Emuhọ 17:1-27

  • Abraham o ti zihe ruọ ọsẹ erẹwho buobu (1-8)

    • A nwene odẹ Abram kpohọ Abraham (5)

  • Ọvọ oyawo na (9-14)

  • A nwene odẹ Serai kpohọ Sera (15-17)

  • A ya eyaa ọmọ nọ a ti se Aiziki (18-27)

17  Nọ Abram ọ jọ ikpe udhone gbe ikpegbizii, Jihova ọ tẹ romavia kẹ Abram ọ tẹ ta kẹe nọ: “Mẹ họ Ọghẹnẹ Erumeru na. Nya evaọ edhere mẹ jẹ daoma kare oruthọ.*  Me ti ru ọvọ mẹ nọ ọ rrọ udevie mẹ avọ owhẹ dikihẹ,+ me ti ru owhẹ bu gaga.”+  Kẹsena Abram o te kie vovao tuotọ, Ọghẹnẹ o te gbe je lele iei ta ẹme, be ta kẹe nọ:  “Rọkẹ omẹ, rri! mẹ re ọvọ mẹ kugbe owhẹ,+ who ti zihe ruọ ọsẹ erẹwho buobu hrọ.+  Odẹ ra o te gbẹ jọ Abram* hu; odẹ ra o te jọ Abraham,* keme me ti ru owhẹ họ ọsẹ erẹwho buobu.  Me ti ru owhẹ bu gaga je ru owhẹ zihe ruọ erẹwho, yọ ivie i ti no oma ra ze.+  “Yọ me ti koko ọvọ mẹ nọ ọ rrọ udevie mẹ avọ owhẹ+ gbe emọ* ra nọ i ti lele owhẹ evaọ ige rai kpobi re o jọ ọvọ ebẹdẹ bẹdẹ, re mẹ jọ Ọghẹnẹ kẹ owhẹ gbe ọmọ* ra nọ o ti lele owhẹ.  Yọ mẹ te rehọ ẹkwotọ nọ whọ rria wọhọ ọrara na+ kẹ owhẹ avọ emọ* ra nọ i ti lele owhẹ, ẹkwotọ Kenan soso re o jọ ọrai bẹdẹ bẹdẹ, yọ mẹ te jọ Ọghẹnẹ rai.”+  Ọghẹnẹ ọ tẹ gbẹ ta kẹ Abraham nọ: “Rọkẹ owhẹ, who re koko ọvọ mẹ, whẹ avọ emọ* ra nọ i ti lele owhẹ evaọ ige rai kpobi. 10  Onana họ ọvọ mẹ nọ ọ rrọ udevie mẹ avọ owhẹ, nọ whẹ avọ emọ* ra nọ i ti lele owhẹ a re koko: Ọmọzae kpobi nọ ọ rrọ udevie rai ọ rẹ yawo hrọ.+ 11  Wha rẹ yawo* hrọ, yọ oye o te jọ oka ọvọ nọ ọ rrọ udevie mẹ avọ owhai.+ 12  Evaọ ige rai kpobi, ọmọzae kpobi nọ ọ rrọ udevie rai nọ ọ gba edẹ eree no ọ rẹ yawo hrọ,+ ohwo kpobi nọ a yẹ evaọ uwou na gbe ọnọ ọ rrọ ọmọ* ra ha nọ a rehọ ugho dẹ mi ọrara. 13  Ọzae kpobi nọ a yẹ evaọ uwou ra gbe ọzae kpobi nọ a rehọ ugho ra dẹ ọ rẹ yawo hrọ,+ yọ ọvọ mẹ nọ ọ rrọ uwo rai ọ rẹ jọ ọvọ nọ ọ rẹ jọ ribri hrọ. 14  Otẹrọnọ ọzae jọ nọ ọ re yawo ho ọ rọwo nọ ọ rẹ yawo* ho, a re kpe ohwo* yena no udevie ahwo riẹ hrọ. Ọ raha ọvọ mẹ.” 15  Kẹsena Ọghẹnẹ ọ tẹ ta kẹ Abraham nọ: “Rọkẹ aye ra Serai,*+ who re gbe sei Serai ofa ha, keme Sera* o te jọ odẹ riẹ. 16  Mẹ te ghale iẹe jẹ rehọ ẹkwoma riẹ kẹ owhẹ ọmọzae;+ mẹ te ghale iẹe o ve ti zihe ruọ erẹwho; ivie ahwo i ti no oma riẹ ze.” 17  Abraham o te kie vovao tuotọ o te muhọ ẹhwẹ jẹ be jọ udu riẹ ta nọ:+ “Kọ ọzae nọ ọ kpako te ikpe udhusoi (100) no ọ sai gbe yẹ ọmọ, kọ Sera, aye nọ ọ kpako te ikpe udhone-gbikpe no, ọ sai gbe yẹ ọmọ?”+ 18  Fikiere Abraham ọ tẹ ta kẹ Ọghẹnẹ uzẹme na nọ: “O dodokọ whọ rẹ rehọ Ishmẹl!”+ 19  Ọghẹnẹ ọ tẹ kpahe fihọ onana nọ: “Aye ra Sera o ti yẹ ọmọzae kẹ owhẹ hrọ, yọ odẹ nọ who re mu kẹe họ Aiziki.*+ Yọ mẹ te re ọvọ mẹ kugbei re o jọ ọvọ ebẹdẹ bẹdẹ rọkẹ emọ* riẹ nọ i ti lele iei nọ u te noi no.+ 20  Rekọ kpahe Ishmẹl, me yo ẹme ra na. Rri! Mẹ te ghale iẹe je ru ei vihọ je ru ei bu gaga. O ti yẹ isu ikpegbivẹ, yọ me ti ru ei zihe ruọ orẹwho ulogbo.+ 21  Rekọ, mẹ te re ọvọ mẹ kugbe Aiziki,+ ọnọ Sera o ti yẹ kẹ owhẹ evaọ oke utiona ukpe notha na.”+ 22  Nọ Ọghẹnẹ o lele iei ta ẹme re no, ọ tẹ nyavrẹ siọ Abraham ba. 23  Kẹsena Abraham ọ tẹ rehọ Ishmẹl ọmọzae riẹ gbe ezae kpobi nọ a yẹ evaọ uwou riẹ gbe ohwo kpobi nọ ọ rehọ ugho riẹ dẹ, ọzae kpobi nọ ọ rrọ uwou Abraham, ọ tẹ yawo ae* ẹdẹdẹ yena, nwane wọhọ epanọ Ọghẹnẹ ọ ta kẹe.+ 24  Abraham ọ jọ ikpe udhone gbe ikpegbizii nọ ọ yawo.*+ 25  Yọ Ishmẹl ọmọzae riẹ ọ jọ ikpe ikpegbesa nọ a yawo iẹe.*+ 26  Evaọ ẹdẹdẹ yena Abraham ọ rọ yawo, ere Ishmẹl ọmọzae riẹ re. 27  Ezae kpobi nọ e rrọ uwou riẹ, ohwo kpobi nọ a yẹ evaọ uwou riẹ gbe ohwo kpobi nọ a rehọ ugho dẹ mi ọrara, a lele i rie yawo re.

Eme-Obotọ

Hayo “kare afuẹwẹ.”
Otofa riẹ họ “Ọsẹ O Kpehru (A Kpare Ọsẹ Kpehru).”
Otofa riẹ họ “Ọsẹ Ogbotu (Ugbidigbi); Ọsẹ Ahwo Buobu.”
Evaọ Hibru, “ubi.”
Evaọ Hibru, “ubi.”
Evaọ Hibru, “ubi.”
Evaọ Hibru, “ubi.”
Evaọ Hibru, “ubi.”
Hayo “Wha re bru uwoliwo rai no.”
Evaọ Hibru, “ubi.”
Hayo “a re bru uwoliwo riẹ no.”
Evaọ Hibru, “nifẹsh.” Rri oria Otofa Eme.
O sae jọ nọ otofa riẹ họ “Ikẹ-Isio.”
Otofa riẹ họ “Ọmọtẹ-Ovie.”
Otofa riẹ họ “Ehwẹ.”
Evaọ Hibru, “ubi.”
Hayo “o te bru uwoliwo rai no.”
Hayo “nọ o bru uwoliwo riẹ no.” Uwoliwo yọ ohọrọ nọ a re bru no oma ọmọzae nọ a tẹ be yawo iẹe.
Hayo “nọ a bru uwoliwo riẹ no.”