Emuhọ 6:1-22

  • Emọ Ọghẹnẹ e ziọ otọakpọ ti wo eyae (1-3)

  • A yẹ Nẹfilim (4)

  • Eyoma ohwo-akpọ o kẹ Jihova uye (5-8)

  • A vuẹ Noa nọ ọ bọ okọ (9-16)

  • Ọghẹnẹ ọ ta nọ Owhe ọ be tha (17-22)

6  Whaọ nọ ahwo a muhọ ebu no evaọ otọakpọ na je bi yẹ emetẹ,  emọ* Ọghẹnẹ uzẹme na*+ a te bi muẹrohọ nọ emetẹ ahwo-akpọ a wo erru. Fikiere a te mu eyae nọ e were rai kpobi họ ẹrehọ kẹ omarai.  Kẹsena Jihova ọ tẹ ta nọ: “Me* ti thihakọ kẹ ohwo-akpọ ribri hi,+ keme uwo gheghe ọ rrọ.* Fikiere, edẹ riẹ e te jọ ikpe udhozeza (120).”+  Nẹfilim* na a jọ otọakpọ na evaọ oke yena gbe ikpe nọ i lele i rie. Evaọ oke yena emọ Ọghẹnẹ uzẹme na a je lele emetẹ ahwo-akpọ wezẹ, yọ a yẹ emezae kẹ ae. Ae a jọ egba evaọ oke nọ u kpemu, ahwo nọ odẹ rai u je do.  Fikiere, Jihova ọ tẹ ruẹ nọ umuomu ohwo-akpọ o re ruaro evaọ otọakpọ na yọ eware kpobi nọ ọ be jọ udu riẹ roro ẹsikpobi eyoma ọvo.+  O tẹ da Jihova nọ ọ ma ahwo fihọ otọakpọ na, yọ o kẹ riẹ uye evaọ udu.*+  Fikiere Jihova ọ tẹ ta nọ: “Me ti hwere ahwo nọ mẹ ma no otọ na no, te ahwo te erao ẹwho, erao nọ i re si* evaọ otọ, te emama nọ e rẹ rra evaọ obọ ehru,* keme o da omẹ nọ mẹ ma rai.”  Rekọ Noa ọ jọ emamọ ohwo evaọ aro Jihova.  Onana họ ikuigbe Noa. Noa ọ jọ ọzae okiẹrẹe.+ Ọ jọ ohwo nọ ọ kare oruthọ* evaọ udevie ahwo oke riẹ. Noa o lele Ọghẹnẹ uzẹme na nya.+ 10  Nọ oke o be nyaharo na, Noa o te yẹ emezae esa, Shẹm, Ham, gbe Jafẹt.+ 11  Rekọ otọakpọ na o raha no evaọ aro Ọghẹnẹ uzẹme na, yọ ozighi ọ vọ otọakpọ na. 12  Ẹhẹ, Ọghẹnẹ o rri otọakpọ na, ọ tẹ ruẹ nọ o raha no;+ ahwo kpobi nọ a rrọ otọakpọ na a raha no.+ 13  Kẹsena Ọghẹnẹ ọ tẹ ta kẹ Noa nọ: “Mẹ jiroro no inọ mẹ te raha ahwo kpobi no, keme ozighi ọ vọ otọakpọ na fiki rai, fikiere mẹ be raha ae kugbe otọakpọ na.+ 14  Rehọ emamọ ure* ku okọ* kẹ omara.+ Who re ku ibriwou fihọ okọ na jẹ rehọ ikota ralọ iẹe,+ te obeva te otafe. 15  Enẹ who ti ku ei: Okọ na u re theri te ikiubiti* egba esa (300), o rẹ kẹre te ikiubiti udhuvẹ-gbikpe, yọ u re kpehru te ikiubiti ọgba. 16  Who re ru unwido fihọ okọ na nọ elo ọ rẹ rọ ruọ eva riẹ,* no umuo ikiubiti ọvo no obehru ze. Who re ru unuẹthẹ okọ na fihọ ofẹ uthethei riẹ,+ yọ okọ na u re wo edhe ọsosuọ, edhe avọ ivẹ, gbe edhe avọ esa. 17  “Rọkẹ omẹ, mẹ be te rehọ owhe ku+ otọakpọ na nọ mẹ te rọ raha omama kpobi nọ u wo ẹwẹ uzuazọ* no otọ idhiwu na. Oware kpobi nọ o rrọ otọakpọ na u ti whu.+ 18  Yọ mẹ be re ọvọ kugbe owhẹ, whọ rẹ ruọ eva okọ na, whẹ, emezae ra, aye ra, gbe eyae emezae ra.+ 19  Who re su koghẹrẹ koghẹrẹ omama kpobi nọ o rrọ uzuazọ ivivẹ ruọ eva okọ na+ re e ruẹse zọ, te ọrọ ọzae te ọrọ aye;+ 20  emama nọ e rẹ rra ọvuọ oghoghẹrẹ rai, erao ẹwho ọvuọ oghoghẹrẹ rai, erao nọ i re si evaọ otọ kpobi ọvuọ oghoghẹrẹ rai, ivivẹ evaọ oghẹrẹ ọvuọvo e te nyabru owhẹ ziọ eva okọ na re e ruẹse zọ.+ 21  Rọkẹ owhẹ, who re koko oghoghẹrẹ emu kpobi họ nọ whọ rẹ rehọ lele oma ruọ okọ na+ nọ whẹ avọ erao na a te re.” 22  Noa o te ru eware kpobi nọ Ọghẹnẹ ọ ta kẹe. Nwanọ ere o ru.+

Eme-Obotọ

Evaọ Hibru, “emezae.”
Oghẹrẹ ofa nọ a rẹ jọ ẹvẹrẹ Hibru se ikọ-odhiwu.
Evaọ Hibru, “Ẹzi mẹ o.”
Hayo o sae jọ nọ, “keme o bi ru lele isiuru uwo riẹ.”
O sae jọ nọ otofa riẹ họ “Emare-ahwo,” koyehọ enọ e rẹ rehọ ahwo fotọ. Rri oria Otofa Eme.
Hayo “yọ o dha riẹ eva.”
Onana u kugbe enọ e rẹ katiẹ.
Hayo “idhiwu.”
Hayo “kare afuẹwẹ.”
Evaọ Hibru, “ire gofa.”
Evaọ Hibru, “ẹkpẹti”; okọ ulogbo.
Ikiubiti o theri te 44.5 cm (17.5 in.). Rri Ẹme-Ofiba B14.
Ẹme Hibru na họ tsoʹhar. A re je rri tsoʹhar na nọ u dhesẹ obehru okọ na nọ a tehe jẹlẹ nọ o rehọ ikiubiti ọvo kpefihọ, orọnikọ oria nọ elo ọ rẹ rọ ruọ eva hayo unwido ho.
Hayo “ẹzi uzuazọ.”