Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

2 Pita 1:1-21

EWARE NỌ E RIẸ EVA

  • Uyere (1)

  • Ru use gbe ẹsalọ rai muẹro (2-15)

    • Eware nọ a re fiba ẹrọwọ (5-9)

  • Eruẹaruẹ na i mu omai ẹro vi epaọ ọsosuọ (16-21)

1  Saemọn Pita, ọrigbo gbe ukọ Jesu Kristi, ro se enọ i wo ẹrọwọ ọghaghae ọvona nọ ma wo na, fiki ẹrẹreokie Ọghẹnẹ mai gbe ọrọ Osiwi na Jesu Kristi:  Jọ Ọghẹnẹ o dhesẹ uwowou ulogbo riẹ kẹ owhai je ru owhai wo udhedhẹ vi epaọ anwẹdẹ ẹkwoma eriariẹ egbagba kpahe Ọghẹnẹ gbe Jesu Olori mai,  keme ogaga riẹ o kẹ omai eware kpobi nọ i re fiobọhọ kẹ omai yeri uzuazọ omarọkẹ Ọghẹnẹ ẹkwoma eriariẹ egbagba kpahe Ọnọ o se omai fiki oruaro gbe ewoma riẹ.  Ọ rọ ẹkwoma eware nana ya obọdẹ eyaa eghaghae na kẹ omai, re wha rọ ẹkwoma eware nana wo oma ẹzi wọhọ Ọghẹnẹ, keme wha vabọ no ogbekuo nọ ọ rrọ akpọ na no onọ isiuru iyoma e rẹ wha ze.  Fiki onana, wha dawo ẹgba rai kpobi re wha fi ewoma ba ẹrọwọ rai, fi eriariẹ ba ewoma rai,  fi oma-onyẹ ba eriariẹ rai, fi ithihakọ ba oma-onyẹ rai, fi omarọkẹ Ọghẹnẹ ba ithihakọ rai,  fi uyoyou-inievo ba omarọkẹ Ọghẹnẹ rai, fi uyoyou ba uyoyou-inievo rai.  Keme nọ eware nana e tẹ rrọ owhai oma jẹ da owhai oma fia, u ti ru nọ wha gbẹ te rọ jọ enọ e siọ iruo ba no ho hayo enọ e be mọ ibi hi evaọ efihiruo eriariẹ egbagba kpahe Olori mai, Jesu Kristi.  Keme ohwo kpobi nọ eware nana e rrọ oma ha o tuaro, ọ fare aro riẹ re ọ siọ elo ba ẹruẹ,* yọ ẹhọ nọ a họ riẹ fo no izieraha nọ ọ raha oke nọ u kpemu o thọrọ e riẹ ẹro no. 10  Fikiere inievo, wha romatotọ ru eware avọ ọwhọ vi epaọ anwẹdẹ re wha ru use gbe ẹsalọ rai muẹro, keme wha tẹ ruabọhọ eruo eware nana wha te nyathọ vievie he. 11  Ẹhẹ, enẹ a te rọ kẹ owhai uvẹ ruọ evaọ Uvie ebẹdẹ bẹdẹ ọrọ Olori gbe Osiwi mai, Jesu Kristi avọ oruaro. 12  Fiki onana, o rrọ omẹ iroro nọ mẹ rẹ kareghẹhọ owhai eware nana ẹsikpobi, dede nọ wha riẹ rai jẹ rrọ gaga evaọ uzẹme nọ wha wuhrẹ na. 13  Rekọ mẹ rehọ e riẹ nọ u kiehọ re mẹ kareghẹhọ owhai eware nana nọ mẹ gbẹ rrọ uwou-udhu* nana, 14  keme mẹ riẹ nọ mẹ te nyasiọ uwou-udhu nana ba kẹle wọhọ epanọ Olori mai Jesu Kristi o dhesẹ vevẹ kẹ omẹ. 15  Me ti ru utho ẹgba mẹ ẹsikpobi, re nọ mẹ tẹ nyavrẹ no, whai ọvo wha vẹ sae kareghẹhọ omarai eware nana. 16  Orọnikọ iku erue nọ a nabe ma te ma lele ro ru owhai riẹ kpahe ogaga gbe ọzino* Olori mai Jesu Kristi hi, rekọ ma rọ ẹro ruẹ oruaro ulogbo riẹ. 17  Keme Ọghẹnẹ Ọsẹ na ọ kẹ riẹ ọghọ gbe oruaro. Onana o via okenọ ọnọ o wo oruaro ulogbo na ọ ta eme nana kẹe: “Ọnana họ Ọmọ mẹ, oyoyou mẹ, ọnọ mẹ jẹrehọ.” 18  Ẹhẹ, ma yo eme nana nọ i do no obọ odhiwu ze okenọ ma jọ kugbei evaọ obọ ugbehru ọrẹri na. 19  Onana u ru ẹme eruẹaruẹ na mu omai ẹro vi epaọ ọsosuọ, yọ wha be riẹ ru nọ wha be rọ tẹrovi ei wọhọ ukpẹ nọ u bi lo evaọ oria ebi evaọ udu rai (bẹsenọ oke u re rie, esi ohiohiẹ ọ vẹ va ze). 20  Keme wha riẹ onana vẹre inọ eruẹaruẹ Ikereakere na ọvuọvo i no iroro obọ ohwo jọ ze he. 21  Keme a rọ ẹkwoma ogaga ohwo-akpọ ruẹ eruẹaruẹ evaọ oke ọvo ho, rekọ ahwo a ta eme nọ i no obọ Ọghẹnẹ ze wọhọ epanọ ẹzi ọfuafo na ọ kpọ rai.

Oruvẹ-Obotọ

Hayo o sae jọ nọ, “ọ be ruẹ ude tere he.”
Koyehọ, “oma uwo.”
Rri oria Otofa Eme.