Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Jọn 4:1-21

EWARE NỌ E RIẸ EVA

  • Dawo eme nọ a ta nọ i no obọ Ọghẹnẹ ze (1-6)

  • Ẹriẹ gbe eyou Ọghẹnẹ (7-21)

    • “Ọghẹnẹ họ uyoyou” (8, 16)

    • Ohwo nọ o wo uyoyou ọ rẹ dhozọ họ (18)

4  Iyoyou, wha du rọwo ẹme kpobi nọ a ta nọ o no obọ Ọghẹnẹ ze* he, rekọ wha dawo eme nọ a ta nọ i no obọ Ọghẹnẹ ze* re wha ruẹ sọ obọ Ọghẹnẹ i no ze, keme eruẹaro erue buobu e romavia no evaọ akpọ na.  Enẹ wha rẹ rọ riẹ ẹme nọ o no obọ Ọghẹnẹ ze: Ẹme kpobi nọ a jọ rọwo nọ Jesu Kristi ọ nyaze akpọ na wọhọ ohwo-akpọ, o no obọ Ọghẹnẹ ze.  Rekọ ẹme kpobi nọ a jọ rọwo Jesu hu o no obọ Ọghẹnẹ ze he. Ofariẹ, onana họ ẹme ọnọ ọ rọ so Kristi na nọ wha yo inọ o ti whowho, yọ o bi whowho iei evaọ akpọ na enẹna.  Emọ esese, abọ Ọghẹnẹ wha rrọ, yọ wha fi rai kparobọ no keme ọnọ wha gbẹ rrọ usu ọ rro vi ọnọ akpọ na ọ rrọ usu kugbe.  Abọ akpọ na a rrọ; oyejabọ a be rọ ta eware nọ i no akpọ na ze yọ akpọ na ọ be gaviezọ kẹ ae.  Abọ Ọghẹnẹ ma rrọ. Ohwo kpobi nọ ọ riẹ Ọghẹnẹ ọ rẹ gaviezọ kẹ omai; ohwo kpobi nọ ọ rrọ abọ Ọghẹnẹ hẹ ọ rẹ gaviezọ kẹ omai hi. Ẹkwoma onana ma rẹ rọ riẹ ẹme uzẹme nọ o no obọ Ọghẹnẹ ze gbe ẹme ọrue nọ a ta nọ o no obọ Ọghẹnẹ ze.  Iyoyou, wha joma you ohwohwo ẹsikpobi, keme obọ Ọghẹnẹ uyoyou u no ze, yọ ohwo kpobi nọ o wo uyoyou yọ ọmọ Ọghẹnẹ ọ tẹ jẹ riẹ Ọghẹnẹ.  Ohwo kpobi nọ o wo uyoyou hu ọ re riẹ Ọghẹnẹ hẹ, keme Ọghẹnẹ họ uyoyou.  Ẹkwoma onana Ọghẹnẹ o ro dhesẹ uyoyou riẹ kẹ omai, Ọghẹnẹ o vi Ọmọ ọvo riẹ ziọ akpọ na re ma ruẹsi wo uzuazọ ẹkwoma riẹ. 10  Enẹ o ro dhesẹ uyoyou na, orọnọ fikinọ ma you Ọghẹnẹ hẹ, rekọ ọye o you omai o te vi Ọmọ riẹ ze ro dhe idhe* fiki izieraha mai, idhe nọ o be ruẹrẹ omai họ kugbei. 11  Iyoyou, nọ Ọghẹnẹ o you omai enẹ na, o gba omai họ nọ ma re you ohwohwo re. 12  Ohwo ọvo ọ re ruẹ Ọghẹnẹ oke ovo ho. Ma te bi you ohwohwo ẹsikpobi, Ọghẹnẹ ọ rẹ jọ kugbe omai, yọ ma ti dhesẹ uyoyou riẹ vọvọ. 13  Ẹkwoma onana ma rọ riẹ nọ ma rrọ usu kugbei yọ ọ rrọ usu kugbe omai, keme ọ kẹ omai ẹzi riẹ. 14  U te no ere no, mai omamai ma rehọ ibiaro mai ruẹ je bi se isẹri inọ Ọsẹ na o vi Ọmọ riẹ ze ti siwi akpọ na. 15  Ohwo kpobi nọ ọ rọwo nọ Jesu Kristi yọ Ọmọ Ọghẹnẹ, Ọghẹnẹ ọ rrọ usu kugbe ohwo otiọye yọ ọyomariẹ ọ rrọ usu kugbe Ọghẹnẹ. 16  Ma riẹ jẹ rọwo nọ Ọghẹnẹ o you omai. Ọghẹnẹ họ uyoyou, yọ ohwo nọ o wo uyoyou ẹsikpobi ọ rrọ usu kugbe Ọghẹnẹ yọ Ọghẹnẹ ọ rrọ usu kugbei. 17  Fiki onana ma re dhesẹ uyoyou vọvọ, re ma sae ta ẹme ududu evaọ ẹdẹ ẹdhoguo, keme wọhọ epanọ ọyena ọ rrọ, ere ma rrọ re evaọ akpọ nana. 18  Ohwo nọ o wo uyoyou ọ rẹ dhozọ họ, uvi uyoyou u re si* ozọ no, keme ozọ o rẹ rọ ifi gba ohwo. Ẹhẹ, ohwo nọ ọ rẹ dhozọ ọ rẹ sai dhesẹ uyoyou vọvọ họ. 19  Ma wo uyoyou keme ọye ọ kaki you omai. 20  Ohwo jọ ọ tẹ be ta nọ, “Me you Ọghẹnẹ,” rekọ o bi mukpahe oniọvo riẹ, ọtọrue ọ rrọ. Keme ohwo nọ o you oniọvo riẹ hẹ, ọnọ ọ be ruẹ, ọ rẹ sai you Ọghẹnẹ hẹ, ọnọ ọ re ruẹ hẹ. 21  Yọ ọ kẹ omai ujaje nana, inọ ohwo kpobi nọ o you Ọghẹnẹ o re you oniọvo riẹ hrọ re.

Oruvẹ-Obotọ

Evaọ Griki, “ẹzi kpobi.”
Evaọ Griki, “izi na.”
Hayo “dhe idhe omavoro; ọnọ a re ro kie ofu.”
Hayo “le.”