Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 13:1-13

EWARE NỌ E RIẸ EVA

  • Uyoyou—edhere nọ o mai woma (1-13)

13  Mẹ tẹ be rọ ẹrọunu ahwo gbe orọ ikọ-odhiwu ta ẹme rekọ me wo uyoyou hu, yọ me zihe ruọ edo ẹgogo hayo ewẹ-odhe nọ a be rọ tehe ohwohwo no.  Yọ me te wo okẹ eruẹaruẹ je wo otoriẹ eware ididi ọrẹri na kpobi je wo eriariẹ kpobi, me te je wo ẹrọwọ te epanọ mẹ sai ro ru igbehru no oria ruọ oria, rekọ me wo uyoyou hu, mẹ yọ oware ovo ho.*  Otẹrọnọ mẹ zẹ eyero mẹ kpobi rọ kuọ amọfa, yọ me te siobọno oma mẹ, re mẹ ruẹsi seha, rekọ me wo uyoyou hu, me re wo erere ọvo vievie he.  Uyoyou u re wo odiri o tẹ jẹ rrọ wowou. Uyoyou o rẹ re ihri hi. U re seha ha, u re fu uke he,  u re ru ugberuo ho,* o rẹ gwọlọ ewoma obọriẹ hẹ, o rẹ kaki muofu hu. U re kere oware uyoma nọ a ru rie fihọ otọ họ.  O rẹ ghọghọ fiki emuemu hu, rekọ o rẹ ghọghọ fiki uzẹme.  U re wo odiri evaọ eware kpobi, rọwo eware kpobi, rẹro eware kpobi, thihakọ eware kpobi.  Uyoyou o rẹ jọ bẹdẹ bẹdẹ.* Rekọ otẹrọnọ ekẹ eruẹaruẹ e rrọ, a ti si ai no otọ; otẹrọnọ erọunu* e rrọ, i ti serihọ; otẹrọnọ eriariẹ e rrọ, a ti si ai no otọ.  Keme eriariẹ mai e gbunu hu yọ aruọruẹ mai ọ gbunu hu, 10  rekọ okenọ onọ o gbunu na o tẹ ze, a ti si onọ o gbunu hu na no. 11  Okenọ mẹ jọ ọmaha, mẹ jẹ ta ẹme wọhọ ọmaha, je roro wọhọ ọmaha, je rri eware wọhọ ọmaha; rekọ enẹna nọ me te ohwo no na, me siobọno iruemu ọmaha no. 12  Enẹna ma be rọ ughẹgbe ayọno* ruẹ eware bizibizi, rekọ oke yena o te jọ ovao dhe ovao. Enẹna umutho mẹ riẹ, rekọ oke yena mẹ te riẹ eware totọ* wọhọ epanọ Ọghẹnẹ ọ riẹ omẹ totọ na. 13  Rekọ eware esa nana e te gbẹ jariẹ: ẹrọwọ, ẹruore, uyoyou; rekọ onọ o mae rro evaọ usu rai họ uyoyou.

Oruvẹ-Obotọ

Hayo “me fioka ha.”
Hayo “ọ rẹ whẹro ho; ọ rẹ kare adhẹẹ hẹ.”
Hayo “u re re vievie he.”
Koyehọ, okẹ igbunu nọ a rẹ rọ jẹ evẹravẹrẹ.
Evaọ oke anwae, ighẹgbe ayọno e jariẹ.
Hayo “vọvọ.”