Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Kọlọsi 3:1-25

EWARE NỌ E RIẸ EVA

  • Uruemu anwae gbe uruemu okpokpọ na (1-17)

    • Kpe isiuru ugboma na no (5)

    • Uyoyou o rẹ wha okugbe ọkpekpe ze (14)

  • Ohrẹ kẹ iviuwou Ileleikristi (18-25)

3  Rekọ otẹrọnọ a kpare owhai ze kugbe Kristi, wha gbẹ hae gwọlọ eware nọ e rrọ obọ odhiwu, obonọ Kristi ọ jọ keria obọze Ọghẹnẹ.  Wha fi iroro rai kpobi họ eware nọ e rrọ obọ odhiwu, orọnikọ eware nọ e rrọ otọakpọ na ha.  Keme wha whu yọ a si uzuazọ rai no họ obọ Kristi wọhọ epaọ oreva Ọghẹnẹ.  Okenọ a ti dhesẹ Kristi ọnọ ọ wha uzuazọ ze na via, a ti dhesẹ owhai via kugbei re evaọ oruaro.  Fikiere wha kpe isiuru ugboma rai nọ e rrọ erọ akpọ na no, ọfariẹ-ogbe,* egbegbe, isiuru egaga kẹ owezẹ ọzae-avọ-aye nọ e vrẹta, ekpehre isiuru, gbe uvou-uthei, nọ o rrọ ẹdhọgọ.  Fiki eware yena ofu Ọghẹnẹ ọ be rọ nyaze.  Uzuazọ utioye na whai omarai wha je yeri vẹre.  Rekọ enẹna wha re siobọno eware nana kpobi hrọ: ofu, evedha, eyoma, ekela, gbe eme etọtọ eta.  Wha ta ọrue kẹ ohwohwo ho. Wha ba uruemu anwae na avọ iruẹru riẹ no oma no, 10  wha vẹ whẹ uruemu okpokpọ na họ oma, onọ a be rọ ẹkwoma eriariẹ egbagba ru kpokpọ re o jọ wọhọ uwoho Ọnọ ọ ma riẹ. 11  Evaọ onana, ohẹriẹ o rrọ udevie ohwo Griki avọ ohwo Ju hu, ọnọ ọ yawo avọ ọnọ ọ yawo ho, ọrara, ohwo Sitia,* ọrigbo hayo ọmuyẹ; rekọ Kristi họ eware kpobi jẹ rrọ evaọ aikpobi. 12  Fikiere, wọhọ enọ Ọghẹnẹ ọ salọ, nọ e rrọ ọrẹri, nọ o you, wha whẹ eware nana họ oma: uvi uyoyou gbe ohrọ-oriọ, uwowou, omaurokpotọ, ẹwolẹ, gbe odiri. 13  Wha gbẹ hai thihakọ kẹ ohwohwo jẹ rọvrẹ ohwohwo no eva ze nọ ohwo ọ tẹ maki wo oware jọ nọ u re ru ei go kpahe omọfa. Wọhọ epanọ Jihova* ọ rọvrẹ owhai riẹriẹriẹ na, wha re ru epọvo na re. 14  Rekọ u te no eware nana kpobi no, wha whẹ uyoyou họ oma, keme o rẹ wha okugbe ọkpekpe ze. 15  Ofariẹ, jọ udhedhẹ Kristi u su udu rai,* keme a se owhai ziọ udhedhẹ yena re wha jọ ugboma ovo. Wha hai dhesẹ nọ wha wo edẹro. 16  Jọ ẹme Kristi ọ jọ eva rai ruiruo ziezi re o kẹ owhai areghẹ kpobi. Wha hai wuhrẹ jẹ tuduhọ ohwohwo awọ avọ ilezi, ile nọ a re ro jiri Ọghẹnẹ, ile uyere* nọ a rẹ so rọ gọ Ọghẹnẹ, jẹ jọ udu rai so ile kẹ Jihova.* 17  Ẹme kpobi nọ wha be ta hayo oware kpobi nọ wha bi ru, wha ru oware kpobi evaọ odẹ Olori na Jesu, hae rọ ẹkwoma riẹ yere Ọghẹnẹ, Ọsẹ na. 18  Whai eyae, wha romakpotọ kẹ ezae rai, wọhọ epanọ u fo kẹ ilele Olori na. 19  Whai ezae, wha gbẹ hai you eyae rai, wha dheva kẹ ae gaga ha. 20  Whai emọ, wha yoẹme kẹ esẹgbini rai evaọ oware kpobi, keme onana o rẹ were Olori na. 21  Whai esẹ, wha hai ru uzou dhe emọ rai hi, re a gbẹ jọ ọkọkora ha. 22  Whai erigbo, wha yoẹme evaọ oware kpobi kẹ enọ e rrọ ilori rai evaọ otọakpọ na, orọnikọ okenọ a te bi rri owhai ọvo ho, re wha ruẹsi ru ahwo eva were, rekọ wha ru ei no udu ze, avọ ozodhẹ Jihova.* 23  Oware kpobi nọ wha bi ru, wha rọ udu kpobi ru ei wọhọ ẹsenọ wha bi ru ei kẹ Jihova,* orọnikọ ahwo ho, 24  keme wha riẹ nọ obọ Jihova* wha ti jo wo ukuoriọ na wọhọ osa. Wha gbodibo kẹ Olori na, Kristi. 25  Evaọ uzẹme, ohwo nọ o bi ru eyoma, a te hwosa eyoma na kẹe, keme ọriẹwẹ ọ riẹ hẹ.

Oruvẹ-Obotọ

Evaọ Griki, por·neiʹa. Rri oria Otofa Eme.
A jẹ hai se ahwo nọ a rovie aro vievie he ahwo Sitia re.
Rri oria Otofa Eme.
Hayo “kpọ udu rai.”
Hayo “awere.”
Rri oria Otofa Eme.
Rri oria Otofa Eme.
Rri oria Otofa Eme.
Rri oria Otofa Eme.