Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 14:1-40

EWARE NỌ E RIẸ EVA

  • Ekẹ aruọruẹ gbe ẹjẹ erọunu (1-25)

  • Iwuhrẹ Ileleikristi nọ e rẹ jọ kpatiẹ (26-40)

    • Epanọ eyae a re ru evaọ ukoko (34, 35)

14  Wha daoma kpobi wo uyoyou, ghele na wha gbẹ daoma wo ekẹ nọ Ọghẹnẹ ọ rẹ kẹ, maero okẹ aruọruẹ.  Keme ohwo nọ ọ rẹ jẹ ẹrọunu ọfa ọ be ta ẹme kẹ Ọghẹnẹ orọnikọ ahwo ho, keme ohwo ọvo ọ rẹ riẹ otọ ẹme na ha dede nọ ọ be rọ ẹkwoma ẹzi na ta eware ididi ọrẹri.  Rekọ ohwo nọ ọ rẹ ruẹaro ọ rẹ bọ ahwo ga jẹ tuduhọ ahwo awọ, jẹ sasa ahwo oma ẹkwoma eme riẹ.  Ohwo nọ ọ rẹ jẹ ẹrọunu ọfa ọ be bọ omariẹ ga, rekọ ohwo nọ ọ rẹ ruẹaro ọ be bọ ukoko ga.  Whaọ o were omẹ re whai kpobi wha jẹ erọunu sa-sa, rekọ onọ o mae were omẹ họ re wha ruẹaro. Evaọ uzẹme, ohwo nọ ọ rẹ ruẹaro ọ rro vi ohwo nọ ọ rẹ jẹ erọunu, ajokpanọ ọ be fa otọ eme riẹ na, re o ruẹse bọ ukoko na ga.  Rekọ evaọ obọnana inievo, mẹ tẹ nya bru owhai ze be jẹ erọunu sa-sa, didi ewoma me bi ru kẹ owhai? Ajokpanọ mẹ rẹ ta eme nọ Ọghẹnẹ ọ fere via kẹ omẹ hayo rehọ okẹ eriariẹ hayo eruẹaruẹ hayo uwuhrẹ ta ẹme kẹ owhai.  Epọvo na o rrọ re kẹ eware nọ i wo uzuazọ họ nọ a re kporo, wọhọ urete hayo akpata. Nọ i gbe do oghẹrẹsa ha, ẹvẹ ahwo a sae rọ riẹ otofa oware nọ a be rọ edo urete hayo akpata na ta?  Keme otẹrọnọ a kporo ọgba rekọ u wo otofa ha, ono ọ rẹ wọ owọ ẹmo?  Epọvo na re, otẹrọnọ wha gbẹ rehọ unu rai ta eme nọ a rẹ sai wo otoriẹ rai lọlọhọ họ, ẹvẹ ohwo ọ sae rọ riẹ oware nọ wha be ta? O gbẹ rrọ ere he, kiyọ wha be ta eme na fihọ ofou. 10  O sae jọnọ oghẹrẹ evẹrẹ buobu e rrọ akpọ na, rekọ ọvuọvo ọ riẹ hẹ nọ o wo otofa ha. 11  Keme otẹrọnọ me bi wo otoriẹ ẹvẹrẹ nọ ohwo ọ be ta ha, mẹ rẹ jọ ọrara kẹ ọnọ ọ be ta ẹme na, yọ ọnọ ọ be ta ẹme na ọ rẹ jọ ọrara kẹ omẹ re. 12  Epọvo na o rrọ kẹ owhai re, nọ orọnọ o rrọ owhai oja nọ wha re wo ekẹ ẹzi na, wha daoma re ekẹ nọ e rẹ bọ ukoko na ga e da owhai oma fia. 13  Fikiere jọ ọnọ o wo okẹ nọ ọ rẹ rọ jẹ ẹrọunu ọfa ọ lẹ nọ ọ sae fa otọ riẹ. 14  Keme mẹ tẹ be rọ ẹrọunu ọfa lẹ, okẹ ẹzi na nọ a kẹ omẹ oye o be lẹ na, rekọ me bi wo otoriẹ eme na ha. 15  Kọ eme u fo nọ me re ru? Mẹ rẹ rehọ okẹ ẹzi na lẹ, rekọ mẹ rẹ jẹ lẹ olẹ nọ mẹ riẹ otọ riẹ. Mẹ rẹ rehọ okẹ ẹzi na so ole ujiro, rekọ mẹ rẹ jẹ so ole ujiro nọ mẹ riẹ otọ riẹ. 16  O gbẹ rrọ ere he, nọ whọ tẹ be rehọ okẹ ẹzi lẹ ro jiri Ọghẹnẹ, ẹvẹ ohwo gheghe nọ ọ rrọ udevie rai ọ sae rọ ta nọ “Ami” rọkẹ olẹ uyere ra, nọ orọnọ o wo otoriẹ eme ra ha na? 17  Uzẹme, who bi yere Ọghẹnẹ evaọ emamọ edhere, rekọ ohwo ọdekọ na o bi wo ọbọga ha. 18  Me bi yere Ọghẹnẹ inọ mẹ rẹ jẹ erọunu bu vi owhai kpobi. 19  Ghele na, evaọ ukoko mẹ rẹ ta eme isoi nọ a re wo otoriẹ rai, re mẹ ruẹsi wuhrẹ amọfa re, viukpenọ mẹ rẹ ta eme idu ikpe (10,000) evaọ ẹrọunu ọfa. 20  Inievo, wha jọ emaha evaọ otoriẹ rai hi, rekọ wha jọ emaha evaọ oware uyoma; jẹ jọ ekpako evaọ otoriẹ rai. 21  A kere evaọ Uzi na nọ: “‘Mẹ te rehọ erọunu ahwo erẹwho efa gbe eme erara rọ ta ẹme kẹ ahwo nana, ghele na a te rọwo gaviezọ kẹ omẹ hẹ,’ ere Jihova* ọ ta.” 22  Fikiere, orọnikọ enọ e rọwo Jesu ẹjẹ erọunu o rrọ oka kẹ hẹ rekọ enọ e rọwo Jesu hu, yọ orọnikọ enọ e rọwo Jesu hu aruọruẹ o rrọ oka kẹ hẹ rekọ enọ e rọwo Jesu. 23  Fikiere, otẹrọnọ ukoko na soso u kokohọ oria ovo yọ aikpobi a be jẹ erọunu sa-sa, yọ ahwo gheghe hayo enọ e rọwo Jesu hu a nyaze, kọ a gbẹ te ta nọ iroro rai e gbẹ gba ha? 24  Rekọ otẹrọnọ whai kpobi wha be ruẹaro yọ ọnọ ọ rọwo Jesu hu hayo ohwo gheghe ọ nyaze, eme rai i ti duobọtei udu je ru ei kiẹ omariẹ riwi ziezi. 25  Eware ididi udu riẹ i ve ti dhesẹ oma via, o ve ti kigwẹ vovao tuotọ gọ Ọghẹnẹ be ta nọ: “Ọghẹnẹ ọ ginẹ rrọ udevie rai.” 26  Inievo, kọ eme u fo nọ wha re ru? Nọ wha te kokohọ, ọjọ o wo olezi, ọfa o wo okẹ uwuhrẹ, ọfa o wo eme nọ Ọghẹnẹ ọ fere via kẹe, ọfa o wo okẹ ẹjẹ erọunu, yọ ọfa o wo okẹ nọ ọ rẹ rọ fa otọ erọunu. Wha ru eware kpobi re e kẹ ọbọga. 27  Yọ otẹrọnọ ahwo jọ a rẹ jẹ erọunu efa, jọ o jọ imava hayo imasa ọvo, yọ o rẹ jọ unọjọ utọjọ; yọ ohwo jọ ọ rẹ fa otọ eme na. 28  Rekọ otẹrọnọ ohwo nọ ọ rẹ fa otọ eme na ọ riẹ hẹ, jọ a fibo evaọ ukoko na re a ta ẹme kẹ omobọ rai gbe Ọghẹnẹ. 29  Jọ eruẹaro ivẹ hayo esa a ruẹaro, ahwo nọ a kiọkọ a vẹ gwọlọ otofa eme na. 30  Rekọ otẹrọnọ Ọghẹnẹ ọ fere eme jọ via kẹ ohwo jọ epanọ ọ rọ keria etẹe na, jọ ohwo ọsosuọ na o fibo. 31  Keme whai kpobi wha rẹ sae ruẹaro unọjọ utọjọ, re ahwo kpobi a sai wuhrẹ oware jọ rehọ je wo uduotahawọ. 32  Yọ eruẹaro na a rẹ kpọ oghẹrẹ nọ a be rehọ ekẹ ẹzi nọ a wo na ru iruo. 33  Keme Ọghẹnẹ yọ Ọghẹnẹ ozighi hi rekọ ọrọ udhedhẹ. Wọhọ epanọ o rrọ evaọ ikoko erezi na kpobi, 34  jọ eyae na a fibo evaọ ikoko na, keme a kẹ rai uvẹ re a ta ẹme he. Ukpoye, jọ a romakpotọ kẹ ezae na, wọhọ epanọ Uzi na o ta re. 35  A tẹ gwọlọ riẹ oware jọ, jọ a nọ ezae rai evaọ obọ uwou, keme o rrọ oware omovuọ re aye ọ ta ẹme evaọ ukoko na. 36  Kọ obọ rai ẹme Ọghẹnẹ o jo muhọ, hayo kọ whai ọvo o te obọ? 37  Ohwo jọ o te roro nọ ọye yọ ọruẹaro hayo o wo okẹ ẹzi na, ọ rẹ rọwo nọ eware nọ me bi kere se owhai na yọ ijaje Olori na. 38  Rekọ ohwo jọ o te bi rri onana vo, a ti rri rie vo re.* 39  Fikiere, inievo mẹ, wha hae daoma re wha ruẹaro, ghele na wha gbabọkẹ ẹjẹ erọunu hu. 40  Rekọ wha ru eware kpobi kpatiẹ je lele ọruẹrẹfihotọ.

Oruvẹ-Obotọ

Rri oria Otofa Eme.
Hayo o sae jọ nọ, “ohwo jọ ọ tẹ rrọ ogbori, ọ te gbẹ jọ ogbori.”