Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

2 Ahwo Tẹsalonika 3:1-18

EWARE NỌ E RIẸ EVA

  • Hae lẹ (1-5)

  • Unuovẹvẹ kpahe enọ i bi ru eware kpatiẹ hẹ (6-15)

  • Uyere urere (16-18)

3  Orọ urere, inievo, wha hae lẹ roro omai, re ẹme Jihova* o gbe do ruọ oria kpobi vẹrẹ vẹrẹ re a jẹ jẹe rehọ avọ ọghọ wọhọ epanọ o rrọ udevie rai na,  re a je siwi omai no obọ ekpehre ahwo omuomu, keme orọnikọ ahwo kpobi a wo ẹrọwọ họ.  Rekọ Olori na o re ru ẹme riẹ gba, yọ ọ te kẹ owhai ẹgba jẹ thọ owhai no obọ omuomu na.  Ofariẹ, ma fievahọ owhai evaọ Olori na inọ wha bi ru eware nọ ma ta yọ wha ti gbe ru ere.  Jọ Olori na ọ gbẹ hae kpọ udu rai gbẹsinẹdẹ re wha you Ọghẹnẹ je wo ithihakọ nọ wha rẹ rọ ruabọhọ lele Kristi.  Inievo, ma be kẹ owhai ohrẹ evaọ odẹ Olori mai Jesu Kristi, inọ wha siomano oniọvo kpobi nọ ọ be nya kpatiẹ hẹ,* nọ o bi ru eware nọ i wo ohẹriẹ no enọ ma wuhrẹ owhai.*  Whai omarai wha riẹ epanọ u fo nọ wha re ru re wha rọ aro kele omai, keme ma ru eware kpatiẹ evaọ udevie rai,  yọ ma re emu ohwo ọvo ọvọvẹ hẹ.* Ukpoye, ma je ru iruo egaga avọ omolahiẹ taso tuvo re ma gbẹ wọ owha ogbẹgbẹdẹ họ owhai ọvuọvo uzou hu.  Orọnikọ ma wo udu nọ ma sai ro ru ere he he, rekọ ma gwọlọ jọ oriruo kẹ owhai nọ wha rẹ rọ aro kele. 10  Ofariẹ, okenọ ma jọ kugbe owhai, ma jẹ hae kẹ owhai ujaje nana inọ: “Otẹrọnọ ohwo jọ ọ gwọlọ ru iruo ho, wha kẹe emu re gbe he.” 11  Keme ma bi yo nọ ejọ evaọ udevie rai a be nya kpatiẹ hẹ, a bi ru iruo vievie he rekọ a bi dhomahọ eware nọ i te rai hi. 12  Ma be rọ odẹ Olori na Jesu Kristi ta kẹ ahwo otiọye na jẹ be tuduhọ ae awọ nọ a ru iruo ababọ ozighi jẹ re emu nọ a rọ obọ rai ru iruo kẹ. 13  Rọkẹ owhai, inievo, wha jọ oware uwoma uruo o bẹ owhai no ho. 14  Rekọ otẹrọnọ ohwo jọ o bi ru lele eme mai hi enọ ma jọ ileta nana ta na, wha kpokahọ iẹe je bru usu noi, re oma o vuọ iẹe. 15  Ghele na wha rehọ iẹe wọhọ ọwegrẹ hẹ rekọ wha gbẹ hae kẹe ohrẹ wọhọ oniọvo. 16  Jọ Olori udhedhẹ na ọ kẹ owhai udhedhẹ ẹsikpobi evaọ edhere kpobi. Jọ Olori na ọ jọ kugbe owhai kpobi. 17  Mẹ Pọl ọ be rọ obọ mẹ kere eme uyere nana ro yere owhai, onọ o rrọ oka evaọ ileta mẹ kpobi; enẹ me re kere. 18  Jọ Olori mai Jesu Kristi o dhesẹ uwowou ulogbo riẹ kẹ owhai kpobi.

Oruvẹ-Obotọ

Rri oria Otofa Eme.
Onana o sai dhesẹ enọ i bi koko izi Ọghẹnẹ hẹ.
Hayo o sae jọ nọ, “enọ ma wuhrẹ i rai.”
Hayo “ababọ osa nọ ma hwa ha.”