsikpobi.

Oruvẹ-Obotọ

Rri oria Otofa Eme.
Ohwo nana a se Ba-Jizọs evaọ owọ avọ 6 na.
Rri oria Otofa Eme.
Rri oria Otofa Eme.
Rri oria Otofa Eme.
Evaọ Griki, “avọ obọ nọ ọ kpare kpehru.”
Hayo “uki ekareghẹhọ.”
Hayo “enọ i muẹro; erọ uzẹme.”
Evaọ Griki, “kie ruọ owezẹ uwhu.”
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.
Ohwo o re nuhu ovu no awọ ro dhesẹ inọ azẹ ohwo ọ rrọ uzou riẹ hẹ.