Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 9:1-27

EWARE NỌ E RIẸ EVA

  • Oriruo nọ Pọl ukọ na o fihọ otọ (1-27)

    • “Whọ rẹ gba unu eruẹ vievie he” (9)

    • ‘Uye u te omẹ nọ mẹ gbẹ be ta usi uwoma na ha!’ (16)

    • O zihe ruọ eware kpobi kẹ ahwo kpobi (19-23)

    • Oma-onyẹ evaọ ohrẹ uzuazọ na (24-27)

9  Kọ me gbe wo udu nọ me re ro ru oware nọ mẹ gwọlọ? Kọ mẹ gbẹ rrọ ukọ? Kọ mẹ gbẹ ruẹ Jesu Olori mai? Kọ ogbẹrọnọ whai họ erere iruo mẹ evaọ Olori na?  Mẹ gbẹ make rrọ ukọ kẹ amọfa ha, ababọ avro, mẹ yọ ukọ kẹ owhai. Keme whai họ oka nọ u bi dhesẹ nọ mẹ yọ ukọ evaọ Olori na.  Onana họ ẹkẹ-unu mẹ rọkẹ enọ i bi gu omẹ ẹdhọ:  Ma wo udu nọ ma rẹ rọ re jẹ da, o gbẹ rrọ ere?  Ma wo udu nọ ma re ro wo aye nọ ọ rrọ Oleleikristi nọ o re lele omai, wọhọ epaọ ikọ edekọ gbe inievo Olori na gbe Sifas,* o gbẹ rrọ ere?  Hayo kọ mẹ avọ Banabas ọvo ma wo udu nọ ma rẹ rọ siọ okọ ba ha?  Kọ osoja vẹ o re ru iruo yọ ọyọvo ọ be kuọ omariẹ? Ono ọ rẹ kọ ọgbọ nọ ọ rẹ re ibi riẹ hẹ? Hayo kọ ono o re thuru erao nọ ọ rẹ da ame-ivie rai hi?  Kọ eriwo ohwo-akpọ mẹ be rọ ta onana? Kọ Uzi na o gbẹ ta eware nana re?  Keme a kere evaọ Uzi Mosis na nọ: “Whọ rẹ gba unu eruẹ vievie he nọ ọ tẹ be kpare eka.”* Kọ iruẹ Ọghẹnẹ ọ be ruawa kpahe? 10  Manikọ ginọ fiki mai ọ rọ ta onana? Evaọ uzẹme, fiki mai a ro kere iei, keme ohwo nọ o bi kporo udhu gbe ọnọ ọ be kpare eka o re ru ere avọ irẹro inọ ojọ u ti tei unu. 11  Otẹrọnọ ma kọ eware nọ i no obọ Ọghẹnẹ ze evaọ udevie rai, kọ okpoware o rrọ nọ ma te wo eware nọ ma rẹ rọ rẹrote oma mai mi owhai? 12  Otẹrọnọ amọfa a wo udu nọ a re ro wo obufihọ mi owhai, kọ ma gbe wo udu yena vi ae dede? Ghele na, ma be rehọ udu nana ruiruo ho, rekọ ma bi thihakọ eware kpobi, re ma gbẹ rehọ edhere ọvuọvo fi ọzadhe họ usi uwoma kpahe Kristi na ha. 13  Kọ wha gbẹ riẹ nọ ezae nọ i re ru iruo evaọ etẹmpol na a re wo emu rai no etẹmpol na ze, yọ ahwo nọ a re ru iruo ẹsikpobi evaọ agbada-idhe na a re lele agbada-idhe na re eware nọ a ro dhe idhe na? 14  Ere ọvona re, Olori na ọ kẹ ujaje inọ enọ e be ta usi uwoma na a rẹ rọ ẹkwoma usi uwoma na kuọ omarai. 15  Rekọ mẹ be rehọ eruẹrẹfihotọ nana ọvuọvo ruiruo ho. Evaọ uzẹme, orọnikọ me bi kere eware nana re wha ruẹsi ru onana kẹ omẹ hẹ, keme o te mai woma re me whu viukpenọ me re ru re ohwo jọ o mi omẹ udu nọ me bi ro seha na! 16  Whaọ, me te bi whowho usi uwoma na, onana o kẹ omẹ udu nọ me re ro seha ha, keme o gba omẹ họ. Evaọ uzẹme, uye u te omẹ nọ me gbe whowho usi uwoma na ha! 17  Mẹ tẹ be rọ unevaze ru onana, me re wo osohwa; rekọ me te bi ru ei dede nọ o were omẹ hẹ, o gbẹ rrọ iruo nọ a muhọ omẹ obọ. 18  Nọ o rrọ ere na, kọ eme họ osohwa mẹ? Nọ me bi whowho usi uwoma na, me bi whowho iei ọvọvẹ, re mẹ gbẹ rehọ udu nọ me wo evaọ usi uwoma na ruiruo vrẹta ha. 19  Keme dede nọ mẹ rrọ ọrigbo kẹ ohwo ọvo ho, me ru omamẹ ọrigbo kẹ ahwo kpobi no, re mẹ ruẹsi wo ahwo buobu tobọ. 20  Rọkẹ ahwo Ju, me ru omamẹ wọhọ ohwo Ju re mẹ sai wo ahwo Ju tobọ; rọkẹ enọ e rrọ otọ uzi, me ru omamẹ wọhọ ọnọ ọ rrọ otọ uzi, dede nọ mẹ rrọ otọ uzi hi, re mẹ sai wo enọ e rrọ otọ uzi tobọ. 21  Rọkẹ enọ e rrọ ababọ uzi, me ru omamẹ wọhọ ẹsenọ mẹ rrọ ababọ uzi, dede nọ me bi koko uzi Ọghẹnẹ jẹ rrọ otọ uzi Kristi, re mẹ sai wo enọ e rrọ ababọ uzi tobọ. 22  Rọkẹ enọ e ga ha, me zihe ruọ ọnọ ọ ga ha re mẹ sai wo enọ e ga ha tobọ. Me zihe ruọ eware kpobi no kẹ oghẹrẹ ahwo kpobi, re mẹ sae rehọ edhere kpobi nọ o rẹ sae lọhọ siwi ejọ. 23  Rekọ me bi ru eware kpobi fiki usi uwoma na, re mẹ sai whowho iei kẹ amọfa. 24  Kọ wha gbẹ riẹ nọ evaọ ohrẹ-odhẹ, edhẹ-ohrẹ na kpobi a rẹ dhẹ, rekọ ọvo o re wo osa na? Wha dhẹ evaọ oghẹrẹ nọ wha sai ro wo osa na. 25  Ohwo kpobi nọ o bi wobọ evaọ arozaha oma-uhrowo ọ rẹ nyẹ oma evaọ eware kpobi. Whaọ, a re ru onana re a wo osa etu-idodo nọ o rẹ sae raha, rekọ mai kọ etu-uvie nọ o rẹ raha ha. 26  Fikiere, oghẹrẹ nọ mẹ be dhẹ o rrọ ugbẹdhẹ hẹ; oghẹrẹ nọ mẹ be bọwo ego mẹ o rrọ oghẹrẹ nọ mẹ gbẹ rọ bọwo ofou hu; 27  rekọ mẹ be gba* oma mẹ je bi su ei wọhọ ọrigbo, re nọ mẹ tẹ ta usi uwoma kẹ amọfa no, Ọghẹnẹ ọ gbẹ siọ omẹ hẹ.*

Oruvẹ-Obotọ

Nọ a re je se Pita.
A jẹ hae rọ iruẹ ro thihi eka nọ a kwa koko, rọ ere kpare eka na no igbe na. Hayo a re thuru oware jọ si iruẹ na, nọ i bi si oware na nya wariẹ na, eka na e vẹ be kpare no igbe na.
Hayo “rọ uye bẹ; rọ obọ ogaga kpọ.”
Hayo “ta nọ me gbe te he he.”