Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 2:1-16

EWARE NỌ E RIẸ EVA

  • Pọl ọ ta usi uwoma evaọ Kọrint (1-5)

  • Areghẹ Ọghẹnẹ o mai woma (6-10)

  • Ohwo nọ ẹzi Ọghẹnẹ ọ be kpọ avọ ohwo nọ ọ roma kẹ isiuru ohwo-akpọ (11-16)

2  Fikiere nọ mẹ nya bru owhai ze, inievo, mẹ jẹ ta eme ilogbo hayo rehọ areghẹ mẹ ro dhesẹ oma kẹ owhai hi nọ me je whowho ovuẹ oware udidi ọrẹri Ọghẹnẹ kẹ owhai.  Keme mẹ gba riẹ mu nọ mẹ rẹ tẹrovi oware ofa ha ajokpaọ ẹme kpahe Jesu Kristi gbe epanọ a rọ kare iẹe fihọ ure kpe.  Yọ mẹ nya bru owhai ze avọ oma oyẹlẹ gbe ozọ, gbe enuhu;  yọ ẹmeunu mẹ gbe eme nọ me whowho orọnikọ avọ onaa eme eriariẹ ikpehru hu rekọ avọ odhesẹvia ogaga ẹzi Ọghẹnẹ,  re ẹrọwọ rai ọ gbẹ roma hwa areghẹ ahwo-akpọ họ rekọ ogaga Ọghẹnẹ.  Whaọ ma be ta eme areghẹ evaọ udevie enọ e kpako, orọnikọ areghẹ uyero-akpọ* nana ha hayo orọ isu uyero-akpọ nana ha, enọ a be te raha no.  Rekọ ma be ta oware udidi ọrẹri, koyehọ areghẹ Ọghẹnẹ nọ a kodhere, onọ Ọghẹnẹ ọ ruẹrẹhọ rọkẹ oruaro mai taure ahwo-akpọ a te ti mu eruẹrẹfihotọ obọrai họ.  Areghẹ nana họ onọ isu uyero-akpọ nana ọvuọvo ọ riẹ hẹ na, keme a hae te riẹ areghẹ nana, a hai kpe Olori nọ o wo oruaro na ha.*  Rekọ nwane wọhọ epanọ a kere nọ: “Ibiaro e re ruẹ hẹ yọ ezọ i ri yo ho, yọ ohwo ọvo ọ re jọ udu riẹ roro eware nọ Ọghẹnẹ ọ ruẹrẹhọ no kẹ enọ i you rie he.” 10  Keme mai Ọghẹnẹ ọ rọ ẹkwoma ẹzi riẹ rovie ai via kẹ no, ẹzi na ọ rẹ kiotọ eware kpobi, makọ eware ididi Ọghẹnẹ. 11  Kọ ohwo-akpọ vẹ ọ rẹ riẹ oware nọ o rrọ eva ohwo? Ohwo* na ọvo ọ rẹ riẹ. Ere re, ohwo ọvo ọ rẹ riẹ eware Ọghẹnẹ hẹ ajokpaọ ẹzi Ọghẹnẹ. 12  Whaọ orọnikọ ẹzi akpọ na a kẹ omai hi, rekọ ẹzi nọ o no obọ Ọghẹnẹ ze, re ma sae riẹ eware nọ Ọghẹnẹ ọ kẹ omai no. 13  Ma be ta eware nana re, orọnikọ avọ eme nọ ma wuhrẹ no areghẹ ahwo-akpọ ze he, rekọ eme nọ ẹzi ọfuafo na o wuhrẹ omai, keme ma be rehọ eme nọ i no obọ Ọghẹnẹ ze ro ru eware nọ i no obọ Ọghẹnẹ ze vẹ. 14  Rekọ ohwo nọ ọ roma kẹ isiuru ohwo-akpọ ọ rẹ jẹ eware ẹzi Ọghẹnẹ rehọ họ, keme e rrọ eware igheghẹ rọ kẹe; yọ ọ rẹ sai wo otoriẹ rai hi keme ẹkwoma ẹzi Ọghẹnẹ a rẹ rọ kiẹ ae riwi. 15  Rekọ, ohwo nọ ẹzi Ọghẹnẹ ọ be kpọ ọ rẹ kiẹ eware kpobi riwi, yọ ohwo ọvo ọ rẹ kiẹ ọyomariẹ riwi hi. 16  Keme “ono ọ riẹ iroro Jihova,* re ọ kẹe ohrẹ?” Rekọ ma wo iroro Kristi.

Oruvẹ-Obotọ

Rri oria Otofa Eme.
Hayo “kare Olori nọ o wo oruaro na fihọ ure kpe he.”
Evaọ Griki, “ẹzi ohwo.”
Rri oria Otofa Eme.