Kpohọ eme nọ e riẹ eva

Kpohọ eme nọ e kẹle obọ emuhọ

Kpohọ oria izoẹme

Isẹri Jihova

Isoko

Ebaibol Evaọ Itanẹte | EFAFA AKPỌ ỌKPOKPỌ ỌRỌ IKEREAKERE EFUAFO NA (ỌRỌ 1984)

1 Ahwo Kọrint 1:1-31

EWARE NỌ E RIẸ EVA

  • Uyere (1-3)

  • Pọl o yere Ọghẹnẹ kẹ inievo obọ Kọrint (4-9)

  • Uduotahawọ inọ a jọ ọvo (10-17)

  • Kristi họ ogaga gbe areghẹ Ọghẹnẹ (18-25)

  • Jihova ọvo ma re ro seha (26-31)

1  Pọl, ọnọ a se re ọ jọ ukọ Kristi Jesu wọhọ epaọ oreva Ọghẹnẹ, gbe Sostẹnes oniọvo mai nọ ọ rrọ kugbe omẹ,  ro se ukoko Ọghẹnẹ nọ o rrọ Kọrint, enọ a ru fo no evaọ usu kugbe Kristi Jesu, nọ a se re a jọ erezi, gbe ahwo kpobi nọ a be jọ oria kpobi se odẹ Olori mai, Jesu Kristi, Olori rai gbe ọmai:  Jọ Ọghẹnẹ Ọsẹ mai gbe Olori na Jesu Kristi a dhesẹ uwowou ulogbo kẹ owhai jẹ kẹ owhai udhedhẹ.  Me bi yere Ọghẹnẹ mẹ kẹ owhai ẹsikpobi fiki uwowou ulogbo nọ Ọghẹnẹ o dhesẹ kẹ owhai evaọ Kristi Jesu;  keme wha rọ ẹkwoma riẹ wo eghale buobu no, te uvẹ nọ wha re ro whowho ẹme riẹ, gbe eriariẹ ẹme riẹ nọ wha wo vọvọ,  wọhọ epanọ isẹri ise kpahe Kristi o dowọ mu otọ no evaọ udevie rai na,  fikiere okẹ ovuọvo o kare owhai hi, nọ wha be rọ ọwhọ hẹrẹ oke edhesẹvia Olori mai Jesu Kristi na.  O ti ru owhai ga rite urere re, re a gbẹ ruẹ oware ovo rọ fo owhai hi evaọ ẹdẹ Olori mai Jesu Kristi.  Ọghẹnẹ, ọnọ o se owhai re wha wo usu kugbe Ọmọ riẹ Jesu Kristi Olori mai na, o re ru ẹme riẹ gba. 10  Inievo, mẹ be rọ odẹ Olori mai Jesu Kristi tuduhọ owhai awọ inọ whai kpobi wha jọ ọvo evaọ eme rai, wha jọ ohẹriẹ o jọ udevie rai hi, rekọ wha jọ okugbe ọvo evaọ iroro gbe eriwo rai. 11  Keme ahwo jọ evaọ uviuwou Kloe a vuẹ omẹ, inievo mẹ, inọ ohẹriẹ o rrọ udevie rai. 12  Otọ ẹme mẹ na họ, whai omomọvo ọ be ta nọ: “Mẹ ọrọ Pọl,” “Mẹ ọrọ Apọlọs,” “Mẹ ọrọ Sifas,”* “Mẹ ọrọ Kristi.” 13  Kọ Kristi ọ ghale abọ? Kọ Pọl a kare fihọ ure kpe fiki rai? Hayo kọ odẹ Pọl a rọ họ owhai ame? 14  Me yere Ọghẹnẹ inọ mẹ họ owhai ọvuọvo ame he ajokpaọ Krispọs avọ Geyọs, 15  re whai ọvuọvo ọ gbẹ ta nọ odẹ mẹ ọ rọ họ-ame he. 16  Ẹhẹ, mẹ họ ahwo uviuwou Stẹfanas ame re. Rọkẹ owhai enọ i kiọkọ, mẹ riẹ hẹ sọ mẹ họ omọfa jọ ame. 17  Keme Kristi o vi omẹ, orọnikọ re mẹ họ ahwo ame he, rekọ re me whowho usi uwoma na; yọ orọnikọ avọ eme eriariẹ ikpehru hu, re a gbe rri uwhu Kristi evaọ ure-oja* na fihọ oware ufofe he. 18  Keme ẹme kpahe ure-oja* na yọ ugheghẹ kẹ enọ a te raha, rekọ rọkẹ omai enọ a ti siwi, o rrọ ogaga Ọghẹnẹ. 19  Keme a kere nọ: “Me ti ru areghẹ enọ i wo areghẹ na zihe ruọ ugheghẹ, mẹ vẹ te siọ eriariẹ enọ e riẹ ikpebe.” 20  Kọ owareghẹ na ọ rrọ? Kọ okere-obe* na ọ rrọ? Kọ ọgbavro uyero-akpọ* nana ọ rrọ? Kọ Ọghẹnẹ o gbe ru areghẹ akpọ nana zihe ruọ ugheghẹ no? 21  Keme nọ orọnọ akpọ na ọ rehọ areghẹ riẹ rọ riẹ Ọghẹnẹ hẹ na, fiki areghẹ Ọghẹnẹ, o were Ọghẹnẹ re ọ rehọ ovuẹ nọ ma bi whowho nọ a rri fihọ ugheghẹ na ro siwi enọ e be rọwo. 22  Keme ahwo Ju a be gwọlọ eka, yọ ahwo Griki a be gwọlọ areghẹ; 23  rekọ ma bi whowho Kristi nọ a kare fihọ ure kpe, onọ o rrọ ezoruẹ kẹ ahwo Ju, o tẹ rrọ ugheghẹ kẹ erẹwho na. 24  Rekọ rọkẹ enọ a se na, te ahwo Ju gbe ahwo Griki, Kristi họ ogaga Ọghẹnẹ gbe areghẹ Ọghẹnẹ. 25  Keme oware Ọghẹnẹ nọ ahwo a rri fihọ ugheghẹ u wo areghẹ vi ahwo-akpọ, yọ oware Ọghẹnẹ nọ ahwo a rri nọ o ga ha o ga vi ahwo-akpọ. 26  Keme wha ruẹ evaọ use nọ o se owhai na, inievo, inọ orọnikọ ibuobu i wo areghẹ akpọ na ha, orọnikọ ibuobu e ga ha, orọnikọ ibuobu i no iwou ikpahwo ze he, 27  rekọ Ọghẹnẹ ọ salọ eware igheghẹ akpọ na re ọ ruẹsi ru oma vo iwareghẹ na; yọ Ọghẹnẹ ọ salọ eware nọ e ga ha evaọ akpọ na re ọ ruẹsi ru oma vo eware nọ e ga; 28  yọ Ọghẹnẹ ọ salọ eware nọ a se gboware he evaọ akpọ na gbe eware nọ a rri vo, eware nọ a rri nọ e rrọ oware ovo ho re o ru oma vo eware nọ a rri inọ e roja, 29  re ohwo ọvo o gbe seha evaọ aro Ọghẹnẹ hẹ. 30  Fiki riẹ wha rọ rrọ usu kugbe Kristi Jesu, ọnọ ọ fere areghẹ Ọghẹnẹ gbe ẹrẹreokie riẹ via, gbe ọnọ a rọ ẹkwoma riẹ ru omai fo no jẹ hwa osa ẹtanigbo ro si omai no igbo, 31  re o jọ wọhọ epanọ a kere nọ: “Ọnọ o bi seha, jọ ọ rehọ Jihova* seha.”

Oruvẹ-Obotọ

Nọ a re je se Pita.
Rri oria Otofa Eme.
Rri oria Otofa Eme.
Koyehọ, ọnọ ọ riẹ uzi lafi.
Rri oria Otofa Eme.
Rri oria Otofa Eme.