Kpohọ eme nọ e riẹ eva

Kpohọ oria izoẹme

2 Timoti 3:1-17

EWARE NỌ E RIẸ EVA

  • Oke obẹbẹ evaọ edẹ urere na (1-7)

  • O lele oriruo Pọl kpekpekpe (8-13)

  • “Ruabọhọ eware nọ who wuhrẹ” (14-17)

    • Ẹzi Ọghẹnẹ a ro kere Ikereakere na kpobi (16)

3  Rekọ riẹ onana inọ evaọ edẹ urere na, oke obẹbẹ nọ o te bẹ eyeri o te jọ.  Keme ahwo a ti you omobọrai, you ugho, seha, wo omorro, ta eme-aghọ, ghẹmeeyo kẹ esẹgbini, kare uyere-ọghọ, a ti ru ẹme rai gba ha,  a ti wo uyoyou kẹ ibe ahwo-akpọ rai hi, a te rọwo ru ọtamuo ho, a te ta ahwo raha, a ti wo oma-onyẹ hẹ, avọ ofu-ọkpoo, a ti you oware uwoma ha,  a ti vivie ahwo, veghe uzou, fu uke avọ omorro, a ti you omaweromẹ viukpenọ a re you Ọghẹnẹ,  a ti ru wọhọ ẹsenọ a be gọ Ọghẹnẹ rekọ a bi ru eware nọ e wọso ogaga riẹ; kẹnoma kẹ ahwo otiọye na.  Udevie ahwo nana ezae nọ e rẹ rọ ẹghẹ ruọ iwou ahwo a re no ze, a vẹ rọ unu awere mu eyae nọ e ga ha nọ izieraha e vọ oma, nọ isiuru sa-sa e be kpọ,  nọ a bi wuhrẹ ẹsikpobi ghele na a be sai wo eriariẹ egbagba uzẹme na ha.  Whaọ wọhọ epanọ Janis avọ Jambris a wọso Mosis na, ere ọvona ezae nana a be wọso uzẹme na. Iroro ezae itieye na i gbeku no riẹriẹriẹ, Ọghẹnẹ ọ se rai no keme a bi yeri uzuazọ nọ o rọwokugbe ẹrọwọ na ha.  Rekọ a ti wo ẹnyaharo viere he, keme ugheghẹ rai u ti dhesẹ oma via vevẹ kẹ ahwo kpobi, wọhọ epanọ o via kẹ ezae ivẹ yena. 10  Rekọ who bi lele uwuhrẹ mẹ kpekpekpe, te edhere uzuazọ mẹ, utee mẹ, ẹrọwọ mẹ, odiri mẹ, uyoyou mẹ, ithihakọ mẹ, 11  yọ whọ riẹ ikpokpoma gbe iye nọ i te omẹ evaọ Antiọk, Aikoniọm, gbe Listra. Me thihakọ ikpokpoma nana yọ Olori na o siwi omẹ no ai kpobi. 12  Evaọ uzẹme, ahwo kpobi nọ a gwọlọ yeri uzuazọ omarọkẹ Ọghẹnẹ evaọ usu kugbe Kristi Jesu a ti kpokpo ai re. 13  Rekọ ahwo omuomu gbe eviẹahwohọ a ti no onọ u yoma ruọ onọ o mai yoma, su ahwo thọ yọ a bi su ai thọ re. 14  Rekọ whẹ, ruabọhọ eware nọ who wuhrẹ nọ a fiobọhọ kẹ owhẹ vuhumu nọ whọ rọwo na, keme whọ riẹ obọ ahwo nọ who jo wuhrẹ ai 15  gbe nọ, no oke ọmọfofa ze whọ rọ riẹ ikereakere efuafo na, enọ e rẹ sai ru owhẹ wo areghẹ nọ o rẹ wha esiwo ze ẹkwoma ẹrọwọ nọ a re fihọ Kristi Jesu. 16  Ẹkwoma ẹzi Ọghẹnẹ a ro kere Ikereakere na kpobi, yọ e rẹ kẹ erere nọ a tẹ be rehọ ai wuhrẹ, kẹ ọwhọkuo, kpọ eware vi, kpọ iroro ohwo vi evaọ ẹrẹreokie, 17  re odibo Ọghẹnẹ ọ sai te ziezi, ruẹrẹ oma kpahe ziezi kẹ iruo iwoma kpobi.

Oruvẹ-Obotọ