Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Filimọn 1:1-25

EWARE NỌ E RIẸ EVA

  • Uyere (1-3)

  • Uyoyou gbe ẹrọwọ Filimọn (4-7)

  • Ayare Pọl fiki Onẹsimọs (8-22)

  • Uyere urere (23-25)

1  Mẹ Pọl, ọnọ ọ rrọ uwou-odi fiki Kristi Jesu, gbe Timoti oniọvo mai, ro se Filimọn ibe oruiruo oyoyou mai,  gbe Afia oniọvo-ọmọtẹ mai, gbe Akipọs ọnọ ọ rrọ osoja Kristi re, gbe ukoko nọ o rrọ uwou ra:  Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.  Me re yere Ọghẹnẹ mẹ ẹsikpobi nọ mẹ tẹ be fodẹ owhẹ evaọ elẹ mẹ,  nọ me bi yo kpahe ẹrọwọ rai gbe uyoyou nọ who wo kẹ Olori na Jesu gbe erezi na kpobi.  Mẹ be lẹ nọ ẹrọwọ ra nọ who bi dhesẹ via kẹ amọfa na u ru owhẹ jẹ eware iwoma kpobi nọ ma rọ ẹkwoma Kristi wo rehọ.  Keme me wo oghọghọ gbe omosasọ gaga nọ me yo kpahe uyoyou ra, oniọvo mẹ, whọ be wha omosasọ se erezi na.  Fiki onana, dede nọ me wo udu wọhọ ukọ Kristi nọ mẹ sae rọ ta oware nọ u fo nọ who re ru kẹ owhẹ,  mẹ be lẹ owhẹ fiki uyoyou, keme whọ riẹ nọ mẹ Pọl mẹ kpako no, ẹhẹ, mẹ tẹ jẹ rrọ uwou-odi enẹna fiki Kristi Jesu. 10  Mẹ be lẹ owhẹ kẹ ọmọ mẹ, Onẹsimọs, ọnọ me zihe ruọ ọsẹ kẹ evaọ uwou-odi. 11  Evaọ oke ọsosuọ, o wo iruo kẹ owhẹ hẹ, rekọ enẹna o wo iruo kẹ owhẹ gbe omẹ. 12  Me bi vi ei zihe bru owhẹ ze, ẹhẹ, ọnọ me you gaga na. 13  Mẹ hae gwọlọ nọ ọ gbẹ jọ obonẹ kugbe omẹ re ọ gbodibo nọ whọ hae gba kẹ omẹ evaọ uwou-odi nọ mẹ rrọ fiki usi uwoma na. 14  Rekọ mẹ gwọlọ ru oware ovo ababọ ra nọ ọ rẹ rọwo fihọ iẹe he, re oware uwoma nọ who bi ru o gbẹ jọ orọ ọgbahọ họ, rekọ onọ u no owhẹ eva ze. 15  Ẹsejọhọ fiki onana ọ rọ dhẹ siọ owhẹ ba evaọ ubroke na,* re whọ ruẹsi woi zihe bẹdẹ bẹdẹ, 16  orọnikọ wọhọ ọrigbo ho, rekọ ọnọ o vi ọrigbo, wọhọ oniọvo oyoyou, maero rọkẹ omẹ, rekọ o tubẹ mae rrọ ere kẹ owhẹ keme ọ rrọ ọrigbo kẹ owhẹ gbe oniọvo evaọ Olori na. 17  Fikiere, otẹrọnọ whọ rehọ omẹ nọ mẹ ogbẹnyusu ra, dede iei rehọ sasasa epanọ whọ hai dede omẹ rehọ. 18  U te no ere no, otẹrọnọ o ru owhẹ oware jọ thọ hayo ọ reosa ra jọ, fi ei họ omẹ uzou. 19  Mẹ Pọl mẹ be rọ obọ mẹ kere onana: Mẹ te hwae zihe kẹ owhẹ—me bi du ta dede he inọ whọ reosa mẹ re. 20  Ẹhẹ, oniọvo, fi obọ nana họ kẹ omẹ fiki Olori na; ru udu mẹ sasa nọ orọnọ whẹ yọ odibo Kristi na. 21  U mu omẹ ẹro nọ who ti ru epanọ mẹ ta na, fikiere me bi kere se owhẹ keme mẹ riẹ nọ who ti ru vi onọ mẹ yare na dede. 22  U te no ere no, ruẹrẹ oria fihọ nọ me ti wohọ, keme me bi rẹro nọ fiki elẹ rai, a ti siobọno omẹ zihe bru owhai ze.* 23  Ẹpafras nọ ma gbẹ rrọ uwou-odi fiki Kristi Jesu o bi yere owhẹ, 24  yọ Mak, Aristakọs, Dimas, gbe Luk, ibe iruiruo mẹ a bi yere owhẹ re. 25  Jọ Olori na Jesu Kristi o dhesẹ uwowou ulogbo riẹ kẹ owhai nọ wha bi dhesẹ emamọ ẹzi na.

Oruvẹ-Obotọ

Evaọ Griki, “evaọ auwa ọvo.”
Hayo “siobọno omẹ kẹ owhai.”