Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

2 Ahwo Kọrint 2:1-17

EWARE NỌ E RIẸ EVA

  • Pọl ọ gwọlọ wha oghọghọ se ai (1-4)

  • Ọrahauzi nọ a rọvrẹ jẹ wariẹ rehọ ziọ ukoko na (5-11)

  • Pọl evaọ Troas gbe Masidonia (12, 13)

  • Iruo odibọgba na yọ uje obokparọ (14-17)

    • Ma be zẹ ẹme Ọghẹnẹ hẹ (17)

2  Mẹ gba riẹ mu no inọ mẹ rẹ gbẹ wariẹ rọ iweze mẹ wha ọkora se owhai hi.  Mẹ tẹ wha ọkora se owhai, kọ amono a te sasa omẹ oma kpakiyọ whai họ enọ e hae sasa omẹ oma?  Me kere ileta yena se owhai, re nọ mẹ tẹ nyaze, me gbe weri fiki ahwo nọ a hae wha oghọghọ se omẹ hẹ, keme u mu omẹ ẹro nọ oware nọ o rẹ wha oghọghọ se omẹ o rẹ wha oghọghọ se owhai kpobi re.  Evaọ uye gbe ẹrova me ro kere se owhai avọ irui-oviẹ, orọnikọ re mẹ wha ọkora se owhai hi, rekọ re me ru owhai riẹ epanọ uyoyou nọ me wo kẹ owhai o ga te.  Whaọ otẹrọnọ ohwo jọ ọ wha ọkora ze, whai kpobi ọ wha ọkora se orọnikọ omẹ hẹ. Rekọ mẹ gwọlọ ta onana ga hrọ họ.  Ọwhọkuo nọ ogbotu a kẹ riẹ na u te kẹ ọzae otiọye na;  enẹna wha rọvrẹ riẹ jẹ sasa iẹe oma, re ọkora ọgaga ọ gbẹ dae oma fia ha.  Fikiere mẹ be tuduhọ owhai awọ nọ wha dhesẹ uyoyou kẹe.  Fiki onana re me ro kere ileta yena se owhai: re mẹ riẹ sọ wha ti dhesẹ nọ wha bi yoẹme evaọ eware kpobi. 10  Wha tẹ rọvrẹ ohwo jọ, mẹ rọvrẹ riẹ re. Evaọ uzẹme, oware kpobi nọ mẹ rọvrẹ ohwo jọ, me ru rie re o jọ erere kẹ owhai evaọ aro Kristi, 11  re Setan o gbe mu* omai rehọ họ keme ma rrọ igbori eghẹ* riẹ hẹ. 12  Whaọ nọ me te Troas re me whowho usi uwoma kpahe Kristi, mẹ ruẹ ẹthẹ* nọ o rovie kẹ omẹ evaọ iruo Olori na, 13  rekọ udu mẹ u te otọ họ fikinọ mẹ ruẹ Taitọs oniọvo mẹ hẹ. Fikiere mẹ tẹ nyasiọ inievo nọ e rrọ ẹwho na ba kpobọ Masidonia. 14  Rekọ uyere u te Ọghẹnẹ ọnọ o bi su omai ẹsikpobi evaọ uje obokparọ evaọ usu kugbe Kristi. Ọ be rọ ẹkwoma mai vaha* ore awere eriariẹ riẹ evaọ oria kpobi. 15  Keme mai yọ ore awere kẹ Ọghẹnẹ nọ ma bi whowho usi kpahe Kristi na evaọ udevie enọ a bi ti siwi gbe enọ a be te raha; 16  rọkẹ utu avọ ivẹ na, ore uwhu nọ u bi su kpohọ uwhu, rọkẹ utu ọsosuọ na ore awere uzuazọ nọ u bi su kpohọ uzuazọ. Kọ ono o te kẹ iruo nana? 17  Mai; keme ma be zẹ* ẹme Ọghẹnẹ hẹ wọhọ epanọ ahwo buobu a bi ru, rekọ ma be rọ oruọzewọ ta ẹme wọhọ epanọ Ọghẹnẹ o vi omai, ẹhẹ, evaọ aro Ọghẹnẹ gbe evaọ usu kugbe Kristi.

Oruvẹ-Obotọ

Hayo “viẹ omai họ họ.”
Hayo “ẹjiroro; omaa.”
Koyehọ, uvẹ-iruo.
Hayo “ru ahwo yo.”
Hayo “be rọ ẹme Ọghẹnẹ thueki hi; be rọ ẹme Ọghẹnẹ wo igho ho.”