Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Pita 4:1-19

EWARE NỌ E RIẸ EVA

  • Yeri uzuazọ kẹ oreva Ọghẹnẹ wọhọ Kristi (1-6)

  • Urere eware kpobi o kẹle no (7-11)

  • Uye-oruẹ fikinọ ohwo ọ rrọ Oleleikristi (12-19)

4  Nọ orọnọ Kristi ọ ruẹ uye okenọ ọ jọ ohwo-akpọ na, whai omarai re wha ruẹrẹ oma kpahe re wha wo oghẹrẹ iroro* riẹ; keme ohwo nọ ọ ruẹ uye evaọ oma uwo na o siobọno uzioraha no,  re ọ gbẹ rehọ edẹ uzuazọ riẹ nọ i kiọkọ evaọ oma uwo na ro yeri uzuazọ kẹ isiuru ahwo-akpọ họ, rekọ rọkẹ oreva Ọghẹnẹ.  Keme oke nọ o vrẹ no nọ wha je ro ru oreva erẹwho na u te, nọ wha je zue evaọ iruemu nọ i fo ho nọ a re ru ababọ omovuọ,* wo isiuru egaga kẹ oware uyoma, jẹ da idi vrẹta, ru ehaa nọ a rẹ jọ ru eware odode, ehaa idieda, gbe edhọgọ etọtọ.  U bi gbe ae unu inọ wha gbe bi kuomagbe ai evaọ iruemu iyoma yena ha, fikiere a tẹ be ta eme iyoma kpahe owhai.  Rekọ ahwo nana a ti gu epanọ a ru te kẹ ọnọ ọ ruẹrẹ oma kpahe no na re o bruoziẹ enọ e rrọ uzuazọ gbe enọ i whu no.  Ẹhẹ, fiki onana a ro whowho usi uwoma na kẹ enọ i whu* no na re, re dede nọ a bruoziẹ rai no evaọ uwo evaọ eriwo ahwo, a vẹ te sae rria uzuazọ rọwokugbe ẹzi na evaọ eriwo Ọghẹnẹ.  Rekọ urere eware kpobi o kẹle no. Fikiere, wha wo iroro egbagba, jẹ jaja aro vi evaọ abọ olẹ.  Maero, wha wo uyoyou ogaga kẹ ohwohwo, keme uyoyou u re ruru izieraha buobu.  Wha hai dede ohwohwo rehọ ababọ ẹgo. 10  Jọ whai omomọvo ọ rehọ okẹ nọ a kẹ riẹ rọ gbodibo kẹ ohwohwo wọhọ emamọ idibo nọ Ọghẹnẹ o dhesẹ uwowou ulogbo riẹ kẹ, onọ o dhesẹ via evaọ idhere sa-sa. 11  Ohwo jọ ọ tẹ be ta ẹme, jọ ọ ta eme nọ i no obọ Ọghẹnẹ ze; ohwo jọ ọ tẹ be gbodibo, jọ ọ rẹroso ẹgba nọ Ọghẹnẹ ọ rẹ kẹ; re a ruẹse rọ oruaro kẹ Ọghẹnẹ evaọ eware kpobi ẹkwoma Jesu Kristi. Ọye o wo oruaro gbe ogaga bẹdẹ bẹdẹ. Ami. 12  Iyoyou, jọ u gbe owhai unu hu inọ edawọ nọ e wọhọ erae i bi te owhai, wọhọ ẹsenọ oware aghẹruẹ jọ o be via kẹ owhai. 13  Ukpoye, wha hae ghọghọ fiki epanọ wha bi wobọ te evaọ uye-oruẹ Kristi, re wha sae te ghọghọ jẹ wereva gaga evaọ oke nọ a ti dhesẹ oruaro riẹ via. 14  A tẹ be la owhai eka* fiki odẹ Kristi, jọ eva e were owhai, keme u dhesẹ nọ wha wo ẹzi oruaro, koyehọ ẹzi Ọghẹnẹ. 15  Rekọ jọ ohwo ọvo evaọ usu rai ọ ruẹ uye fikinọ ọ rrọ ogbulegbu hayo oji hayo orumuomu hayo ọnọ o re dhomahọ eme amọfa ha. 16  Rekọ otẹrọnọ ohwo jọ ọ be ruẹ uye fikinọ ọ rrọ Oleleikristi, jọ oma o vuọ iẹe he, rekọ jọ ọ gbẹ hae kẹ Ọghẹnẹ oruaro nọ a be rọ odẹ nana sei na. 17  Keme enẹna họ oke nọ a fihọ nọ ẹdhoguo na o re ro muhọ, yọ uwou Ọghẹnẹ o ti jo muhọ. Whaọ otẹrọnọ mai u bi ro muhọ, kọ ẹvẹ o te jọ kẹ enọ e rọwo yoẹme kẹ usi uwoma Ọghẹnẹ na ha? 18  “Yọ otẹrọnọ udugaga a bi ro siwi ohwo okiẹrẹe, kọ eme ọ te via kẹ ohwo nọ ọ riẹ Ọghẹnẹ hẹ gbe ọrahauzi?” 19  Fikiere, jọ enọ e be ruẹ uye fikinọ a bi ru oreva Ọghẹnẹ a gbẹ hai mu omarai họ obọ Ọmemama nọ o re ru oware nọ o gba ẹsikpobi na jẹ ruabọhọ ewoma oruo.

Oruvẹ-Obotọ

Hayo “ọtamuo.”
Hayo “iruemu etọtọ nọ a re ru odode.” Evaọ Griki, a·selʹgei·a. U dhesẹ aro nọ a re keke fihọ raha izi Ọghẹnẹ avọ orivo gbe ababọ omovuọ.
Onana o be ta kpahe enọ e wọhọ ahwo nọ a whu no fiki izieraha rai. Rri Ẹf 2:1.
Hayo “pọviẹ owhai.”