Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Ẹfisọs 5:1-33

EWARE NỌ E RIẸ EVA

  • Ẹmeunu gbe uruemu ofuafo (1-5)

  • Yeri wọhọ emọ elo (6-14)

  • Jọ ẹzi ọ vọ owhai oma (15-20)

    • Rehọ oke ra ruiruo ziezi (16)

  • Ohrẹ kẹ ezae gbe eyae nọ e rọo (21-33)

5  Fikiere, wha rọ aro kele Ọghẹnẹ, wọhọ emọ iyoyou,  re wha hae rọ uyoyou yeri, wọhọ epanọ Kristi o you omai* o te siobọno omariẹ fiki mai* wọhọ idheidhe nọ i re gbo ore awere se Ọghẹnẹ.  Jọ a tubẹ fodẹ ọfariẹ-ogbe* gbe oghẹrẹ egbegbe ọvuọvo hayo uvou-uthei evaọ udevie rai hi, wọhọ epanọ u fo ahwo ọrẹri;  hayo uruemu omovuọ hayo eme igheghẹ eta hayo eme oworu nọ a rẹ ta rọ hwehwẹ, keme eware nana i fo ho, ukpoye kọ uyere ma rẹ kẹ Ọghẹnẹ.  Keme wha riẹ onana je vuhu ei mu inọ, ohwo ọvo nọ o bi gbe-ọfariẹ* hayo ohwo ogbegbe hayo ohwo uvou-uthethei—onọ u dhesẹ nọ yọ ọgẹdhọ—o wo ukuoriọ ọvo evaọ Uvie Kristi gbe Ọghẹnẹ vievie he.  Wha jọ ohwo ọvo ọ rehọ eme ifofe viẹ owhai họ họ, keme fiki eware itieye na ofu Ọghẹnẹ o bi ro bru ahwo aghẹmeeyo ze.  Fikiere, wha kuomagbe ae he;  keme wha jọ ebi vẹre, rekọ enẹna wha rrọ elo fikinọ wha rrọ usu kugbe Olori na. Wha hai yeri wọhọ emọ elo,  keme ibi nọ elo ọ rẹ mọ họ oghẹrẹ ewoma kpobi gbe ẹrẹreokie gbe uzẹme. 10  Wha hae daoma ruẹ nọ onọ Olori na ọ jẹrehọ wha bi ru; 11  wha gbe wobọ evaọ iruo ifofe nọ e rrọ iruo ebi hi; ukpoye, wha fere ae via. 12  Keme eware nọ a bi dhere lẹlẹ ru e rẹ wha omovuọ ze nọ a tẹ ta ae via ọvo dede. 13  Elo na o bi ru eware kpobi fere via, keme oware kpobi nọ a fere via no o ziọ elo no. 14  Fikiere, ikere na e ta nọ: “Rọwo no owezẹ ze, O ọwezẹ owezẹ, jẹ kparoma no uwhu ze, Kristi na o ve ti lo mu owhẹ.” 15  Fikiere, wha fiẹrohọ otọ ziezi re wha ruẹ nọ oghẹrẹ nọ wha bi yeri o rrọ wọhọ igheghẹ hẹ rekọ iwoareghẹ, 16  wha rehọ oke rai ruiruo ziezi,* keme edẹ na e rrọ muomu. 17  Fiki onana, wha jọ igheghẹ hẹ, rekọ wha hae daoma wo otoriẹ oware nọ oreva Jihova* o rrọ. 18  Ofariẹ, wha da idi vrẹ oma ha, onọ o rẹ wha ugberuo ze, ukpoye, wha jọ ẹzi na ọ vọ owhai oma ẹsikpobi. 19  Wha so ilezi, ile nọ a re ro jiri Ọghẹnẹ, gbe ile nọ a rẹ rọ gọ Ọghẹnẹ kẹ ohwohwo,* jẹ jọ udu rai so ile kẹ Jihova,* 20  hai yere Ọghẹnẹ gbe Ọsẹ mai kẹ eware kpobi kẹse kẹse evaọ odẹ Olori mai, Jesu Kristi. 21  Wha romakpotọ kẹ ohwohwo fiki ozodhẹ Kristi. 22  Jọ eyae e romakpotọ kẹ ezae rai wọhọ epanọ a bi ru kẹ Olori na, 23  keme ọzae họ ọnọ o wuzou aye riẹ wọhọ epanọ Kristi o wuzou ukoko na, ugboma riẹ, onọ ọ rrọ osiwi riẹ na. 24  Ẹhẹ, wọhọ epanọ ukoko na o be romakpotọ kẹ Kristi na, jọ eyae a ru epọvo na kẹ ezae rai re evaọ oware kpobi. 25  Ezae, wha gbẹ hai you eyae rai, wọhọ epanọ Kristi o you ukoko na o je siobọno omariẹ fiki riẹ, 26  re ọ ruẹsi ru ei jọ fuafo, o bi ru ei fo ẹkwoma ame nọ ọ be rọ họe, koyehọ ẹme Ọghẹnẹ, 27  re ukoko na o ruẹsi wo erru evaọ aro riẹ, ababọ oka hayo iriẹ nọ i siku hayo oware utioye jọ, rekọ o rẹ jọ ọrẹri jẹ kare epe. 28  Epọvo na u fo nọ ezae i re you eyae rai wọhọ ugboma obọrai. Ọzae nọ o you aye riẹ, yọ omobọ riẹ o you na, 29  keme ọzae ọvo o re mukpahe ugboma obọriẹ hẹ, rekọ ọ rẹ kuọ oma riẹ je rri rie ghaghae, wọhọ epanọ Kristi o bi ru ukoko na, 30  keme mai yọ ekwakwa ugboma riẹ. 31  “Fiki onana ọzae ọ rẹ nyasiọ ọsẹ gbe oni riẹ ba ọ vẹ talamu* aye riẹ, aimava na a vẹ jọ uwo ovo.” 32  Oware udidi ọrẹri nana yọ okpẹme. Whaọ, Kristi gbe ukoko na mẹ be ta kpahe na. 33  Ghele na, whai omomọvo o re you aye riẹ hrọ wọhọ epanọ o you omobọ riẹ; evaọ abọdekọ riẹ, jọ aye o wo adhẹẹ odidi kẹ ọzae riẹ.

Oruvẹ-Obotọ

Hayo o sae jọ nọ, “owhai.”
Hayo o sae jọ nọ, “rai.”
Evaọ Griki, “por·neiʹa.” Rri oria Otofa Eme.
Rri oria Otofa Eme, “Ọfariẹ-ogbe.”
Evaọ Griki, “dẹ oke nọ a fihọ na.”
Rri oria Otofa Eme.
Hayo o sae jọ nọ, “kẹ omomarai.”
Rri oria Otofa Eme.
Hayo “jọ kugbe.”