Iziewariẹ 18:1-22

  • Ẹkẹ nọ o re te izerẹ gbe ahwo Livae (1-8)

  • A re ru iruẹru imizi vievie he (9-14)

  • Ọruẹaro nọ ọ wọhọ Mosis (15-19)

  • Epanọ a re ro vuhu eruẹaro erue (20-22)

18  “Izerẹ nọ e rrọ ahwo Livae na avọ ahwo orua Livae soso a re wo ẹkẹ hayo ukuoriọ họ evaọ Izrẹl. Ekẹ nọ a re ro dhe idhe nọ a rẹ rọ erae mahe kẹ Jihova na a te jọ re, enana họ ukuoriọ rai.*+  Fiki onana a re wo ukuoriọ ovuọvo ho evaọ udevie inievo rai. Jihova họ ukuoriọ rai, nwane wọhọ epanọ ọ ta kẹ ae no vẹre na.  “Whaọ enana họ eware nọ ahwo na a rẹ kẹ izerẹ na: Ohwo kpobi nọ o bi dhe idhe, te orọ eruẹ ọzae hayo ogodẹ, ọ rẹ rehọ akpalobọ na, agba na, gbe omokpa na kẹ ozerẹ na.  Wha rẹ rehọ ibi ọsosuọ ibi ekakọ rai, enwaene ọkpokpọ rai, ewhri rai, gbe iwhulu ọsosuọ rai nọ wha ru no eto uthuru erao rai ze rọ kẹe.+  Jihova Ọghẹnẹ rai ọ salọ e riẹ avọ emezae riẹ no erua rai kpobi ze re a gbodibo evaọ odẹ Jihova ẹsikpobi.+  “Rekọ otẹrọnọ ohwo Livae jọ o no okpẹwho rai jọ nọ ọ jẹ rria evaọ Izrẹl,+* jẹ gwọlọ nọ o re kpohọ oria nọ Jihova ọ salọ,*+  ọ sae jọ etẹe gbodibo evaọ odẹ Jihova Ọghẹnẹ riẹ wọhọ inievo riẹ nọ i kiọkọ kpobi nọ e rrọ ahwo Livae na, enọ e rrọ etẹe evaọ aro Jihova.+  O re lele ai ghale emu ẹrẹrẹe,+ fiba ugho nọ o wo nọ ọ zẹ eware esẹ-esẹ riẹ.  “Nọ wha tẹ ruọ eva ẹkwotọ nọ Jihova Ọghẹnẹ rai ọ be rọ kẹ owhai na no, wha rẹ rọ aro kele iruẹru etọtọ erẹwho yena vievie he.+ 10  A rẹ jọ udevie rai ruẹ ohwo ọvo vievie he nọ ọ rẹ mahe ọmọzae riẹ hayo ọmọtẹ riẹ evaọ erae ro dhe idhe,*+ ohwo kpobi nọ ọ rẹ gbẹva,+ ohwo kpobi nọ o re ru emajiki,+ ohwo kpobi nọ ọ rẹ gwọlọ oka oware nọ o te via,+ ọbo-ẹva,*+ 11  ohwo kpobi nọ ọ rẹ nua amọfa, ohwo kpobi nọ ọ rẹ nekpẹ mi ohwo nọ o re lele izi ta ẹme+ hayo ọgbẹva,*+ hayo ohwo kpobi nọ ọ rẹ nekpẹ mi enọ i whu no.+ 12  Keme ohwo kpobi nọ o bi ru eware enana ọ rẹ tọtọ Jihova oma, yọ fiki iruẹru etọtọ nana Jihova Ọghẹnẹ rai o bi ro le ai no kẹ owhai na. 13  Wha rẹ jọ ahwo nọ e kare afuẹwẹ evaọ aro Jihova Ọghẹnẹ rai.+ 14  “Keme erẹwho nana nọ wha be rehọ ẹkwotọ rai na a jẹ hae gaviezọ kẹ ahwo nọ a re ru emajiki+ jẹ gbẹva,+ rekọ Jihova Ọghẹnẹ rai ọ kẹ owhai uvẹ nọ wha ru oware utioye na ovuovo ho. 15  Jihova Ọghẹnẹ rai ọ te jọ udevie inievo rai rọ ọruẹaro nọ ọ wọhọ omẹ ro mu kẹ owhai. Wha rẹ gaviezọ kẹe hrọ.+ 16  Onana o rrọ ere fiki oware nọ whọ yare Jihova Ọghẹnẹ ra evaọ obọ Horẹb evaọ ẹdẹ nọ ogbotu* na o ro kokohọ,+ nọ whọ rọ ta nọ, ‘Whọ jọ omẹ yo urru Jihova Ọghẹnẹ mẹ hẹ hayo ruẹ erae egaga nana ofa ha, re mẹ seba ewhu.’+ 17  Jihova ọ tẹ ta kẹ omẹ nọ, ‘Oware nọ a ta na u kiehọ. 18  Mẹ te jọ udevie inievo rai rọ ọruẹaro nọ ọ wọhọ owhẹ ro mu kẹ ae,+ yọ me ti fi eme mẹ họ iẹe unu,+ ọ vẹ te vuẹ ae eware kpobi nọ mẹ ta kẹe.*+ 19  Evaọ uzẹme, ohwo nọ ọ gaviezọ kẹ eme mẹ nọ ọ te rehọ odẹ mẹ ta ha, mẹ te rehọ iẹe guẹdhọ.+ 20  “‘Otẹrọnọ ọruẹaro jọ ọ rọ omovia rehọ odẹ mẹ ta ẹme jọ nọ me vi rie nọ ọ ta ha hayo ọ rehọ odẹ eghẹnẹ efa ta ẹme, ọruẹaro yena o re whu hrọ.+ 21  Rekọ, ẹsejọhọ wha rẹ te jọ udu rai ta nọ: “Kọ ẹvẹ ma te rọ riẹ nọ Jihova họ ọnọ ọ ta ẹme na ha?” 22  Nọ ọruẹaro na ọ tẹ rọ odẹ Jihova ta ẹme nọ ẹme na o gbe rugba ha, hayo oware na o gbẹ via ha, u dhesẹ nọ Jihova họ ọnọ ọ ta ẹme ọyena ha. Omovia oye ọruẹaro na ọ rọ ta ẹme na. Wha rẹ dhozọ riẹ hẹ.’

Eme-Obotọ

Hayo “enọ e rrọ ukuoriọ riẹ.”
Evaọ Hibru, “nifẹsh riẹ ọ.” Rri oria Otofa Eme.
Koyehọ, oria nọ Jihova ọ salọ nọ a re kokohọ kẹ egagọ.
Hayo “ẹjile.”
Evaọ Hibru, “nọ o re ru ọmọzae hayo ọmọtẹ riẹ nya erae vrẹ.”
Hayo “ọbo-ẹva.”
Hayo “ukoko.”
Hayo “nọ me jie uzi rai kẹe.”