Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 3:1-23

EWARE NỌ E RIẸ EVA

  • Inievo Kọrint a gbe wo eriwo ohwo-akpọ (1-4)

  • Ọghẹnẹ o re ru ei rro (5-9)

    • Ibe iruiruo Ọghẹnẹ (9)

  • Rehọ ekwakwa nọ e rẹ to ho bọ (10-15)

  • Whai yọ etẹmpol Ọghẹnẹ (16, 17)

  • Areghẹ akpọ na yọ ugheghẹ evaọ obọ Ọghẹnẹ (18-23)

3  Fikiere, inievo, mẹ jẹ sae ta ẹme kẹ owhai wọhọ ahwo nọ ẹzi Ọghẹnẹ ọ be kpọ họ, rekọ wọhọ enọ i wo eriwo ohwo-akpọ, wọhọ emọboba evaọ Kristi.  Ame-ivie mẹ rọ kuọ owhai, orọnikọ emu ọgbẹgbẹdẹ hẹ, keme oke yena wha re kpako te he. Ẹhẹ, makọ enẹna dede wha re kpako te he,  keme wha gbe wo eriwo ohwo-akpọ. Nọ orọnọ ihri-eriọ gbe ẹwhọ e rrọ udevie rai na, kọ ogbẹrọnọ enọ i wo eriwo ohwo-akpọ wha rrọ je bi ru wọhọ ahwo akpọ na?  Keme nọ ọjọ ọ tẹ be ta nọ, “Mẹ ọrọ Pọl,” rekọ ọfa nọ, “Mẹ ọrọ Apọlọs,” kọ ogbẹrọnọ eruo ahwo akpọ na wha bi ru na?  Kọ ono họ Apọlọs? Ẹhẹ, ono họ Pọl? Egbodibo nọ i fiobọhọ kẹ owhai kurẹriẹ, wọhọ epaọ iruo nọ Olori na ọ kẹ omomọvo.  Ẹkọ mẹ kọ, Apọlọs o te ku ame ku ei, rekọ Ọghẹnẹ o te bi ru ei rro,  fikiere ọnọ ọ kọ hayo ọnọ o ku ame ku a te oware ovo ho, rekọ Ọghẹnẹ nọ o bi ru ei rro.  Whaọ te ọnọ ọ be kọ gbe ọnọ o bi ku ame ku ei yọ ọvo,* rekọ omomọvo o ti wo osohwa riẹ wọhọ epaọ iruo riẹ.  Keme mai yọ ibe iruiruo Ọghẹnẹ. Whai yọ udhu Ọghẹnẹ nọ ọ be kọ jẹ rẹrote, uwou Ọghẹnẹ. 10  Fiki uwowou ulogbo nọ Ọghẹnẹ o dhesẹ kẹ omẹ, mẹ wọ otọhotọ họ wọhọ ọnọ o wuzou ebabọ nọ ọ riẹ iruo ziezi,* rekọ omọfa jọ ọ be bọ họ ehru riẹ. Rekọ jọ omomọvo o muẹrohọ epanọ ọ be bọ fihọ ehru riẹ. 11  Keme ohwo ọvo ọ sae wọ otọhotọ ofa họ vi onọ a wọ họ no na ha, koyehọ Jesu Kristi. 12  Whaọ otẹrọnọ ohwo jọ ọ rehọ igoru, isiliva, itho eghaghae, ire, ẹbe-ọyaya, hayo ebiesa bọ fihọ otọhotọ na, 13  a ti dhesẹ iruo omomọvo via wọhọ epanọ e rrọ, keme a te rọ erae dhesẹ iẹe via evaọ ẹdẹ yena, erae na i ti dhesẹ oghẹrẹ nọ iruo omomọvo e rrọ via. 14  Otẹrọnọ oware nọ ohwo ọ bọ fihọ otọhotọ na o to ho, o ti wo osohwa; 15  otẹrọnọ oware nọ ohwo ọ bọ o to, eware riẹ i ti vru, rekọ a ti siwi ọyomariẹ; ghele na, o te wọhọ ẹsenọ ọ vabọ no erae ze. 16  Kọ wha gbẹ riẹ nọ whai omarai yọ etẹmpol Ọghẹnẹ gbe inọ ẹzi Ọghẹnẹ ọ rrọ udevie rai? 17  Ohwo jọ ọ tẹ be raha etẹmpol Ọghẹnẹ, Ọghẹnẹ ọ te raha iẹe; keme etẹmpol Ọghẹnẹ ọ rrọ ọrẹri, yọ whai họ etẹmpol yena. 18  Ajọ ohwo ọvo ọ viẹ omariẹ họ họ: Ohwo jọ evaọ usu rai o te bi roro nọ o wo areghẹ evaọ uyero-akpọ* nana, jọ o ru omariẹ họ ohwo ogheghẹ, re ọ sai wo areghẹ. 19  Keme areghẹ akpọ nana yọ ugheghẹ evaọ obọ Ọghẹnẹ, keme a kere nọ: “O re mu iwareghẹ na evaọ ẹghẹ rai.” 20  Ofariẹ: “Jihova* ọ riẹ nọ iroro iwareghẹ na yọ ifofe.” 21  Fikiere ajọ ohwo ọvo ọ rehọ ahwo seha ha; keme eware kpobi erai, 22  makọ Pọl hayo Apọlọs hayo Sifas* hayo akpọ na hayo uzuazọ hayo uwhu, hayo eware nọ e rrọ enẹna hayo eware nọ e te tha, eware na kpobi erai; 23  rekọ whai yọ erọ Kristi; Kristi kọ ọrọ Ọghẹnẹ.

Oruvẹ-Obotọ

Hayo “a wo ẹjiroro ọvona.”
Hayo “ọnọ o wuzou ebabọ nọ o wo areghẹ.”
Rri oria Otofa Eme.
Rri oria Otofa Eme.
Nọ a re je se Pita.