Obe Jọn Ọsosuọ 4:1-21

  • Dawo eme nọ a ta nọ i no obọ Ọghẹnẹ ze (1-6)

  • Ẹriẹ gbe eyou Ọghẹnẹ (7-21)

    • “Ọghẹnẹ họ uyoyou” (8, 16)

    • Uyoyou o rẹ dhozọ họ (18)

4  Iyoyou, wha du rọwo ẹme kpobi nọ a ta nọ o no obọ Ọghẹnẹ ze he,*+ rekọ wha dawo eme nọ a ta nọ i no obọ Ọghẹnẹ ze na*+ re wha ruẹ sọ obọ Ọghẹnẹ i no ze, keme eruẹaro erue buobu e ruọ eva akpọ na no.+  Enẹ wha rẹ rọ riẹ ẹme nọ o no obọ Ọghẹnẹ ze: Ẹme kpobi nọ a jọ rọwo nọ Jesu Kristi ọ rọ oma ohwo-akpọ nyaze, o no obọ Ọghẹnẹ ze.+  Rekọ ẹme kpobi nọ a jọ rọwo Jesu hu o no obọ Ọghẹnẹ ze he.+ Ofariẹ, onana họ ẹme ọnọ ọ rọsuọ Kristi na nọ wha yo inọ ọ te ze na,+ yọ ọ rrọ akpọ na no enẹna.+  Obọ Ọghẹnẹ wha no ze, emọ esese, yọ wha fi rai kparobọ no+ keme ọnọ wha gbẹ rrọ usu+ ọ rro vi ọnọ akpọ na ọ rrọ usu kugbe.+  Obọ akpọ na a no ze;+ oyejabọ nọ a be rọ ta eware nọ i no akpọ na ze yọ akpọ na ọ be gaviezọ kẹ ae.+  Obọ Ọghẹnẹ ma no ze. Ohwo kpobi nọ ọ riẹ Ọghẹnẹ ọ rẹ gaviezọ kẹ omai;+ ohwo kpobi nọ o no obọ Ọghẹnẹ ze he ọ rẹ gaviezọ kẹ omai hi.+ Ẹkwoma onana ma re ro vuhu ẹme uzẹme nọ o no obọ Ọghẹnẹ ze gbe ẹme ọrue nọ a ta nọ o no obọ Ọghẹnẹ ze.+  Iyoyou, wha joma you ohwohwo ẹsikpobi,+ keme obọ Ọghẹnẹ uyoyou u no ze, yọ ohwo kpobi nọ o wo uyoyou yọ ọmọ Ọghẹnẹ ọ tẹ jẹ riẹ Ọghẹnẹ.+  Ohwo kpobi nọ o wo uyoyou hu ọ re riẹ Ọghẹnẹ hẹ, keme Ọghẹnẹ họ uyoyou.+  Ẹkwoma onana Ọghẹnẹ o ro dhesẹ uyoyou riẹ kẹ omai, inọ Ọghẹnẹ o vi Ọmọ ọvo riẹ+ ziọ akpọ na re ma ruẹsi wo uzuazọ ẹkwoma riẹ.+ 10  Enẹ o ro dhesẹ uyoyou na, orọnọ fikinọ ma you Ọghẹnẹ hẹ, rekọ ọye o you omai o te vi Ọmọ riẹ ze wọhọ idhe ẹruẹrẹhọ*+ rọkẹ izieraha mai.+ 11  Iyoyou, otẹrọnọ enẹ Ọghẹnẹ o you omai te, kiyọ o gba omai họ nọ ma re you ohwohwo re.+ 12  Ohwo ọvo ọ re ruẹ Ọghẹnẹ oke ovo ho.+ Ma te bi you ohwohwo ẹsikpobi, Ọghẹnẹ ọ rẹ jọ kugbe omai, yọ ma ti dhesẹ uyoyou riẹ vọvọ.+ 13  Ẹkwoma onana ma rọ riẹ nọ ma rrọ usu kugbei yọ ọ rrọ usu kugbe omai, keme ọ kẹ omai ẹzi riẹ no. 14  U te no ere no, mai omamai ma rehọ ibiaro mai ruẹ je bi se isẹri inọ Ọsẹ na o vi Ọmọ riẹ ze re ọ jọ osiwi akpọ na.+ 15  Ohwo kpobi nọ ọ rọwo nọ Jesu Kristi yọ Ọmọ Ọghẹnẹ,+ Ọghẹnẹ ọ rrọ usu kugbe ohwo otiọye yọ ọyomariẹ ọ rrọ usu kugbe Ọghẹnẹ.+ 16  Ma riẹ jẹ rọwo nọ Ọghẹnẹ o you omai.+ Ọghẹnẹ họ uyoyou,+ yọ ohwo nọ o wo uyoyou ẹsikpobi ọ rrọ usu kugbe Ọghẹnẹ yọ Ọghẹnẹ ọ rrọ usu kugbei.+ 17  Enẹ uyoyou mai o rọ gbunu, re ma sae ta ẹme ududu*+ evaọ ẹdẹ ẹdhoguo, keme wọhọ epanọ ọyena ọ rrọ, ere ma rrọ re evaọ akpọ nana. 18  Uyoyou o rẹ dhozọ họ,+ uvi uyoyou u re si* ozọ no, keme ozọ o rẹ za ohwo dhe. Ẹhẹ, ohwo nọ ọ rẹ dhozọ ọ rẹ sai dhesẹ uyoyou vọvọ họ.+ 19  Ma wo uyoyou keme ọye ọ kaki you omai.+ 20  Ohwo jọ ọ tẹ be ta nọ, “Me you Ọghẹnẹ,” rekọ o bi mukpahe oniọvo riẹ, ọtọrue ọ rrọ.+ Keme ohwo nọ o you oniọvo riẹ hẹ,+ ọnọ ọ be ruẹ, ọ rẹ sai you Ọghẹnẹ hẹ, ọnọ ọ re ruẹ hẹ.+ 21  Yọ ọ kẹ omai ujaje nana, inọ ohwo kpobi nọ o you Ọghẹnẹ o re je you oniọvo riẹ hrọ.+

Eme-Obotọ

Evaọ Griki, “rọwo ẹzi kpobi hi.”
Evaọ Griki, “dawo izi na.”
Hayo “idhe omavoro; ọnọ a ro kie ofu.”
Hayo “re ma wo udu.”
Hayo “le.”