Orọ Avọ Ivẹ Ro Se Ahwo Kọrint 6:1-18

  • A rẹ rọ uwowou Ọghẹnẹ ru ugberuo ho (1, 2)

  • A dhesẹ iruo odibọgba Pọl (3-13)

  • Wha mu usu kugbe enọ e rọwo ho ho (14-18)

6  Nọ ma bi lele iei ru iruo na,+ ma be tuduhọ owhai awọ re inọ, nọ wha jẹ uwowou ulogbo Ọghẹnẹ rehọ no na, wha ru re ẹjiroro riẹ o jọ uvrẹvru hu.+  Keme ọ ta nọ: “Evaọ oke ọjẹrehọ, me yo kẹ owhẹ, yọ evaọ ẹdẹ esiwo, me fiobọhọ kẹ owhẹ.”+ Rri, enẹna họ ugogo oke ọjẹrehọ na. Rri, enẹna họ ẹdẹ esiwo.  Ma bi ru oware ovo nọ o rẹ wha ezoruẹ ze he, re a gbẹ jọ odibọgba mai ruẹ oware afuẹwẹ hẹ;+  rekọ evaọ edhere kpobi, ma bi dhesẹ nọ mai yọ egbodibo Ọghẹnẹ,+ ẹkwoma ithihakọ evaọ eware buobu, ikpokpoma, oke uye, uyero obẹbẹ,+  ukpe, efihọ uwou-odi,+ ozighi, iruo egaga, ababọ owezẹ evaọ aso, gbe ababọ emu unuẹse buobu;+  ẹkwoma uzuazọ ẹfuọ, eriariẹ, odiri,+ uwowou,+ ẹzi ọfuafo, uyoyou nọ o kare eviẹhọ,+  ẹta eme uzẹme, ogaga Ọghẹnẹ,+ ekwakwa ẹmo ẹrẹreokie+ nọ ma kru họ obọze* gbe ẹkpẹlobọ.*  Ma bi je dhesẹ nọ mai yọ egbodibo Ọghẹnẹ nọ a te bi jiri omai je kpomovuọ họ omai oma, a tẹ be ta eme iyoma gbe eme iwoma kpahe omai. A bi rri omai nọ mai yọ eviẹahwohọ rekọ ma be ta uzẹme,  a bi rri omai nọ ohwo ọvo ọ riẹ omai hi, rekọ a riẹ omai, a bi rri omai nọ ma bi whu* rekọ ma rrọ uzuazọ,+ a bi rri omai nọ a be kẹ omai uye,* rekọ ma whu hu,+ 10  a bi rri omai wọhọ enọ i bi weri rekọ ma be ghọghọ ẹsikpobi, wọhọ iyogbe rekọ ma bi ru ibuobu fe, wọhọ enọ i wo oware ovo ho rekọ ma wo eware kpobi.+ 11  Ma rovie unu mai ta ẹme kẹ owhai ziezi,* whai ahwo Kọrint, yọ ma rovie udu mai fihọ gbaladha. 12  Oware ovo o za omai dhe he* evaọ uyoyou nọ ma bi dhesẹ kẹ owhai,+ rekọ eware jọ e be za owhai dhe evaọ uyoyou nọ wha bi dhesẹ kẹ omai. 13  Fikiere, mẹ be ta kẹ owhai wọhọ emọ mẹ inọ, whai omarai, wha rovie udu rai fihọ gbaladha re.*+ 14  Wha mu usu kugbe* enọ e rọwo ho ho.+ Didi usu ẹrẹreokie o wo kugbe emuemu?+ Hayo didi usu elo o wo kugbe ebi?+ 15  Ofariẹ, didi okugbe ọ rrọ udevie Kristi avọ Belial?*+ Hayo kọ eme ohwo nọ ọ rọwo* avọ ọnọ ọ rọwo ho a wo kugbe?*+ 16  Kọ didi okugbe ọ rrọ udevie etẹmpol Ọghẹnẹ avọ emedhọ?+ Keme mai yọ etẹmpol Ọghẹnẹ nọ ọ rrọ uzuazọ;+ wọhọ epanọ Ọghẹnẹ ọ ta nọ: “Mẹ te rria udevie rai+ jẹ nya evaọ udevie rai, mẹ te jọ Ọghẹnẹ rai, a vẹ te jọ ahwo mẹ.”+ 17  “‘Fikiere, wha no udevie rai no, jẹ hẹriẹ oma no ai,’ ere Jihova* ọ ta, ‘yọ wha gbẹ rọ obọ te oware ugbegbe na ha’”;+ “‘me ve ti dede owhai rehọ.’”+ 18  “‘Mẹ vẹ te jọ ọsẹ rai,+ wha vẹ te jọ emezae gbe emetẹ mẹ,’+ ere Jihova* Erumeru na ọ ta.”

Eme-Obotọ

Ẹsejọhọ onọ ohwo ọ rẹ rọ họre.
Ẹsejọhọ onọ ohwo ọ rẹ rọ thọ omariẹ.
Hayo “rri omai nọ ma fo uwhu.”
Hayo “whọku omai.”
Hayo “Ma ta ẹme kẹ owhai ziezi.”
Hayo “u keke omai ba ha.”
Hayo “wha rovie udu rai kpobi ro dhesẹ uyoyou re.”
Evaọ Griki, “Wha fi omarai họ otọ owhowha nọ o rrọ ẹrẹrẹe he kugbe.”
Onana u no ẹme Hibru ze, onọ otofa riẹ o rrọ “Ọnọ O Fioka Ha.” A rẹ rehọ iẹe ta ẹme kpahe Setan.
Hayo “ohwo nọ o wo ẹrọwọ.”
Hayo “a te ghale?”