Kpohọ eme nọ e riẹ eva

Kpohọ oria izoẹme

1 Timoti 3:1-16

EWARE NỌ E RIẸ EVA

  • Eware nọ i re ru ohwo te ọsẹro (1-7)

  • Eware nọ i re ru ohwo te odibo oruiruo (8-13)

  • Oware udidi ọrẹri orọ omarọkẹ Ọghẹnẹ (14-16)

3  Ẹme nana yọ ẹme nọ a re fievahọ: Otẹrọnọ ọzae jọ ọ be daoma re o te ọsẹro, emamọ iruo ọ be gwọlọ na.  Fikiere ọsẹro ọ rẹ kare afuẹwẹ, ọzae nọ o wo aye ọvo, uruemu riẹ o rẹ jọ owowa, o re wo iroro egbagba,* jọ kpatiẹ, dede erara rehọ, ọ rẹ jọ ọnọ ọ rẹ sai wuhrẹ ahwo,  ọ rẹ jọ ọgba-udi hi, ohwo ozighi hi, rekọ ohwo nọ o wo iroro,* ohwo nọ ọ rẹ whọ ẹwhọ họ, ohwo nọ o you ugho ho,  ọzae nọ ọ be sẹro uviuwou riẹ ziezi, nọ emọ riẹ e be romakpotọ avọ osegboja kpobi  (keme otẹrọnọ ọzae ọ riẹ epanọ ọ rẹ rọ sẹro uviuwou riẹ hẹ, ẹvẹ ọ sae rọ rẹrote ukoko Ọghẹnẹ?),  ọ rẹ jọ ohwo nọ o kurẹriẹ obọ họ, keme ẹsejọhọ ọ sai fu uke avọ omorro o ve ti wo oghẹrẹ obrukpe nọ o te Ẹdhọ.  Ofariẹ, ọ rẹ jẹ jọ ohwo nọ ahwo obọ otafe a be ta emamọ ẹme kpahe,* re a gbẹ poviẹe he* yọ o gbe je kie ruọ agbefẹ Ẹdhọ họ.  Epọvo na re, idibo iruiruo a rẹ jọ ahwo nọ a wo osegboja, a rẹ jọ ahwo eme-ivẹ hẹ,* a rẹ jọ enọ e rẹ da udi buobu hu, a re theuvo erere nọ a rẹ rọ ewhariọ wo ho,  a rẹ jọ enọ e be rọ obruoziẹ-iroro ọfuafo yọrọ ẹrọwọ na, onọ o rrọ oware udidi ọrẹri. 10  Ofariẹ, a rẹ kake dawo ae sọ a te; kẹsena a vẹ jọ idibo iruiruo, nọ a tẹ kare afuẹwẹ. 11  Epọvo na re, eyae e rẹ jọ ahwo nọ a wo osegboja, a rẹ jọ enọ e rẹ ta ahwo raha ha, uruemu rai o rẹ jọ owowa, a re dhesẹ ẹrọwọ evaọ eware kpobi. 12  Idibo iruiruo e rẹ jọ ezae nọ i wo aye ọvo, nọ e be sẹro emọ rai gbe uviuwou rai ziezi. 13  Keme ezae nọ e be gbodibo ziezi a bi mu emamọ odẹ kẹ omarai jẹ sae ta ẹme ududu ziezi kpahe ẹrọwọ na evaọ Kristi Jesu. 14  Me bi kere eware nana se owhẹ dede nọ me bi rẹro nọ mẹ te nyaze kẹle na, 15  re o tẹ via nọ mẹ kake nyaze he, whọ vẹ riẹ epanọ u fo nọ who re yeri evaọ uviuwou Ọghẹnẹ, onọ o rrọ ukoko Ọghẹnẹ nọ ọ rrọ uzuazọ na, odẹẹ gbe otọhotọ uzẹme na. 16  Evaọ uzẹme, oware udidi ọrẹri orọ omarọkẹ Ọghẹnẹ nana yọ okpoware: ‘Ọ romavia evaọ oma uwo, nọ ọ wariẹ zihe ruọ ohwo ẹzi no, a kuenu kẹe inọ o kiẹrẹe, ọ romavia kẹ ikọ-odhiwu, a whowho usi riẹ evaọ erẹwho na, a fi ẹrọwọ họ iẹe evaọ akpọ na, a rehọ e riẹ vrẹ kpohọ ehru avọ oruaro.’

Oruvẹ-Obotọ

Hayo “areghẹ.”
Hayo “ọnọ ọ rẹ kpairoro vrẹ oriẹ, ọ vẹ rọwo orọ amọfa, ọnọ o re si eware kekeke he.”
Hayo “ohwo nọ o wo emamọ odẹ.”
Hayo “kpomovuọ họ iẹe oma ha.”
Hayo “a rẹ viẹ ahwo họ họ.”