Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Kọlọsi 1:1-29

EWARE NỌ E RIẸ EVA

  • Uyere (1, 2)

  • O yere Ọghẹnẹ fiki ẹrọwọ inievo Kọlọsi (3-8)

  • Olẹ kẹ ẹnyaharo evaọ eriariẹ gbe areghẹ Ọghẹnẹ (9-12)

  • Ọkwa ologbo Kristi (13-23)

  • Pọl o ru iruo gaga fiki ukoko na (24-29)

1  Mẹ Pọl, ọnọ ọ rrọ ukọ Kristi Jesu wọhọ epaọ oreva Ọghẹnẹ, gbe Timoti oniọvo mai  ro se erezi na, inievo nọ i bi kru ẹrọwọ rai nọ e rrọ usu kugbe Kristi evaọ obọ Kọlọsi: Jọ Ọghẹnẹ Ọsẹ mai o dhesẹ uwowou ulogbo kẹ owhai jẹ kẹ owhai udhedhẹ.  Ma be hai yere Ọghẹnẹ, Ọsẹ Olori mai Jesu Kristi ẹsikpobi nọ ma tẹ be lẹ roro owhai,  keme ma yo kpahe ẹrọwọ nọ wha fihọ Kristi Jesu gbe uyoyou nọ wha wo kẹ erezi na kpobi  fiki ẹruore eware nọ a ruẹrẹ họ kẹ owhai evaọ obọ odhiwu. Wha kaki yo kpahe ẹruore nana ẹkwoma ovuẹ uzẹme orọ usi uwoma na  onọ u bru owhai ze no. Nwane wọhọ epanọ usi uwoma na o be mọ ibi jẹ be nyaharo evaọ akpọ na soso na, ere ọvona u bi ru re evaọ udevie rai, anwọ ẹdẹ nọ wha ro yo jẹ ginẹ riẹ oware nọ uwowou ulogbo Ọghẹnẹ o rrọ gbagba.  Wha wuhrẹ oyena mi oyoyou mai nọ ma gbẹ rrọ ọrigbo, Ẹpafras, ọnọ ọ rrọ ọgbodibo Kristi nọ o wo ẹrọwọ, nọ o bi ru iruo nọ ma hai ti ru.  Ọ vuẹ omai re kpahe uyoyou nọ ẹzi Ọghẹnẹ ọ be wọ owhai dhesẹ.  Oyejabọ re nọ anwọ ẹdẹ nọ ma ro yo kpahe iẹe, ma re siọ olẹ ba ẹlẹ kẹ owhai vievie he jẹ be yare nọ jọ eriariẹ egbagba erọ oreva riẹ e da owhai oma fia re wha wo areghẹ kpobi gbe otoriẹ nọ ẹzi riẹ ọ rẹ kẹ, 10  re wha ruẹsi yeri uzuazọ nọ u fo evaọ aro Jihova* jẹ ruẹsi ru ei eva were ziezi nọ wha be ruabọhọ ru iruo iwoma kpobi jẹ be nyaharo evaọ ewo eriariẹ egbagba Ọghẹnẹ na. 11  Jọ ẹgba ologbo riẹ u ru owhai wo ogaga kpobi re wha sai thihakọ eware kpobi avọ odiri gbe oghọghọ, 12  nọ wha bi yere Ọsẹ na, ọnọ o ru owhai te enọ i ti wobọ evaọ ukuoriọ erezi nọ e rrọ elo na. 13  O siwi omai no ogaga ebi o te fi omai họ otọ uvie Ọmọ riẹ nọ o you, 14  ọnọ a rọ ẹkwoma riẹ hwa osa ẹtanigbo ro si omai no igbo, koyehọ erọvrẹ izieraha mai. 15  Ọye họ uwoho Ọghẹnẹ nọ a rẹ ruẹ hẹ na, ọmọ ọsosuọ evaọ emama kpobi; 16  keme ẹkwoma riẹ a rọ ma eware efa kpobi evaọ obọ odhiwu gbe otọakpọ na, eware nọ a rẹ ruẹ gbe eware nọ a rẹ ruẹ hẹ, makọ egbara-uvie hayo ọkwa-ilori hayo egọmeti hayo udu-esuo. A ma eware efa kpobi ẹkwoma riẹ jẹ rọ kẹe. 17  Ofariẹ, ọ kake rọ eware efa kpobi ziọ uzuazọ, yọ ẹkwoma riẹ eware efa kpobi e rọ ze, 18  yọ ọye o wuzou ugboma na, ukoko na. Ọye họ emuhọ na, ọrọ ọsosuọ nọ a kpare no uwhu ze, re ọ ruẹse jọ ọrọ ọsosuọ evaọ eware kpobi; 19  keme o were Ọghẹnẹ re o ru eware kpobi gba evaọ oma riẹ, 20  gbe re ọ rehọ ẹkwoma riẹ ruẹrẹ eware efa kpobi họ kugbe ọyomariẹ, makọ eware nọ e rrọ otọakpọ na hayo eware nọ e rrọ obọ odhiwu. O bi ru onana ẹkwoma azẹ Kristi, ọnọ a kare fihọ ure-oja.* 21  Whai enọ e hẹrioma no Ọghẹnẹ jẹ jọ ewegrẹ riẹ vẹre fikinọ wha fi iroro rai họ iruo imuomu, 22  ọ ruẹrẹ owhai họ kugbe omariẹ no enẹna ẹkwoma ugboma ohwo ọyena nọ o whu, re ọ ruẹsi ru owhai jọ ọrẹri, kare epe jẹ kare afuẹwẹ evaọ aro riẹ— 23  thakpinọ wha ruabọhọ ẹrọwọ na, dadamu otọhotọ na je dikihẹ ga re a gbe go owhai siọ ẹruore usi uwoma na ba ha, onọ wha yo gbe onọ a whowho evaọ udevie emama kpobi nọ e rrọ otọ odhiwu na. Fiki usi uwoma nana mẹ Pọl ọ rọ rrọ ọgbodibo na. 24  Mẹ be ghọghọ enẹna evaọ iye nọ i bi te omẹ fiki rai, yọ me roro nọ mẹ re jọ oma mẹ ruẹ uye fiki Kristi vọvọ no ho. Uye nọ u bi te omẹ na o rrọ kẹ erere ugboma Kristi, koyehọ ukoko na. 25  Mẹ rrọ ọgbodibo ukoko nana wọhọ epaọ iruo orieyero nọ Ọghẹnẹ ọ kẹ omẹ fiki rai, re me whowho ẹme Ọghẹnẹ ziezi, 26  oware udidi ọrẹri nọ a kodhere evaọ uyero-akpọ* sa-sa nọ e vrẹ gbe ige nọ e vrẹ. Rekọ enẹna a fere riẹ via no kẹ erezi riẹ, 27  enọ o were Ọghẹnẹ re o dhesẹ efe obuobu ọrọ oware udidi ọrẹri nana via kẹ evaọ udevie erẹwho na. Oware udidi ọrẹri na họ Kristi nọ ọ rrọ usu kugbe owhai, gbe ẹruore ọrọ oruaro riẹ. 28  Ọye ma bi whowho, be vẹvẹ ahwo kpobi unu kpahe je bi wuhrẹ ahwo kpobi kpahe avọ areghẹ kpobi, re ohwo kpobi nọ ma be rehọ kẹ Ọghẹnẹ ọ jọ ọnọ ọ kpako evaọ usu kugbe Kristi. 29  Fiki onana me bi gine ru iruo gaga, be daoma mẹ kpobi avọ ogaga riẹ nọ o be jọ oma mẹ ruiruo evaọ edhere ologbo.

Oruvẹ-Obotọ

Rri oria Otofa Eme.
Rri oria Otofa Eme.
Rri oria Otofa Eme.