Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Timoti 1:1-20

EWARE NỌ E RIẸ EVA

  • Uyere (1, 2)

  • Unuovẹvẹ kpahe otu-iwuhrẹ erue (3-11)

  • Uwowou ulogbo nọ a dhesẹ kẹ Pọl (12-16)

  • Ovie ebẹdẹ bẹdẹ (17)

  • Fi emamọ ẹmo na (18-20)

1  Pọl, ukọ Kristi Jesu wọhọ epaọ oreva Ọghẹnẹ Osiwi mai gbe Kristi Jesu ọnọ ọ rrọ ẹruore mai,  ro se Timoti,* uvi ọmọ evaọ ẹrọwọ na: Jọ Ọghẹnẹ Ọsẹ na gbe Olori mai Jesu Kristi a dhesẹ uwowou ulogbo gbe ohrọ-oriọ kẹ owhẹ jẹ kẹ owhẹ udhedhẹ.  Wọhọ epanọ mẹ tuduhọ owhẹ awọ inọ whọ jọ Ẹfisọs okenọ me je ru re me kpobọ Masidonia, ere ọvona mẹ be vuẹ owhẹ enẹna, re whọ vẹvẹ otujọ unu inọ a wuhrẹ iwuhrẹ erue he,  hayo gaviezọ kẹ iku erue hayo iku uyẹ-ukele he. Eware itieye na e rẹ kẹ erere ọvo ho, ukpoye oware nọ u re no ai ze họ, e rẹ lẹliẹ ahwo ta onọ a roro ku kpobi, yọ i wo uvumọ obọ kugbe eware nọ i bi no obọ Ọghẹnẹ ze he nọ e rẹ bọ ẹrọwọ ga.  Ẹjiroro ohrẹ nana họ re a wo uyoyou nọ u no udu ofuafo ze je no emamọ obruoziẹ-iroro ze je no ẹrọwọ nọ ọ kare eviẹhọ ze.  Fikinọ a bi gbabọkẹ eware nana, otujọ a be roma kẹ eme ifofe.  A gwọlọ jọ enọ i re wuhrẹ ahwo uzi, rekọ a wo otoriẹ eware nọ a be ta ha hayo eware nọ a bi si ikẹ rai kekeke na ha.  Whaọ ma riẹ nọ Uzi na u woma otẹrọnọ ohwo o bi lele iei epanọ u fo,  vuhumu inọ orọnikọ fiki ohwo okiẹrẹe a ro fi uzi họ họ rekọ fiki enọ i re koko uzi hi gbe otu ọwọsuọ, enọ e riẹ Ọghẹnẹ hẹ gbe erahaizi, enọ i re ru ẹme rai gba ha* gbe enọ i re rri eware nọ e rrọ ọrẹri vo, enọ i re kpe esẹ rai no gbe enọ i re kpe ini rai no, enọ i re kpe ahwo, 10  enọ i bi gbe-ọfariẹ,* ezae nọ i re lele ezae wezẹ,* enọ i re mu ahwo rehọ, eterue, enọ i re koko eyaa ha,* gbe eware efa kpobi nọ e wọso omamọ uwuhrẹ* na, 11  onọ u no usi uwoma orọ Ọghẹnẹ evawere na ze, onọ a muhọ omẹ obọ. 12  Me bi yere Kristi Jesu Olori mai, ọnọ ọ kẹ omẹ ogaga, keme o rri omẹ nọ me wo ẹrọwọ, ọ tẹ kẹ omẹ iruo, 13  dede nọ evaọ ọsosuọ mẹ jọ ọnọ ọ jẹ ta eme-aghọ, ọnọ o je kpokpo ilele riẹ, jẹ ta emeẹsọ kẹ ae. Rekọ Ọghẹnẹ ọ re ohrọ mẹ, keme ogbori gbe ababọ ẹrọwọ me je ro ru eware nana. 14  Rekọ Olori mai o dhesẹ uwowou ulogbo kẹ omẹ, a tẹ jẹ kẹ omẹ ẹrọwọ je dhesẹ uyoyou kẹ omẹ evaọ Kristi Jesu. 15  Ẹme nana yọ ẹme nọ a re fievahọ jẹ rọ udu kpobi jẹrehọ, inọ: Kristi Jesu ọ ziọ akpọ na ti siwi erahaizi. Evaọ usu rai mẹ ọ mai yoma. 16  Rekọ, a re ohrọ mẹ re Kristi Jesu ọ rọ ẹkwoma mẹ nọ ọ mai yoma na dhesẹ odiri riẹ kpobi via, ọ rọ omẹ dhesẹ oriruo kẹ enọ i ti fi ẹrọwọ họ iẹe re a wo uzuazọ ebẹdẹ bẹdẹ. 17  Whaọ, jọ Ovie ebẹdẹ bẹdẹ na, ọnọ o re whu hu, ọnọ a rẹ ruẹ hẹ, Ọghẹnẹ ọvo na, o wo ọghọ gbe oruaro bẹdẹ bẹdẹ. Ami. 18  Mẹ be kẹ owhẹ ohrẹ* nana, Timoti ọmọ mẹ, rọwokugbe eruẹaruẹ nọ a ruẹ kpahe owhẹ, inọ whọ te sae rọ ẹkwoma eware nana ruabọhọ fi emamọ ẹmo nọ ma bi fi na, 19  kru ẹrọwọ je wo emamọ obruoziẹ-iroro, enọ otujọ a gbabọkẹ no, u te ru nọ ẹrọwọ rai o ro vru no wọhọ okọ nọ u zue. 20  Himẹnayọs avọ Alẹkzanda a rrọ usu ahwo nana, yọ me siobọno ae kẹ Setan no re a rọ ẹkwoma ọwhọkuo wuhrẹ inọ u fo ho re a ta eme-aghọ.

Oruvẹ-Obotọ

Otọ odẹ na họ “Ọnọ Ọ be Rọ Ọghọ kẹ Ọghẹnẹ.”
Hayo “enọ e kare uyoyou nọ o rẹ hiẹ hẹ.”
Rri oria Otofa Eme, “Ọfariẹ-ogbe.”
Hayo “ezae nọ i re du ezae.”
Hayo “enọ i re duwu-iyei erue.”
Hayo “uwuhrẹ omokpokpọ; uwuhrẹ nọ o rẹ kẹ erere.”
Hayo “uzi.”