Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

Ahwo Ẹfisọs 4:1-32

EWARE NỌ E RIẸ EVA

  • Okugbe evaọ ugboma Kristi (1-16)

    • Ọ rehọ ezae kẹ ekẹ (8)

  • Uruemu anwae gbe uruemu okpokpọ na (17-32)

4  Fikiere, mẹ nọ ọ rrọ uwou-odi fiki Olori na, mẹ be lẹ owhai nọ wha yeri uzuazọ nọ u fo use nọ a se owhai na,  avọ omaurokpotọ gbe ẹwolẹ ẹsikpobi, avọ odiri, jẹ rọ uyoyou thihakọ kẹ ohwohwo,  jẹ daoma gaga re wha yọrọ okugbe ọvo nọ ẹzi na ọ be wha ze evaọ udhedhẹ nọ o be gba owhai kugbe na.  Ugboma ọvo ọ riẹ, yọ ẹzi ọvo ọ riẹ, wọhọ epanọ a se owhai ziọ ẹruore ọvo na;  Olori ọvo, ẹrọwọ ọvo, ame-ọhọ ọvo;  Ọghẹnẹ ọvo nọ ọ rrọ Ọsẹ ahwo kpobi, ọnọ o wuzou ahwo kpobi jẹ be rehọ ẹkwoma ahwo kpobi ruiruo je bi ruiruo evaọ oma ahwo kpobi.  Ọghẹnẹ o dhesẹ uwowou ulogbo kẹ omai omomọvo. Onana u bi dhesẹ oma via oghoghẹrẹ wọhọ epanọ Kristi ọ ghale okẹ ọvọvẹ na kẹ omai.  Keme o ta nọ: “Nọ o muvrẹ kpobọ ehru, ọ wha enọ e rrọ erigbo vrẹ; ọ tẹ rehọ ezae kẹ ekẹ.”  Whaọ eme ẹme na “o muvrẹ kpobọ ehru” u dhesẹ? U dhesẹ nọ o no ehru ziọ otọ, koyehọ otọakpọ na. 10  Ọnọ o no ehru ziọ otọ na ọye ọvona o muvrẹ kpobọ ehru thethabọ vrẹ idhiwu na kpobi, re ọ ruẹsi ru eware kpobi gba. 11  Ọ rehọ ejọ mu ikọ, ejọ eruẹaro, ejọ etausiuwoma, ejọ esẹro gbe iwuhrẹ, 12  re a ruẹse kpọ erezi na họ, re a gbodibo kẹ amọfa, re a bọ ugboma Kristi* na ga, 13  bẹsenọ mai kpobi ma rẹ jọ ọvo no evaọ ẹrọwọ na gbe evaọ eriariẹ egbagba kpahe Ọmọ Ọghẹnẹ, rro te ohwo ziezi no, koyehọ kpako ziezi te ohwo no wọhọ epanọ Kristi ọ rrọ. 14  Fikiere ma gbẹ jọ emaha ha, yọ ma gbẹ jọ enọ ofou oghẹrẹ iwuhrẹ kpobi o re fou kpenẹ avọ enẹ hẹ hayo nọ ẹkporo ọ rẹ wọ kpenẹ avọ enẹ fiki ẹghẹ ahwo nọ a be rọ eviẹhọ ro ruiruo. 15  Rekọ joma ta uzẹme, jẹ rọ uyoyou wo ẹnyaharo evaọ eware kpobi rọwokugbe ọnọ o wuzou mai, Kristi. 16  Ugboma na soso o jẹhọ ohwohwo no oma riẹ ze je bi ruiruo kugbe ẹkwoma ezo-oma na kpobi nọ e be tha ohwohwo uke. Nọ abọ-oma na kpobi i te bi ruiruo ziezi, o rẹ lẹliẹ oma na rro nọ o be rọ uyoyou bọ oma obọriẹ ga na. 17  Fikiere mẹ be ta onana jẹ be tuduhọ owhai awọ evaọ odẹ Olori na inọ wha gbe yeri wọhọ erẹwho na ha enọ i bi yeri evaọ iroro ifofe rai. 18  A rrọ ebi evaọ iroro rai, jẹ hẹrioma no uzuazọ nọ u re no obọ Ọghẹnẹ ze, fikinọ a rrọ igbori, gbe fiki udu rai nọ o rrọ gaga. 19  Fikinọ a zẹ omovuọ rai no riẹriẹriẹ, a rọ omarai kẹ uruemu nọ u fo ho nọ a re ru ababọ omovuọ,* bi ru oghoghẹrẹ eware igbegbe kpobi avọ uvou-uthei. 20  Rekọ orọnọ ere wha wuhrẹ mi Kristi hi, 21  o tẹ ginẹ rrọ uzẹme nọ oware nọ wha yo gbe onọ a wuhrẹ owhai o rọwokugbe uzẹme nọ Jesu o wuhrẹ. 22  A wuhrẹ owhai nọ wha ba uruemu anwae na no oma, onọ o rọwokugbe oghẹrẹ uzuazọ nọ wha je yeri vẹre, onọ o be rọ ẹkwoma isiuru eviẹhọ riẹ su owhai thọ. 23  Wha hai ru ẹzi nọ ọ be kpọ iroro rai kpokpọ, 24  jẹ whẹ uruemu okpokpọ na họ oma, onọ a ma lele oreva Ọghẹnẹ evaọ uvi ẹrẹreokie gbe uyoyou nọ o rẹ hiẹ hẹ. 25  Fikiere, enẹna nọ wha siobọno eviẹhọ no na, whai omomọvo ọ hae ta uzẹme kẹ ọrivẹ riẹ, keme mai yọ ekwakwa ugboma ọvo na. 26  Wha sai muofu, rekọ wha raha uzi hi; wha kuvẹ re ọre o kiediwi yọ wha gbe bi mu ofu hu; 27  wha kẹ Ẹdhọ uvẹ hẹ. 28  Jọ ọnọ o re tho uji o gbe tho ofa ha; rekọ jọ o ru iruo egaga, ọ rehọ abọ riẹ ru iruo iwoma, re ọ sai wo oware nọ ọ rẹ kẹ ọnọ o wo ho. 29  Jọ ẹme ọtọtọ o no unu rai ze he, rekọ ẹme owoma nọ ọ rẹ bọ amọfa ga ọvo, re o wha erere se enọ i bi yoi. 30  Ofariẹ, jọ wha ru eva dha ẹzi ọfuafo Ọghẹnẹ hẹ, onọ a ro kpoka họ owhai kẹ ẹdẹ nọ a ti ro siobọno owhai ẹkwoma ẹtanigbo. 31  Wha siobọno oghẹrẹ ẹgo oyoma kpobi, evedha, ofu, edo, ekela, gbe oware uyoma kpobi. 32  Rekọ wha dhesẹ uwowou kẹ ohwohwo, wo ohrọ-oriọ, wha rọvrẹ ohwohwo no eva ze wọhọ epanọ Ọghẹnẹ ọ rọ ẹkwoma Kristi rọvrẹ owhai re riẹriẹriẹ na.

Oruvẹ-Obotọ

Koyehọ, “ukoko na.”
Hayo “uruemu otọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.