Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 11:1-34

EWARE NỌ E RIẸ EVA

  • “Wha rọ aro kele omẹ” (1)

  • Ọghẹnẹ o wuzou Kristi, Kristi o wuzou ọzae, ọzae o wuzou aye; uzou nọ a re ruru (2-16)

  • Ekareghẹhọ Emu Owọwọ Olori na (17-34)

11  Wha rọ aro kele omẹ, wọhọ epanọ mẹ be rọ aro kele Kristi na.  Me bi jiri owhai keme evaọ eware kpobi wha be kareghẹhọ omẹ yọ wha be nya lele eware na wọhọ epanọ me wuhrẹ owhai.  Rekọ mẹ gwọlọ nọ wha riẹ inọ ọnọ o wuzou ọzae kpobi họ Kristi; yọ ọnọ o wuzou aye họ ọzae; yọ ọnọ o wuzou Kristi họ Ọghẹnẹ.  Ọzae kpobi nọ ọ be lẹ hayo ruẹaro avọ oware nọ o ro ruru uzou ọ be wha omovuọ se uzou riẹ;*  rekọ aye kpobi nọ ọ be lẹ hayo ruẹaro nọ o ruru uzou riẹ hẹ ọ be wha omovuọ se uzou riẹ,* keme oyena o wọhọ ẹsenọ ọ rrọ aye nọ a fọrọ uzou riẹ muotọ.  Keme otẹrọnọ aye o re ruru uzou riẹ hẹ, jọ o bru eto riẹ; rekọ otẹrọnọ o rrọ oware omovuọ re aye o bru eto riẹ hayo fọrọ eto riẹ muotọ, jọ o ruru uzou riẹ.  Ọzae o re ruru uzou riẹ hẹ, keme uwoho gbe oruaro Ọghẹnẹ ọ rrọ, rekọ aye yọ oruaro ọzae.  Keme orọnikọ a ma ọzae no oma aye ze he, rekọ a ma aye no oma ọzae ze.  Yọ orọnikọ a ma ọzae fiki aye he, rekọ a ma aye fiki ọzae. 10  Oyejabọ nọ u ro fo re aye o ruru uzou riẹ wọhọ oka omaurokpotọ kẹ ọnọ o wuzou riẹ fiki ikọ-odhiwu na. 11  U te no ere no, evaọ Olori na aye o wo ohẹriẹ no ọzae he, yọ ọzae o wo ohẹriẹ no aye he. 12  Keme wọhọ epanọ a ma aye na no oma ọzae na ze na, ere ọvona re ọzae o re no oma aye ze; rekọ obọ Ọghẹnẹ eware kpobi i no ze. 13  Wha bruoziẹ na kẹ omarai: Kọ u kiehọ re aye ọ lẹ se Ọghẹnẹ avọ uzou riẹ nọ u kpe fihọ? 14  Kọ wha gbẹ riẹ nọ no otọ avọ otọ ze o rrọ oware omovuọ nọ ọzae o te wo eto ithethei, 15  rekọ aye o te wo eto ithethei yọ oruaro rọ kẹe? Keme a kẹ riẹ eto riẹ re i ruru uzou riẹ viukpọ oware nọ o re ro ruru uzou. 16  Rekọ, otẹrọnọ ohwo jọ ọ gwọlọ si ikẹ inọ uruemu ofa jọ o mai fo, ma wo ofa ha, yọ ikoko Ọghẹnẹ a wo ofa gbe he. 17  Rekọ nọ mẹ be kẹ owhai ehrẹ nana, me bi jiri owhai hi, keme eyoma o bi no omakugbe rai ze, orọnikọ ewoma ha. 18  Keme orọ ọsosuọ kpobi, me bi yo nọ evaọ okenọ wha te kokohọ evaọ ukoko ohẹriẹ o be jọ udevie rai; yọ mẹ rọwo nọ uzẹme o rrọ ẹme na. 19  Keme u mu omẹ ẹro nọ wha jọ udevie rai wo eko sa-sa re, rekọ a te rọ enẹ riẹ owhai otu nọ Ọghẹnẹ ọ jẹrehọ. 20  Nọ wha te kokohọ oria ovo, orọnọ re wha ginẹ re Emu Owọwọ Olori na ha. 21  Keme nọ wha tẹ be re iẹe, omomọvo ọ be re ọvuọ emu owọwọ riẹ tao, fikiere nọ ohọo u bi kpe ọjọ yọ idi i bi mu ọfa. 22  Kọ wha wo iwou nọ wha rẹ jọ re jẹ da? Hayo kọ wha bi rri ukoko Ọghẹnẹ vo je bi ru enọ i wo ho oma vo? Eme mẹ rẹ ta kẹ owhai? Kọ me re jiri owhai? Evaọ onana, me bi jiri owhai hi. 23  Keme onọ me wo no obọ Olori na ze oye me wuhrẹ owhai, inọ Olori na Jesu evaọ aso nọ a bi ti ro vivie iei ọ rehọ ebrẹdi, 24  nọ ọ lẹ yere Ọghẹnẹ no, o te bru rie ọ tẹ ta nọ: “Onana u dikihẹ kẹ ugboma mẹ, onọ me ti siobọno fiki rai. Wha hai ru onana rọ kareghẹhọ omẹ.” 25  Epọvo na o ru kpahe egho na re nọ a re emu Ọnyavrẹ na no, ọ ta nọ: “Egho nana o dikihẹ kẹ ọvọ ọkpokpọ na ẹkwoma azẹ mẹ. Oke kpobi nọ wha tẹ be dae, wha ru onana rọ kareghẹhọ omẹ.” 26  Keme oke kpobi nọ wha be re ebrẹdi nana jẹ da egho nana, yọ wha bi whowho uwhu Olori na, bẹsenọ ọ rẹ nyaze. 27  Fikiere ohwo kpobi nọ ọ re ebrẹdi na jẹ da egho Olori na yọ o te he, ọ te reabe keme ọ rehọ adhẹẹ kẹ ugboma gbe azẹ Olori na ha. 28  Jọ ohwo ọ kake kiẹ omariẹ riwi, nọ ọ jẹ ruẹ nọ o te, ẹsiẹe ọ rẹ re ebrẹdi na jẹ da egho udi na. 29  Keme ohwo nọ ọ re jẹ da nọ o vuhu oware nọ ugboma na u dikihẹ kẹ hẹ ọ re jẹ da obrukpe fihọ uzou. 30  Oyejabọ nọ ibuobu evaọ udevie rai a gbẹ rọ ga ha jẹ be mọ na, yọ ibuobu i whu* no. 31  Rekọ ma tẹ kiẹ omamai riwi ziezi, a ti gu omai ẹdhọ họ. 32  Rekọ nọ a te gu omai ẹdhọ, yọ Jihova* ọ be kpọ omai họ, re a gbe brukpe omai kugbe akpọ na ha. 33  Fikiere, inievo mẹ, nọ wha te kokohọ re wha re iẹe, wha hẹrẹ ohwohwo. 34  Ohọo u te bi kpe ohwo jọ, jọ ọ jọ obọ uwou riẹ re emu, re nọ wha te kokohọ wha gbẹ wha obrukpe se omarai hi. Rekọ kpahe eme nọ i kiọkọ, mẹ te kpọ ae vi nọ mẹ tẹ nyaze.

Oruvẹ-Obotọ

Hayo “ọnọ o wuzou riẹ.”
Hayo “ọnọ o wuzou riẹ.”
Onana orọnikọ uwhu dẹẹ hẹ, rekọ onọ u dhesẹ nọ usu rai kugbe Ọghẹnẹ o raha no.
Rri oria Otofa Eme.