Kpohọ eme nọ e riẹ eva

Kpohọ oria izoẹme

2 Timoti 2:1-26

EWARE NỌ E RIẸ EVA

  • Rehọ ovuẹ na kẹ ezae nọ i wo ẹrọwọ (1-7)

  • Thihakọ uye fiki usi uwoma na (8-13)

  • Wuhrẹ jẹ fa otọ ẹme Ọghẹnẹ gbagba (14-19)

  • Dhẹ siọ isiuru uzoge ba (20-22)

  • Oghẹrẹ nọ ma re ru enọ e be wọso omai (23-26)

2  Fikiere, whẹ ọmọ mẹ, jọ uwowou ulogbo nọ Ọghẹnẹ o re dhesẹ kẹ enọ e rrọ usu kugbe Kristi Jesu o hae kẹ owhẹ ogaga;  yọ kpahe eware nọ who yo mi omẹ, enọ ahwo buobu a se isẹri kpahe na, rehọ ae kẹ ezae nọ i wo ẹrọwọ, re ae omarai a sai te ziezi epanọ a re ro wuhrẹ amọfa.  Nọ whọ rrọ emamọ osoja Kristi Jesu na, ruẹrẹ oma kpahe nọ whọ rẹ ruẹ uye.  Ohwo nọ ọ rrọ osoja o re dhomahọ ekiọthuọ akpọ* họ, re ọ ruẹsi wo ọjẹrehọ ọnọ o wuzou riẹ.  Makọ evaọ arozaha oma-uhrowo, a re du ku etu idodo họ ohwo nọ ọ jariẹ wobọ họ ajokpanọ o ru lele izi na.  Ọwhẹrẹ nọ o ru iruo gaga họ ohwo ọsosuọ nọ ọ rẹ re ibi ekakọ na.  Hai roro kpahe eware nọ mẹ be ta na ẹsikpobi; Olori na ọ vẹ te kẹ owhẹ otoriẹ evaọ eware kpobi.  Kareghẹhọ nọ a kpare Jesu Kristi no uwhu ze gbe nọ ọmọ Devidi* ọ rrọ, wọhọ epaọ usi uwoma nọ mẹ be ta na,  onọ mẹ be rọ fiki riẹ ruẹ uye jẹ rrọ uwou-odi wọhọ ogbulegbu na. Rekọ ẹme Ọghẹnẹ ọ rrọ uwou-odi hi. 10  Onana o wha riẹ ze nọ me bi ro thihakọ eware kpobi fiki enọ a salọ na, re ae omarai a sai wo esiwo nọ o re no ẹkwoma Kristi Jesu ze avọ oruaro ebẹdẹ bẹdẹ. 11  Ẹme nana yọ ẹme nọ a re fievahọ: Ababọ avro, otẹrọnọ ma lele i rie whu, ma ti lele iei rria re; 12  ma tẹ ruabọhọ bi thihakọ, ma te jọ ivie nọ i ti lele iei su re; ma tẹ vro riẹ, ọ te vro omai re; 13  ma gbẹ maki ru ẹme mai gba ha, o re ru ẹme riẹ gba, keme ọ sae vro omariẹ hẹ. 14  Hae kareghẹhọ ae eware nana, ta kẹ ae evaọ aro Ọghẹnẹ inọ a du si ikẹ fiki eme he, onọ o rẹ kẹ erere ọvo ho keme o rẹ wha enwoma se enọ e be gaviezọ. 15  Dawo ẹgba ra kpobi re whọ jọ ọnọ Ọghẹnẹ ọ rẹ jẹrehọ, oruiruo nọ o wo oware ovo nọ o rẹ lẹliẹ oma vuọ iẹe he, nọ o re wuhrẹ jẹ fa otọ ẹme uzẹme na gbagba. 16  Rekọ siọ eme ifofe nọ e wọso oware nọ o rrọ ọrẹri, keme i re su kpohọ emuemu sa-sa, 17  yọ ẹme rai ọ rẹ vaha wọhọ ola-ofi. Himẹnayọs gbe Falitọs a rrọ usu rai. 18  Ezae nana a nyasiọ uzẹme na ba no, be ta nọ ẹkparomatha na ọ romavia no, yọ a be raha ẹrọwọ otujọ no. 19  Ghele na, otọhotọ ọgaga Ọghẹnẹ u gbe dikihẹ, yọ u wo oka nana, “Jihova* ọ riẹ enọ e rrọ eriẹ,” gbe inọ, “Jọ ohwo kpobi nọ o bi se odẹ Jihova* o siobọno emuemu.” 20  Whaọ evaọ uwou ulogbo ekwakwa sa-sa e rẹ jariẹ, orọnikọ erọ igoru gbe isiliva ọvo ho rekọ te erọ ure gbe ọviẹ, yọ ejọ e rrọ kẹ iruo nọ i wo ọghọ rekọ efa rọkẹ iruo nọ e kare ọghọ. 21  Fikiere nọ ohwo ọ tẹ be kẹnoma kẹ enọ e kare ọghọ na, ọ te jọ okwakwa nọ o rrọ kẹ iruo nọ i wo ọghọ, nọ a ru fo no, nọ u wo iruo kẹ ọnọ o wo rie, nọ a ruẹrẹ họ kẹ iruo iwoma kpobi. 22  Fikiere dhẹ siọ isiuru uzoge ba, rekọ le ẹrẹreokie, ẹrọwọ, uyoyou, udhedhẹ, evaọ usu kugbe enọ e be rọ udu ofuafo se Olori na. 23  Ofariẹ, whaha avro-ọvro ogheghẹ nọ o wo otọ họ, keme o rẹ wha ohọre ze. 24  Keme o gwọlọ nọ odibo Olori na ọ rẹ họre he, rekọ ọ rẹ jọ wolẹ kugbe ahwo kpobi, ọ rẹ jọ ọnọ ọ rẹ sai wuhrẹ ahwo, nyẹ oma riẹ nọ a te ru ei thọ, 25  ọ rẹ rọ ẹwolẹ wuhrẹ enọ e be rọwo iwuhrẹ na ha. Ẹsejọhọ Ọghẹnẹ o ti ru ai kurẹriẹ,* a ve wo eriariẹ egbagba uzẹme na, 26  a ve ti rri otọ mu jẹ dhẹ vabọ no agbefẹ Ẹdhọ, keme a vuhumu no nọ o mu rai ọkpokpọ re a ru oreva riẹ.

Oruvẹ-Obotọ

Hayo o sae jọ nọ, “eware nọ ahwo a bi ru kẹdẹ kẹdẹ ro yeri uzuazọ.”
Evaọ Griki, “ubi Devidi.”
Rri oria Otofa Eme.
Rri oria Otofa Eme.
Hayo “nwene iroro.”