Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Timoti 5:1-25

EWARE NỌ E RIẸ EVA

  • Oghẹrẹ nọ a re yeri kugbe emaha te ekpako (1, 2)

  • Obufihọ kẹ eyae-uku (3-16)

    • Rẹrote ahwo uviuwou (8)

  • Rọ ọghọ kẹ ekpako nọ i bi ru iruo gaga (17-25)

    • “Umutho udi fiki eva ra” (23)

5  Who doku ọzae nọ ọ kpako no ho. Ukpoye, ta ẹme kẹe wọhọ ọsẹ, ezae nọ e gbẹ maha wọhọ inievo-emezae,  eyae nọ e kpako no wọhọ ini, ivovo-eyae wọhọ inievo-emetẹ, avọ uruemu ofuafo* evaọ kabọ kabọ.  Wo ororokẹ* rọkẹ eyae-uku nọ e ginẹ rrọ eyae-uku.*  Rekọ otẹrọnọ aye-uku jọ o wo emọ hayo emọ-iruọmọ, jọ emọ na a kaki dhesẹ omarọkẹ Ọghẹnẹ evaọ uviuwou rai, jọ a hae hwa zihe kẹ esẹgbini avọ esẹ-ode gbe ini-ode rai wọhọ epanọ u fo nọ a re ru kẹ ae, keme onana o rẹ were Ọghẹnẹ.  Aye nọ ọ ginẹ rrọ aye-uku nọ akpọ ọ be bẹ nọ o wo ohwo ho o fi ẹruore riẹ họ Ọghẹnẹ, yọ ọ rẹ ruabọhọ olẹ-ayare gbe olẹ taso tuvo.  Rekọ ọnọ ọ be roma kẹ omaweromẹ ugboma na o whu no dede nọ ọ rrọ uzuazọ.  Fikiere hae kẹ ehrẹ* nana, re a sae kare afuẹwẹ.  Evaọ uzẹme, otẹrọnọ ohwo jọ ọ be rẹrote ahwo riẹ hẹ, maero enọ e rrọ ahwo uviuwou riẹ, yọ ọ vro ẹrọwọ na no je yoma vi ohwo nọ o wo ẹrọwọ họ.  A re kere odẹ aye-uku kugbe usu ahwo nọ a bi fiobọhọ kẹ otẹrọnọ ọ maha vrẹ ikpe udhosa ha, yọ ọ jọ aye nọ o wo ọzae ọvo, 10  nọ ahwo a riẹ nọ o ru iruo iwoma, otẹrọnọ ọ yọrọ emọ riẹ ziezi, otẹrọnọ o dede erara rehọ, otẹrọnọ ọ wozẹ awọ erezi na, otẹrọnọ o fiobọhọ kẹ enọ e rrọ uye, otẹrọnọ ọ roma kẹ iruo iwoma kpobi. 11  Evaọ abọdekọ riẹ, a re kere odẹ eyae-uku nọ e rrọ uvovo-eyae fihọ iẹe he, keme nọ isiuru owezẹ ọzae-avọ-aye o tẹ be wha ẹbẹbẹ fihọ usu rai kugbe Kristi, a rẹ gwọlọ rọo. 12  A ti wo obrukpe keme a gbabọkẹ ẹrọwọ ọsosuọ* nọ a dhesẹ via no. 13  Evaọ oke ovona, a rẹ gwọlọ ru iruo ho, a re no uwou jọ ruọ ofa; ẹhẹ, orọnikọ a bi ru iruo ho ọvo ho, rekọ a rrọ iguiguẹgu re gbe enọ i re dhomahọ eme amọfa, ta kpahe eware nọ i fo nọ a rẹ ta ha. 14  Fikiere mẹ gwọlọ nọ eyae-uku nọ e rrọ uvovo-eyae a rọo, yẹ emọ, rẹrote uviuwou, re otu ọwọsuọ a gbẹ ruẹ oware ovo nọ a rẹ rọ ta eme iyoma ha. 15  Evaọ uzẹme, ejọ i no emamọ edhere na no bi kie lele Setan. 16  Otẹrọnọ aye nọ ọ rrọ Oleleikristi o wo imoni nọ e rrọ eyae-uku, jọ o fiobọhọ kẹ ae, re owha na o gbẹ jọ ukoko na uzou hu. Ukoko na o vẹ sai fiobọhọ kẹ eyae-uku nọ e ginẹ rrọ eyae-uku.* 17  Jọ a rọ ọghọ akuava kẹ ekpako na nọ i bi ru iruo ẹruọsa rai ziezi na, maero enọ i bi ru iruo gaga evaọ ẹmeọta gbe amọfa owuhrẹ. 18  Keme ikereakere na e ta nọ, “Whọ rẹ gba unu eruẹ vievie he nọ ọ tẹ be kpare eka,” e tẹ jẹ ta nọ, “U fo nọ a rẹ hwa oruiruo osa iruo riẹ.” 19  Whọ nwane rọwo ho nọ a tẹ ta nọ ọkpako o ru oware uyoma jọ, ajokpanọ who wo imuẹro erọ isisẹri ivẹ hayo esa. 20  Jọ iraro ahwo kpobi whọku ahwo nọ a be raha uzi, re o jọ unuovẹvẹ kẹ enọ i kiọkọ.* 21  Mẹ be jọ aro Ọghẹnẹ gbe Kristi Jesu gbe ikọ-odhiwu nọ a salọ na ta kẹ owhẹ inọ ru lele ehrẹ nana ababọ omagbẹre hayo ọriẹwẹ. 22  Whọ rehọ okpakpa rọ abọ kpahe ohwo ọvo uzou hu; hayo wobọ evaọ izieraha amọfa ha; yọrọ uruemu ofuafo. 23  Whọ gbẹ da ame ọvo ofa ha, rekọ da umutho udi fiki eva ra na gbe ẹyao nọ who bi dhe ẹmẹmọ na. 24  Izieraha ahwo jọ e rẹ bẹre oma via kẹ ahwo kpobi, onọ o rẹ wha obrukpe se ae ovavo, rekọ erọ amọfa e rẹ bẹre oma via evaọ obaro. 25  Ere ọvona re, iruo iwoma i re dhesẹ oma via kẹ ahwo kpobi, yọ enọ ahwo a be ruẹ hẹ e sai dhere ribri hi.

Oruvẹ-Obotọ

Koyehọ, uzuazọ nọ o kare iruemu ọfariẹ-ogbe.
Evaọ Griki, “Rọ ọghọ.”
Hayo “eyae-uku nọ o ginẹ gwọlọ nọ a re fiobọhọ kẹ”; koyehọ, eyae-uku nọ i wo ahwo nọ a bi fiobọhọ kẹ ae he.
Hayo “izi.”
Hayo “eyaa ọsosuọ rai.”
Hayo “eyae-uku nọ o ginẹ gwọlọ nọ a re fiobọhọ kẹ”; koyehọ, eyae-uku nọ i wo ahwo nọ a bi fiobọhọ kẹ ae he.
Evaọ Griki, “re u ru enọ i kiọkọ dhozọ eyoma oruo.”