Kpohọ eme nọ e riẹ eva

Kpohọ oria izoẹme

1 Ahwo Tẹsalonika 2:1-20

EWARE NỌ E RIẸ EVA

  • Odibọgba Pọl evaọ Tẹsalonika (1-12)

  • Ahwo Tẹsalonika a jẹ ẹme Ọghẹnẹ rehọ (13-16)

  • Pọl ọ jẹ gwọlọ nọ ọ rẹ ruẹ inievo Tẹsalonika (17-20)

2  Whai omarai wha riẹ vevẹ, inievo, inọ iweze nọ ma weze bru owhai ze e jọ uvrẹvru hu.  Keme dede nọ ma ruẹ uye, a te je gboja kẹ omai evaọ Filipai wọhọ epanọ wha riẹ, ma kru udu ga ẹkwoma obufihọ Ọghẹnẹ mai ro whowho usi uwoma Ọghẹnẹ kẹ owhai evaọ udevie ọwọsuọ ọgaga.  Keme orọnikọ iroro ethọthọ hayo iroro igbegbe hayo eviẹhọ ma rọ tuduhọ owhai awọ họ,  rekọ, nọ orọnọ Ọghẹnẹ o rri omai nọ ma te o je mu usi uwoma na họ omai obọ na, ma be ta ẹme, orọnikọ re ma ruẹsi ru ahwo-akpọ eva were he rekọ Ọghẹnẹ, ọnọ ọ be kiẹ udu mai riwi.  Uzẹme, wha riẹ nọ ma ta eme eviẹhọ ro jiri owhai hi hayo rehọ oma ọviẹwẹ lele owhai yeri fiki uvou-uthei hi; Ọghẹnẹ họ osẹri mai!  Yọ ma be gwọlọ ajiri nọ o re no obọ ahwo ze he, evaọ obọ rai hayo obọ amọfa jọ, dede nọ ma rẹ sai ru omamai họ owha ogbẹgbẹdẹ kẹ owhai fikinọ mai yọ ikọ Kristi.  Ukpoye, ma jọ wolẹ evaọ udevie rai wọhọ epaọ oniọmọ nọ ọ be romatotọ rẹrote emọboba riẹ.  Fikinọ ma you owhai gaga, ma gba riẹ mu* nọ orọnikọ usi uwoma Ọghẹnẹ ọvo ma rẹ ta kẹ owhai hi rekọ te uzuazọ mai nọ ma re siobọno fiki rai keme wha rrọ ghaghae kẹ omai gaga.  Inievo, mẹ riẹ nọ wha kareghẹhọ iruo egaga gbe omolahiẹ mai. Ma je ru iruo taso tuvo re ma gbẹ jọ owha ogbẹgbẹdẹ kẹ owhai ọvuọvo ho okenọ ma je whowho usi uwoma Ọghẹnẹ kẹ owhai. 10  Wha sai se isẹri onana, yọ Ọghẹnẹ ọ riẹ re inọ ma dhesẹ nọ mai yọ enọ a re fievahọ, enọ i kiẹrẹe, jẹ kare afuẹwẹ evaọ oghẹrẹ nọ ma ro yerikugbe owhai. 11  Wha riẹ nọ ma jẹ tuduhọ owhai awọ jẹ sasa owhai oma jẹ kẹ owhai omomọvo ohrẹ, wọhọ epanọ ọsẹ o re ru emọ riẹ, 12  re wha sae gbẹ nya evaọ edhere nọ ọ rẹ were Ọghẹnẹ, ọnọ o bi se owhai ziọ Uvie gbe oruaro riẹ na. 13  Ẹhẹ, oyejabọ nọ ma bi ro yere Ọghẹnẹ ẹsikpobi na, keme nọ wha yo ẹme Ọghẹnẹ, onọ wha jọ unu mai yo, wha jẹ riẹ rehọ, orọnikọ wọhọ ẹme ahwo-akpọ họ rekọ wọhọ epanọ o ginẹ rrọ, ẹme Ọghẹnẹ, onọ u bi ru iruo evaọ omarai enọ e rọwo na. 14  Keme inievo, wha rọ aro kele ikoko Ọghẹnẹ nọ e rrọ usu kugbe Kristi Jesu evaọ Judia, keme wha jọ obọ ahwo orẹwho rai ruẹ uye nọ ae omarai a be ruẹ re evaọ obọ ahwo Ju, 15  enọ i tube kpe Olori na Jesu gbe eruẹaro na je kpokpo omai. Ofariẹ, a bi ru Ọghẹnẹ eva were he rekọ a be wọso oware nọ o rẹ wha ewoma se ahwo kpobi, 16  keme a be daoma whaha omai re ma gbẹ ta usi uwoma kẹ ahwo erẹwho na ha re a sae zọ. A be rọ enẹ ru izieraha rai vọ kpọhọhwẹ ẹsikpobi. Rekọ ofu riẹ o bru rai ze no. 17  Inievo, nọ a hẹriẹ omai no owhai evaọ omoke jọ (nọ ma gbẹ jẹ ruẹ owhai hi, rekọ wha jọ udu mai), ma dawo edhere kpobi re ma ruẹ owhai fiki isiuru egaga nọ ma wo kpahe owhai. 18  Fiki onana ma jẹ gwọlọ nọ ma rẹ nya bru owhai ze, ẹhẹ, mẹ Pọl, mẹ daoma orọnikọ ẹsiẹvo ho rekọ isiava soso; ghele na Setan o bru omẹ dhe. 19  Kọ eme họ ẹruore mai hayo oghọghọ mai hayo etu-uvie evawere mai evaọ aro Olori na evaọ oke ọzino* riẹ? Kọ ogbẹrọnọ owhai? 20  Ababọ avro, whai họ oruaro gbe oghọghọ mai.

Oruvẹ-Obotọ

Evaọ Griki, “o were omai.”
Rri oria Otofa Eme.