Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Kọlọsi 2:1-23

EWARE NỌ E RIẸ EVA

  • Oware udidi ọrẹri Ọghẹnẹ, Kristi (1-5)

  • Wha fiẹrohotọ fiki eviẹahwohọ (6-15)

  • Kristi họ uzedhe ọnọ eware na i dikihẹ kẹ (16-23)

2  Mẹ gwọlọ nọ wha riẹ epanọ mẹ be daoma ga te fiki rai gbe fiki inievo nọ e rrọ obọ Laodisia gbe fiki ahwo kpobi nọ a re ruẹ omẹ hẹ.  Onana o rrọ ere re wha ruẹsi wo omosasọ evaọ udu rai jẹ jọ okugbe ọvo evaọ uyoyou. Ofariẹ, re wha ruẹsi wo efe kpobi nọ o re no ewo otoriẹ uvevẹ ze, re wha sai wo eriariẹ egbagba kpahe oware udidi ọrẹri Ọghẹnẹ, koyehọ Kristi.  A ko efe areghẹ gbe eriariẹ kpobi dhere họ oma riẹ.  Mẹ be ta onana re ohwo ọvo ọ gbẹ rehọ eme ẹghẹ rọ viẹ owhai họ họ.  Dede nọ mẹ rrọ kugbe owhai evaọ ugboma ha, mẹ rrọ kugbe owhai evaọ ẹzi, be ghọghọ fikinọ mẹ be ruẹ epanọ wha bi ru eware kpatiẹ gbe ẹrọwọ rai nọ ọ rrọ gaga evaọ Kristi.  Fikiere, nọ wha jẹ Kristi Jesu, Olori na rehọ no na, wha ruabọhọ usu nọ wha rrọ kugbei na,  wha dadawọ mu otọ jẹ bọ omarai ga evaọ Kristi je dikihẹ ga evaọ ẹrọwọ na wọhọ epanọ a wuhrẹ owhai, jẹ be kẹ uyere ẹsikpobi na.  Wha fiẹrohọ otọ re ohwo ọvo o gbe mu owhai rehọ họ ẹkwoma eriariẹ akpọ na gbe eviẹhọ ifofe nọ i no iwuhrẹ ahwo gbe eware esese akpọ na ze nọ e rọwokugbe Kristi hi;  keme evaọ oma riẹ a rẹ jọ ruẹ oghẹrẹ nọ Ọghẹnẹ ọ rrọ dẹẹ. 10  Fikiere wha wo eware kpobi no ẹkwoma riẹ, ọnọ o wuzou egọmeti gbe udu-esuo kpobi. 11  Fiki usu nọ wha rrọ kugbei, a yawo owhai oyawo nọ a rehọ abọ ru hu, rekọ onọ a rẹ jọ si oma uwo na no. A yawo owhai oyawo idibo Kristi. 12  Keme a ki owhai kugbei evaọ ame-ọhọ riẹ, yọ fiki usu rai kugbei a kpare owhai ze kugbei fiki ẹrọwọ nọ wha fihọ iruo igbunu Ọghẹnẹ, ọnọ ọ kpare riẹ no uwhu ze. 13  Ofariẹ, dede nọ wha whu no vẹre fiki izieraha rai, yọ wha yawo evaọ uwo ho, Ọghẹnẹ o ru owhai ziọ uzuazọ kugbei. Ọ rehọ izieraha mai kpobi rọvrẹ omai 14  je voro obe nọ a rehọ obọ kere na no onọ o vọ avọ izi o tẹ jẹ rọsuọ omai. O si rie no otọ ẹkwoma ure-oja* na nọ ọ tehe riẹ fihọ. 15  Ọ rehọ ẹkwoma onana* ba egọmeti gbe enọ i wo udu-esuo fihọ no jẹ rehọ ae lahwe evaọ ẹgbede wọhọ enọ o fi kparobọ, be rehọ ae luje obokparọ. 16  Fikiere, wha kẹ ohwo ọvo uvẹ hẹ re ọ rehọ owhai gu ẹdhọ fiki oware nọ wha be re jẹ be da, hayo fiki eruo ehaa jọ hayo ehaa ọvẹre ọkpokpọ hayo ekoko ẹdijala. 17  Eware yena yọ uwoho eware nọ e be tha, rekọ Kristi họ uzedhe oware* na. 18  Wha kẹ ohwo ọvo uvẹ re ọ whaha owhai ewo osa na ha, ohwo nọ o re dhesẹ omaurokpotọ eviẹhọ gbe ọnọ ọ rẹ gọ ikọ-odhiwu,* nọ ọ rẹ dadamu eware nọ ọ ta nọ ọ ruẹ. Iroro ethọthọ riẹ i re ru ei fu uke ababọ emamọ ẹjiroro, 19  yọ ọ rrọ kugbe uzou na ha, onọ o be kẹ ugboma na soso eware nọ o gwọlọ jẹ rọ ẹkwoma ezo-oma gbe iriẹ-oma jẹ ekwakwa ugboma na họ kugbe ohwohwo, je bi ru ugboma na rro avọ obufihọ Ọghẹnẹ. 20  Otẹrọnọ wha lele Kristi whu evaọ eware esese akpọ na, fikieme wha bi ro yeri wọhọ ẹsenọ wha gbẹ rrọ abọ akpọ na ẹkwoma ekoko izi nọ e ta nọ: 21  “Whọ tọlọ họ, hayo dawo ho, hayo dhobọte he,” 22  kpakiyọ eware nana yọ eware nọ e rẹ raha no nọ a tẹ be rehọ ai ru iruo, wọhọ epaọ izi gbe iwuhrẹ ahwo-akpọ? 23  Dede nọ o rẹ wọhọ ẹsenọ areghẹ ọ rrọ eware yena nọ ohwo ọ tẹ be gọ evaọ oghẹrẹ nọ o roro je bi dhesẹ omaurokpotọ eviẹhọ, jẹ be lahiẹ omobọ riẹ, i re fiobọhọ evaọ ẹhọre isiuru uwo na ha.

Oruvẹ-Obotọ

Rri oria Otofa Eme.
Hayo o sae jọ nọ, “riẹ,” koyehọ, Jesu.
Evaọ Griki, “ugboma.”
Hayo “ọnọ ọ rẹ rọ aro kele oghẹrẹ nọ ikọ-odhiwu a rẹ gọ.”