Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

2 Ahwo Kọrint 11:1-33

EWARE NỌ E RIẸ EVA

  • Pọl gbe enọ a je se obọdẹ ikọ na (1-15)

  • Iye nọ Pọl ọ ruẹ fikinọ ọ rrọ ukọ (16-33)

11  Me bi rẹro nọ wha ti thihakọ kẹ omẹ evaọ eme mẹ nọ e dina kare iroro na. Uzẹme riẹ họ, wha bi thihakọ kẹ omẹ.  Keme mẹ be re ihri fiki rai wọhọ epaọ ihri-eriọ Ọghẹnẹ, keme mẹ sa owhai họ otọ kẹ ọzae ọvo, Kristi, yọ mẹ gwọlọ rehọ owhai kẹe wọhọ ọmọtẹ-kọkọ.*  Rekọ ozọ u bi mu omẹ inọ wọhọ epanọ araomuomu na ọ rehọ ẹghẹ riẹ viẹ Ivi họ na, o ti gbe iroro rai ku, wha ve ti gbabọkẹ oruọzewọ gbe uzuazọ nọ o kare ọfariẹ-ogbe* nọ ma re yeri fiki Kristi.  Keme oghẹrẹ nọ o wọhọ na, ohwo jọ ọ tẹ nya bru owhai ze bi whowho Jesu ọfa viukpọ ọnọ ma whowho kẹ owhai na, hayo ọ wha oghẹrẹ ẹzi* ọfa ze viukpọ onọ wha wo vẹre na, hayo usi uwoma ofa viukpọ onọ wha jẹrehọ na, wha bi dede iei rehọ lọlọhọ.  Mẹ ruẹ nọ obọdẹ ikọ rai na a woma vi omẹ evaọ oware ovo ho.  Rekọ o tẹ make rọnọ mẹ riẹ ẹme ẹta ha, me wo eriariẹ; yọ ma dhesẹ onana via kẹ owhai evaọ edhere kpobi gbe evaọ oware kpobi.  Hayo kọ mẹ raha uzi nọ mẹ rọ rehọ evawere whowho usi uwoma Ọghẹnẹ kẹ owhai ọvọvẹ je ru oma mẹ kpotọ re a sae kpare owhai kpehru?  O wọhọ ẹsenọ me gboro eware nọ mẹ rẹ rọ rẹrote oma mẹ mi ikoko efa re mẹ sae gbodibo kẹ owhai.  Ghele na, okenọ mẹ jọ kugbe owhai nọ eware e kare omẹ obọ, mẹ wọ owha mẹ họ ohwo ọvo uzou hu, keme inievo nọ i no obọ Masidonia ze a kẹ omẹ eware kpobi nọ e kare omẹ. Ẹhẹ, evaọ edhere kpobi, mẹ daoma re mẹ siọ owha ba ẹjọ kẹ owhai, yọ me ti gbe ru ere. 10  Wọhọ epanọ mẹ be ta uzẹme wọhọ Kristi na, ere ọvona mẹ te gbẹ rọ onana seha evaọ ibrotọ Akeya. 11  Fikieme me bi ro ru onana? Kọ fikinọ me you owhai hi? Ọghẹnẹ ọ riẹ nọ me you owhai. 12  Rekọ me ti gbe ru oware nọ me bi ru na, re mẹ raha eviẹhọ enọ e be gwọlọ oware nọ a rẹ rọ jọ ẹrẹrẹe kugbe omai evaọ eware nọ a bi ro seha na. 13  Keme ezae itieye na yọ ikọ erue, iruiruo eviẹhọ, nọ i bi ru omarai wọhọ ikọ Kristi. 14  Onana u gbunu hu keme Setan omariẹ o bi ru omariẹ wọhọ ukọ-odhiwu elo. 15  Fikiere o rrọ okpoware he nọ idibo riẹ a te bi ru omarai wọhọ idibo ẹrẹreokie. Rekọ osohwa rai o te jọ wọhọ epaọ iruo rai. 16  Mẹ be wariẹ ta nọ: Jọ ohwo ọvo o roro nọ mẹ kare iroro ho. Rekọ wha tẹ maki roro ere, jọ wha rehọ omẹ wọhọ ohwo nọ ọ kare iroro, re mẹ sai seha omojọ re. 17  Eme nọ mẹ be ta obọnana e wọhọ erọ Olori na ha, rekọ wọhọ epaọ ohwo nọ ọ kare iroro nọ ọ rẹ rẹroso omobọ riẹ nọ o re seha. 18  Nọ orọnọ ibuobu a be rehọ eware akpọ na seha na, me ti seha re. 19  Nọ wha wo “areghẹ” gaga na, wha be rọ evawere thihakọ kẹ enọ e kare iroro. 20  Evaọ uzẹme, wha bi thihakọ kẹ ohwo kpobi nọ o bi ru owhai họ erigbo, nọ o bi gboro eware rai, nọ o bi fru eware rai rehọ, nọ o bi ru omariẹ ohwo ologbo kẹ owhai, gbe ọnọ ọ be tehe owhai ovao. 21  Mẹ be ta onana avọ omovuọ keme ahwo jọ a bi rri omai wọhọ ẹsenọ ma rrọ eyẹlẹ. Rekọ otẹrọnọ ahwo jọ a bi ru eware ududu—mẹ be ta onana wọhọ ohwo nọ ọ kare iroro—me bi ru eware ududu re. 22  Kọ ahwo Hibru a rrọ? Ere omẹ re. Kọ ahwo Izrẹl a rrọ? Ere omẹ re. Kọ emọ* Abraham a rrọ? Ere omẹ re. 23  Egbodibo Kristi a rrọ? Mẹ be kuyo wọhọ ọruẹ, mẹ rrọ ere vi ai: Me ru iruo vi ai, a fi omẹ họ uwou-odi unuẹse buobu vi ai, a kpe omẹ unuẹse buobu, yọ ẹsibuobu mẹ kẹle uwhu. 24  Isiasoi ahwo Ju a fa omẹ eviaviẹ ọgba gbe izii, 25  isiasa a rọ ekpọ fa omẹ, a rọ itho fi omẹ ẹsiẹvo, isiasa okọ u zue omẹ, aso hẹrioke gbe okpẹdoke mẹ jọ ame evaọ abade; 26  evaọ erẹ ẹsibuobu, mẹ jọ ọza evaọ ithẹ, ọza evaọ obọ igbulegbu, ọza evaọ obọ ahwo obọmẹ, ọza evaọ erẹwho efa, ọza evaọ ẹwho, ọza evaọ udhude, ọza evaọ abade, ọza evaọ udevie inievo erue, 27  evaọ iruo egaga avọ omolahiẹ, aso buobu ababọ owezẹ, ohọo gbe uruame, ababọ emu unuẹse buobu, evaọ ekpahe gbe ababọ ewu.* 28  U te no eware yena no, u wo oware jọ nọ u bi kpokpo udu mẹ kẹdẹ kẹdẹ: awaọruọ kpahe ikoko na kpobi. 29  Ono oma o rẹ lọhọ nọ oma o gbẹ lọhọ omẹ hẹ? Ono a re ru zoruẹ nọ eva e gbẹ dha omẹ hẹ? 30  Otẹrọnọ me re seha, eware nọ i bi dhesẹ nọ mẹ ga ha me re ro seha. 31  Ọghẹnẹ gbe Ọsẹ Olori na Jesu, Ọnọ a re jiri bẹdẹ bẹdẹ, ọ riẹ nọ ọrue mẹ be ta ha. 32  Evaọ Damaskọs, osu jọ evaọ otọ Aritas ovie na o je rou* ẹwho na re ọ ruẹsi mu omẹ, 33  rekọ a te fi omẹ họ ekete, a tẹ rọ unu unwido jọ evaọ ugbẹhẹ ẹwho na si omẹ kpotọ, mẹ tẹ vae abọ.

Oruvẹ-Obotọ

Hayo “fuafo.”
Hayo “uzuazọ ẹfuọ.”
Hayo “oghẹrẹ iroro jọ.”
Evaọ Griki, “ubi.”
Hayo “ẹbẹba.”
Hayo “rroro.”