Ro Se Taitọs 1:1-16
1 Pọl ọrigbo Ọghẹnẹ gbe ukọ Jesu Kristi, wọhọ epaọ ẹrọwọ enọ Ọghẹnẹ ọ salọ gbe eriariẹ egbagba uzẹme na nọ e rọwokugbe omarọkẹ Ọghẹnẹ
2 onọ u no ẹruore uzuazọ ebẹdẹ bẹdẹ+ ze, nọ Ọghẹnẹ nọ ọ rẹ sae ta ọrue he+ na ọ ya eyaa riẹ ugbanwẹdẹ;
3 rekọ nọ oke nọ o fihọ u te, o dhesẹ ẹme riẹ via ẹkwoma usi uwoma ota nọ a mu họ omẹ obọ+ na, wọhọ epaọ ujaje Osiwi mai, Ọghẹnẹ;
4 ro se Taitọs, uvi ọmọ nọ ma gbe wo ẹrọwọ ọvona:
Jọ Ọghẹnẹ Ọsẹ na gbe Kristi Jesu Osiwi mai a dhesẹ uwowou ulogbo kẹ owhẹ jẹ kẹ owhẹ udhedhẹ.
5 Mẹ nyasiọ owhẹ ba Kriti re whọ kpọ eware nọ e thọ* vi jẹ rehọ ekpako mu no okpẹwho ruọ okpẹwho, wọhọ epanọ mẹ ta kẹ owhẹ:
6 otẹrọnọ ọzae jọ ọ riẹ nọ ọ kare afuẹwẹ, nọ o wo aye ọvo, nọ emọ riẹ e rọwo, yọ ahwo a be ta kpahe ae he inọ a bi yeri uzuazọ ofafariẹ* hayo a rrọ ahwo ọwọsuọ.+
7 Keme ọsẹro yọ orieyero Ọghẹnẹ, fikiere ọ rẹ kare afuẹwẹ, o re wo udu ogaga ha,+ ọ rẹ kaki mu ofu hu,+ ọ rẹ jọ ọgba-udi hi, ọ rẹ jọ ohwo ozighi hi,* o re wo uvou-uthethei kẹ erere nọ a rẹ rọ ewhariọ wo ho,
8 rekọ ọ rẹ jọ ọnọ o re dede erara rehọ,+ ọnọ o you ewoma, ọnọ o wo iroro nọ e gba,*+ ọnọ o kiẹrẹe, ọnọ a re fievahọ,*+ ọnọ o wo oma-onyẹ,*+
9 ọnọ ọ be nya lele ẹme uzẹme* na whawha evaọ onaa ewuhrẹ riẹ,+ re ọ sae rọ uwuhrẹ ogbagba*+ tuduhọ ahwo awọ jẹ whọku+ enọ e be ta ẹme wọso uwuhrẹ na.
10 Keme ahwo ọwọsuọ buobu a riẹ, enọ e be ta ogbẹta, gbe eviẹahwohọ, maero enọ i bi si ikẹ inọ ahwo a rẹ yawo.+
11 O roja re a ruru unu rai, keme ezae nana a be raha ẹrọwọ iviuwou soso ẹkwoma eware nọ i fo ho nọ a bi wuhrẹ fiki erere nọ a rẹ rọ ewhariọ wo.
12 Omọvo rai jọ, ọruẹaro obọrai, ọ ta nọ: “Ọrue ọvo ahwo Kriti a rẹ ta, erao ijihẹ a rrọ, egba-ore nọ i re ru iruo ho.”
13 Isẹri nana uzẹme. Fiki ugogo ẹjiroro nana, hae whọku ae gaga re a sae jọ gaga evaọ ẹrọwọ na,
14 re a gbẹ gaviezọ kẹ iku-esia ahwo Ju hu gbe ijaje ezae nọ e nyasiọ uzẹme na ba.
15 Eware kpobi e rrọ fuafo kẹ ahwo nọ a rrọ fuafo;+ rekọ rọkẹ ahwo nọ a rrọ gbegbe jẹ kare ẹrọwọ, oware ovo o fo ho, keme iroro rai gbe obruoziẹ-iroro rai i gbeku no.+
16 A rẹ jọ ẹgbede ta nọ a riẹ Ọghẹnẹ, rekọ a be rọ iruo rai rọ se iẹe,+ keme a rrọ tọtọtọ jẹ be ghẹmeeyo, yọ a te kẹ oghẹrẹ iruo iwoma evuevo ho.
Eme-Obotọ
^ Hayo “nọ e gba tere he.”
^ Hayo “owhọwhọhọ.”
^ Hayo “ọgba-ohọre he.”
^ Hayo “oma-usuo.”
^ Hayo “ọnọ o re ru lele izi Ọghẹnẹ.”
^ Hayo “ọ rẹ riẹ iroro jẹ; o wo areghẹ.”
^ Hayo “ovuẹ nọ a re fievahọ.”
^ Hayo “uwuhrẹ omokpokpọ; uwuhrẹ nọ o rẹ kẹ erere.”
