Kpohọ eme nọ e riẹ eva

Kpohọ oria izoẹme

2 Ahwo Tẹsalonika 2:1-17

EWARE NỌ E RIẸ EVA

  • Ohwo nọ o re koko uzi hi na (1-12)

  • Uduotahawọ re a dikihẹ ga (13-17)

2  Rekọ, inievo, kpahe ọzino* Olori mai Jesu Kristi gbe epanọ a ti ro koko omai họ re ma jọ kugbei, ma be ta kẹ owhai nọ  wha kuvẹ hẹ re iroro rai i reghe hayo re ozọ u mu owhai fiki ẹme nọ a ta nọ o no obọ Ọghẹnẹ ze hayo fiki ẹmeunu hayo fiki ileta nọ o wọhọ nọ i no obọ mai ze, nọ otujọ a be rọ ta inọ ẹdẹ Jihova* o te otọ no.  Wha jọ ohwo ọvo o su owhai thọ evaọ edhere ọvuọvo ho, keme ẹdẹ yena ọ rẹ ze he ajokpanọ ẹsiọ-ẹrọwọ* na o rẹ romavia tao, a ve je dhesẹ ohwo nọ o re koko uzi hi na via, ọmọ ọraha na.  Ohwo ọwọsuọ ọ rrọ yọ ọ te kpare omariẹ kpehru vi ohwo kpobi nọ a bi se ọghẹnẹ hayo oware kpobi nọ a be gọ, fikiere ọ te keria etẹmpol Ọghẹnẹ, ti dhesẹ omariẹ ọghẹnẹ.  Kọ wha gbẹ kareghẹhọ nọ okenọ mẹ gbẹ jọ kugbe owhai, mẹ jẹ ta eme nana kẹ owhai?  Whaọ wha riẹ oware nọ u bi bru rie abọ họ, re a ti dhesẹ iẹe via nọ oke riẹ u te te.  Uzẹme, ọnana nọ o re koko uzi hi na o mu iruo họ no, yọ ahwo a ri rri rie mu hu, rekọ o te jọ ere bẹsenọ ọnọ o bi bru rie abọ họ na ọ rẹ nyavrẹ no.  Kẹsena a ve ti dhesẹ ọnọ o re koko uzi hi na via, ọnọ Olori na Jesu ọ te rọ ẹzi unu riẹ raha je si no otọ evaọ okenọ ọzino* riẹ o ti dhesẹ oma via.  Ọnọ o re koko uzi hi na ọ riẹ fiki ẹgba nọ Setan ọ be kẹe ro ru iruo igbunu kpobi gbe eware eka avọ eware igbunu nọ ọ be rọ viẹ ahwo họ, 10  jẹ be rọ edhere oyoma kpobi rọ viẹ enọ a be te raha no họ, onana yọ osohwa rai keme a jẹ uzẹme na rehọ họ yọ a you uzẹme na ha re a sai siwi ai. 11  Oyejabọ nọ Ọghẹnẹ ọ rọ kuvẹ re ọrue o su ai thọ, re a ruẹse rọwo ọrue, 12  re aikpobi a ruẹsi wo obrukpe keme a rọwo uzẹme na ha rekọ a roma kẹ emuemu. 13  O gba omai họ ẹsikpobi re ma yere Ọghẹnẹ fiki rai, inievo nọ Jihova* o you, keme no emuhọ ze Ọghẹnẹ ọ salọ owhai re wha wo esiwo ẹkwoma ẹzi riẹ nọ o ro ru owhai fo gbe ẹrọwọ nọ wha fihọ uzẹme na. 14  Ọ rehọ ẹkwoma usi uwoma nọ ma bi whowho se owhai kẹ onana, re wha sai wo oruaro ọrọ Olori mai Jesu Kristi. 15  Fikiere, inievo, wha dikihẹ ga je kru eware nọ a wuhrẹ owhai na ga ẹsikpobi, o tẹ make rrọ ẹkwoma ovuẹ unu hayo ileta nọ ma kere se owhai. 16  Ofariẹ, jọ Olori mai Jesu Kristi gbe Ọghẹnẹ Ọsẹ mai, ọnọ o you omai jẹ rọ fiki uwowou ulogbo kẹ omai omosasọ ebẹdẹ bẹdẹ gbe emamọ ẹruore na, 17  a sasa udu rai je ru owhai ga* re wha sai ru jẹ ta oware nọ u woma ẹsikpobi.

Oruvẹ-Obotọ

Rri oria Otofa Eme.
Rri oria Otofa Eme.
Hayo “enọ i kiukeku egagọ uzẹme no.”
Rri oria Otofa Eme.
Rri oria Otofa Eme.
Hayo “kẹ owhai ẹgba.”