Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

3 Jọn 1:1-14

EWARE NỌ E RIẸ EVA

  • Uyere gbe olẹ rọ kẹe (1-4)

  • O jiri Geyọs (5-8)

  • Diọtrẹfis nọ ọ rẹ gwọlọ oria ọsosuọ (9, 10)

  • A ta emamọ ẹme kpahe Demitriọs (11, 12)

  • O rẹro nọ ọ te nya bru rie; uyere (13, 14)

1  Mẹ ọkpako na me bi kere se Geyọs, oyoyou na, ọnọ me you gaga.  Oyoyou, mẹ be lẹ nọ jọ u gbe woma kẹ owhẹ evaọ eware kpobi, re who je wo omokpokpọ, wọhọ epanọ u bi woma kẹ owhẹ enẹna.  Mẹ ghọghọ gaga nọ inievo na a nyaze jẹ ta kpahe epanọ who kru uzẹme na ga, epanọ whọ gbẹ be rọ nya evaọ uzẹme na.  Oware ofa nọ o rẹ kẹ omẹ oghọghọ* vi onana o rrọ họ: re me yo nọ emọ mẹ a gbẹ be nya evaọ uzẹme na.  Oyoyou, who bi dhesẹ ẹrọwọ ra evaọ oware nọ who bi ru kẹ inievo na, dede nọ erara nọ whọ riẹ hẹ a rrọ.  A ta kpahe uyoyou ra evaọ aro ukoko na. Ivie, nọ a te ruọ edhere, fiobọhọ kẹ ae evaọ oghẹrẹ nọ o rẹ were Ọghẹnẹ.  Keme fiki odẹ riẹ a rọ rrọ onya na, yọ a be rehọ oware ovo mi ahwo erẹwho na ha.  Fikiere o gba omai họ nọ ma re dede ahwo otiọye rehọ jẹ rẹrote ai, re mai kpobi ma jọ ibe iruiruo evaọ uzẹme na.  Me kere ileta se ukoko na, rekọ Diọtrẹfis ọnọ ọ rẹ gwọlọ oria ọsosuọ evaọ udevie rai, ọ rẹ jẹ oware ovo nọ ma ta rehọ avọ adhẹẹ hẹ. 10  Oyejabọ nọ mẹ tẹ nyaze, mẹ te fere eware nọ o bi ru na via, nọ ọ be rọ ta eme iyoma kpahe omai evaọ oria kpobi. Fikinọ onana u te kẹe he, ọ rẹ rọwo dede inievo na rehọ avọ adhẹẹ hẹ; yọ enọ e gwọlọ dede inievo na rehọ ọ rẹ gwọlọ whaha ae je si ai no ukoko na no. 11  Oyoyou, whọ rọ aro kele oware uyoma ha, rekọ rọ aro kele oware uwoma. Ohwo nọ o bi ru oware uwoma ọ rrọ abọ Ọghẹnẹ. Ohwo nọ o bi ru oware uyoma ọ re riẹ Ọghẹnẹ hẹ. 12  Inievo na kpobi a be ta emamọ ẹme kpahe Demitriọs, yọ oghẹrẹ nọ o bi yeri uzuazọ lele uzẹme na u dhesẹ onana via. Mai omamai ma bi se isẹri kpahe iẹe re, yọ whọ riẹ nọ isẹri mai yọ uzẹme. 13  Me wo eware buobu nọ mẹ rẹ ta kẹ owhẹ, rekọ mẹ gbẹ gwọlọ kere ai fihọ ileta ha. 14  Rekọ me bi rẹro nọ mẹ te ruẹ owhẹ kẹle na, ma vẹ te ta ẹme ovao dhe ovao. Jọ udhedhẹ u te owhẹ. Inievo na a bi yere owhẹ. Yere inievo na kẹ omẹ ọvuọvo.

Oruvẹ-Obotọ

Hayo o sae jọ nọ, “lẹliẹ omẹ kẹ uyere.”