Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 7:1-40

EWARE NỌ E RIẸ EVA

  • Ohrẹ kẹ enọ e re rọo ho gbe enọ e rọo no (1-16)

  • Gbẹ jọ epanọ whọ jọ nọ a se owhẹ (17-24)

  • Enọ e rọo ho gbe eyae-uku (25-40)

    • Irere nọ i re te ohwo nọ ọ rọo ho (32-35)

    • Rọo “evaọ Olori na ọvo” (39)

7  Whaọ kpahe eware nọ wha kere se omẹ na, o mai woma otẹrọnọ ọzae ọ rọ obọ te* aye he;  rekọ fiki ọfariẹ-ogbe* nọ ọ da otọ fia, jọ ọzae kpobi o wo aye obọriẹ, jọ aye kpobi o wo ọzae obọriẹ.  Jọ ọzae o ru ẹgwọlọ* aye riẹ kẹe, jọ aye omariẹ o ru epọvo na kẹ ọzae riẹ re.  Aye o wo udu oma obọriẹ hẹ, rekọ ọzae riẹ o wo rie; epọvo na re, ọzae o wo udu oma obọriẹ hẹ rekọ aye riẹ o wo rie.  Wha rehọ iẹe gbọ ohwohwo ogbọ họ ajokpanọ whai imava wha rọwo fihọ iẹe rọkẹ omoke jọ, re wha ruẹse raha oke ziezi kẹ olẹ, wha vẹ wariẹ kuomagbe, re Setan ọ gbẹ dawo owhai hi fikinọ wha be sae nyẹ oma ha.  Rekọ mẹ be ta onana wọhọ oware nọ wha rẹ sai ru orọnikọ uzi me bi fihọ họ.  Rekọ, dodokọ ahwo kpobi a rẹ jọ epanọ mẹ rrọ na. Rekọ, ohwo kpobi o wo ọvuọ okẹ nọ Ọghẹnẹ ọ kẹ riẹ, ọjọ oghẹrẹ nana, ọfa kọ oghẹrẹ yena.  Whaọ mẹ be ta kẹ enọ e rọo ho* gbe eyae-uku inọ o mai woma kẹ ae otẹrọnọ a rẹ jọ wọhọ epanọ mẹ rrọ na.  Rekọ otẹrọnọ a be sae nyẹ oma rai hi, jọ a rọo, keme o mai woma re ohwo ọ rọo viukpenọ isiuru owezẹ ọzae-avọ-aye e rẹ dae oma fia. 10  Mẹ be kẹ enọ e rọo no ehrẹ nana, yọ orọnọ omẹ hẹ rekọ Olori na, inọ aye ọ rẹ hẹriẹ no ọzae riẹ hẹ. 11  Rekọ otẹrọnọ ọ hẹriẹ, jọ ọ rọo ho, hayo jọ ọ ruẹrẹhọ kugbe ọzae riẹ; yọ ọzae ọ rẹ nyasiọ aye riẹ ba ha. 12  Rekọ mẹ be ta kẹ enọ i kiọkọ, ẹhẹ, mẹ, orọnikọ Olori na ha: Otẹrọnọ oniọvo jọ o wo aye nọ ọ rrọ Oleleikristi hi, yọ o were aye na nọ ọ rẹ rria kugbei, jọ ọ nyasiọ aye na ba ha; 13  yọ otẹrọnọ aye jọ o wo ọzae nọ ọ rrọ Oleleikristi hi, yọ o were ọzae na nọ ọ rẹ rria kugbei, jọ ọ nyasiọ ọzae riẹ ba ha. 14  Keme ọzae nọ ọ rrọ Oleleikristi hi na ọ fo fiki usu riẹ kugbe aye riẹ, yọ aye nọ ọ rrọ Oleleikristi hi na ọ fo fiki usu riẹ kugbe oniọvo na; o gbẹ rrọ ere he, emọ rai a hae jọ enọ e fo ho evaọ aro Ọghẹnẹ, rekọ enẹna a rrọ ọrẹri. 15  Rekọ otẹrọnọ ọnọ ọ rrọ Oleleikristi hi na ọ jiroro nọ o bi no orọo na, jọ o no; uzi ovo o gba oniọvo-ọmọzae hayo oniọvo-ọmọtẹ evaọ otọ uyero utioye na ha, rekọ Ọghẹnẹ o se owhai ziọ udhedhẹ no. 16  Keme aye, ẹvẹ whọ rọ riẹ sọ whọ sai ti siwi ọzae ra ha? Hayo, ọzae, ẹvẹ whọ rọ riẹ sọ whọ sai ti siwi aye ra ha? 17  Rekọ, wọhọ epaọ onọ Jihova* ọ kẹ omomọvo, jọ ohwo kpobi ọ nya evaọ uyero riẹ nọ Ọghẹnẹ ọ jọ sei na. Fikiere mẹ be kẹ ohrẹ nana evaọ ikoko na kpobi. 18  Kọ ohwo jọ ọ riẹ nọ a yawo no evaọ okenọ a ro sei? Jọ ọ jọ ere ọvo. Kọ a se ohwo jọ avọ epanọ ọ re rọ yawo ho? Jọ ọ yawo ho. 19  Oyawo o roja ha, yọ ababọ oyawo o roja ha; oware nọ o roja họ ekoko ijaje Ọghẹnẹ. 20  Evaọ uyero kpobi nọ a jọ se ohwo, jọ ọ jọ ere. 21  Kọ a se owhẹ avọ epanọ whọ rọ rrọ ọrigbo? Jọ o kẹ owhẹ uye he; rekọ otẹrọnọ whọ sai si omara no igbo, ru ere. 22  Keme ohwo kpobi nọ a se evaọ Olori na avọ epanọ ọ rọ rrọ ọrigbo yọ odibo Olori na nọ a si no igbo no; epọvo na re, ohwo kpobi nọ a se avọ epanọ ọ rọ rrọ ọmuyẹ yọ ọrigbo Kristi. 23  A hwa osa rọ dẹ owhai; wha gbẹ jọ erigbo ahwo ho. 24  Evaọ uyero kpobi nọ a jọ se omomọvo, inievo, jọ ọ jọ ere evaọ aro Ọghẹnẹ. 25  Kpahe enọ e riẹ ọzae hayo aye he,* me wo uvumọ uzi no obọ Olori na ze he, rekọ mẹ be ta iroro mẹ keme Olori na o dhesẹ ohrọ-oriọ kẹ omẹ re me wo ẹrọwọ. 26  Fikiere, me roro nọ o mai woma re ọzae ọ gbẹ jọ epanọ ọ rrọ fiki uyero obẹbẹ nọ ma rrọ enẹna. 27  Kọ who wo aye? Whọ gbẹ gwọlọ epanọ who re ro siobọnoi hi. Kọ whọ rrọ ababọ aye? Whọ gbẹ gwọlọ aye he. 28  Rekọ whọ tẹ make rọo, whọ raha uzi hi. Yọ otẹrọnọ ọnọ ọ riẹ ọzae hayo aye he ọ rọo, ohwo yena ọ raha uzi hi. Ghele na, enọ e rọo a re wo uye evaọ oma rai. Rekọ mẹ be gwọlọ thọ owhai no uye. 29  Ofariẹ, inievo, mẹ be ta nọ, oke nọ u kiọkọ u tulo ho. No enẹna vrẹ, jọ enọ i wo eyae a jọ wọhọ enọ i wo ho, 30  yọ enọ e be viẹ a jọ wọhọ enọ e be viẹ hẹ, enọ e be ghọghọ a jọ wọhọ enọ e be ghọghọ họ, enọ e be dẹ a jọ wọhọ enọ i wo ho, 31  enọ e be rọ akpọ na ruiruo a jọ wọhọ enọ e be rehọ iẹe ruiruo vọvọ họ; keme uyero akpọ nana u bi nwene. 32  Evaọ uzẹme, mẹ gwọlọ nọ wha wo awaọruọ họ. Ọzae nọ ọ rọo ho ọ rẹ ruawa kpahe eware Olori na, epanọ o re ro wo ọjẹrehọ Olori na. 33  Rekọ ọzae nọ ọ rọo ọ rẹ ruawa kpahe eware akpọ na, epanọ o re ro wo ọjẹrehọ aye riẹ, 34  yọ iroro riẹ e hẹriẹ no. Ofariẹ, aye nọ ọ rọo ho gbe ọmọtẹ-kọkọ* a rẹ ruawa kpahe eware Olori na, re a ruẹse jọ ọrẹri evaọ ugboma rai gbe ẹzi rai. Rekọ aye nọ ọ rọo no ọ rẹ ruawa kpahe eware akpọ na, epanọ o re ro wo ọjẹrehọ ọzae riẹ. 35  Mẹ be ta onana rọkẹ erere obọrai, orọnikọ re mẹ whaha owhai oware jọ họ,* rekọ re o wọ owhai ru oware nọ u kiehọ gbe re wha wo oke nọ wha rẹ rọ gbodibo kẹ Olori na kẹse kẹse ababọ oware jọ nọ o rẹ rehọ iroro rai. 36  Rekọ otẹrọnọ ohwo jọ o roro nọ ọ te gbẹ sae gba omariẹ hẹ nọ ọ gbẹ rọo ho, yọ ọ vrẹ udhudhu ọmoha no, enẹ u fo nọ o re ru: Jọ o ru oware nọ ọ gwọlọ; ọ raha uzi hi. Jọ a rọo. 37  Rekọ ohwo jọ ọ tẹ gbaemu no evaọ udu riẹ yọ oware ovo o gba riẹ họ họ, yọ o wo ogaga nọ ọ sai ro ru onọ o rrọ udu riẹ, ọ tẹ jẹ jọ udu riẹ jiroro na no inọ ọ rẹ rọo ho, ọ te riẹ ru. 38  Fikiere, ohwo kpobi nọ ọ rọo ọ te riẹ ru, rekọ ohwo kpobi nọ ọ rọo ho ọ te mae riẹ ru. 39  O gba aye họ nọ ọ rẹ jọ kugbe ọzae riẹ nọ ọzae riẹ ọ rrọ uzuazọ na. Rekọ ọzae riẹ o te whu,* ọ rẹ sae rọo ọzae kpobi nọ u je rie, rekọ evaọ Olori na ọvo. 40  Rekọ evaọ iroro mẹ, ọ rẹ mai wo evawere nọ ọ gbẹ wariẹ rọo ho; yọ u mu omẹ ẹro nọ me wo ẹzi Ọghẹnẹ re.

Oruvẹ-Obotọ

Koyehọ, re a lele aye wezẹ. Rri Itẹ 6:29.
Evaọ Griki, por·neiʹa. Rri oria Otofa Eme.
Koyehọ, ẹgwọlọ owezẹ ọzae-avọ-aye.
Ẹme Griki na ọ sai je dhesẹ ohwo nọ ọzae hayo aye riẹ o whu no hayo ọnọ orọo riẹ o fa no.
Rri oria Otofa Eme.
Hayo “enọ e re rọo ẹdẹvo ho.”
Hayo “ọmọtẹ nọ ọ riẹ ọzae he.”
Evaọ Griki, “rọ ifi gba owhai hi.”
Evaọ Griki, “kie ruọ owezẹ uwhu.”