Obe Jọn Ọsosuọ 3:1-24
3 Rri epanọ uyoyou nọ Ọsẹ na o dhesẹ kẹ omai o rro te,+ nọ a bi ro se omai emọ Ọghẹnẹ!+ Yọ emọ riẹ ma ginẹ rrọ. Oyejabọ akpọ na ọ gbẹ rọ riẹ omai hi na+ keme ọ riẹ Ọghẹnẹ hẹ.+
2 Iyoyou, emọ Ọghẹnẹ+ ma rrọ enẹna, rekọ a ri dhesẹ oghẹrẹ nọ ma te jọ evaọ obaro via no ho.+ Ma riẹ nọ okenọ a ti dhesẹ iẹe via, ma te jọ wọhọ ọyomariẹ, keme ma te ruẹ e riẹ epanọ ọ ginẹ rrọ.
3 Yọ ohwo kpobi nọ o wo ẹruore nana o re ru oma riẹ fo,+ wọhọ epanọ ọyena ọ rrọ fuafo na.
4 Ohwo kpobi nọ ọ be ruabọhọ uzioraha yọ ọ be ruabọhọ umuomu, keme uzioraha yọ umuomu.*
5 Wha tẹ jẹ riẹ nọ a dhesẹ i rie via re ọ rehọ izieraha mai vrẹ,+ yọ uzioraha o rrọ oma riẹ hẹ.
6 Ohwo kpobi nọ ọ gbẹ daji usu riẹ kugbei ọ rẹ ruabọhọ uzioraha ha;+ ohwo nọ ọ be ruabọhọ uzioraha, ohwo yena ọ re ruẹ e riẹ hẹ yọ ọ riẹ riẹ hẹ.
7 Emọ esese, wha jọ ohwo ọvo o su owhai thọ họ; ohwo nọ ọ ruabọhọ ẹrẹreokie yọ ohwo okiẹrẹe, nwane wọhọ epanọ ọyena o kiẹrẹe na.
8 Ohwo nọ ọ be ruabọhọ uzioraha obọ Ẹdhọ o no ze, keme anwọ emuhọ ze* Ẹdhọ ọ be rọ raha uzi.+ Fiki ẹjiroro nana a ro dhesẹ Ọmọ Ọghẹnẹ via, re ọ raha iruo Ẹdhọ.*+
9 Ohwo kpobi nọ o zihe ruọ ọmọ Ọghẹnẹ no ọ rẹ ruabọhọ uzioraha ha,+ keme ubi* Riẹ o rrọ evaọ ohwo otiọye, yọ ọ rẹ sae ruabọhọ uzioraha ha keme o zihe ruọ ọmọ Ọghẹnẹ no.+
10 Onana a re ro vuhu emọ Ọghẹnẹ avọ emọ Ẹdhọ: Ohwo kpobi nọ o bi ru oware nọ u kiẹrẹe he o no obọ Ọghẹnẹ ze he, yọ ohwo nọ o you oniọvo riẹ hẹ o no obọ Ọghẹnẹ ze gbe he.+
11 Keme ovuẹ nọ wha yo no emuhọ ze ona, inọ ma re you ohwohwo;+
12 orọnikọ ma rẹ jọ wọhọ Keni hi, ọnọ o no obọ omuomu na ze nọ o kpe oniọvo-ọmọzae riẹ.+ Kọ fikieme o ro kpei? Fikinọ iruo riẹ e jọ muomu,+ rekọ erọ oniọvo riẹ i kiẹrẹe.+
13 Inievo, jọ u gbe owhai unu hu inọ akpọ na o mukpahe owhai.+
14 Ma riẹ nọ ma no uwhu ziọ uzuazọ no+ keme ma you inievo na.+ Ohwo nọ o wo uyoyou hu ọ gbẹ rrọ evaọ uwhu.+
15 Ohwo kpobi nọ o bi mukpahe oniọvo riẹ yọ ojihẹ,*+ yọ wha riẹ nọ ojihẹ ọvuọvo o re wo uzuazọ ebẹdẹ bẹdẹ hẹ.+
16 Ẹkwoma onana ma rọ riẹ oware nọ uyoyou o rrọ, keme ọyena o siobọno uzuazọ* riẹ fiki mai,+ fikiere o gba omai họ nọ ma re siobọno uzuazọ* mai fiki inievo mai.+
17 Rekọ nọ ohwo jọ o te wo eyero akpọ nana, ọ jẹ ruẹ oniọvo riẹ nọ akpọ ọ be bẹ rekọ ọ rọwo dhesẹ ọdawẹ kẹe he, ẹvẹ ma sae rọ ta nọ o you Ọghẹnẹ?+
18 Emọ esese, uyoyou mai o rẹ jọ orọ ẹmeunu+ hayo igbenu hu,* rekọ ma rẹ rọ iruo dhesẹ iẹe via,+ yọ u re no omai eva ze.*+
19 Ẹkwoma onana ma te rọ riẹ nọ ma rrọ abọ uzẹme na, yọ ma ti ru udu mai wo imuẹro* evaọ aro riẹ
20 kpahe oware kpobi nọ udu mai o be jọ brukpe omai, keme Ọghẹnẹ ọ rro vi udu mai jẹ riẹ eware kpobi.+
21 Iyoyou, otẹrọnọ udu mai u bi brukpe omai hi, kiyọ ma rẹ sae ta ẹme ududu se Ọghẹnẹ;+
22 yọ oware kpobi nọ ma yare riẹ ọ rẹ kẹ omai,+ keme ma bi koko ijaje riẹ je bi ru oware nọ u kiehọ evaọ aro riẹ.
23 Ẹhẹ, onana họ ujaje riẹ: inọ ma fi ẹrọwọ họ odẹ Ọmọ riẹ Jesu Kristi+ je you ohwohwo,+ wọhọ epanọ o jie uzi kẹ omai.
24 Ofariẹ, ohwo nọ o bi koko ijaje riẹ ọ rrọ usu kugbei, yọ ọyomariẹ ọ rrọ usu kugbe ohwo otiọye.+ Ma riẹ nọ ọ rrọ usu kugbe omai fiki ẹzi riẹ nọ ọ kẹ omai.+
Eme-Obotọ
^ Hayo “seuziba-ekoko.”
^ Hayo “no okenọ o ro muhọ ze.”
^ Hayo “re o kporo iruo Ẹdhọ kuotọ.”
^ Koyehọ, ubi nọ o rẹ sae mọ ibi.
^ Hayo “okpahwo.”
^ Hayo “orọ iruo gbe uzẹme.”
^ Hayo “ẹrọo ọvo ho.”
^ Hayo “yọ ma te tẹzẹ udu mai rọwo.”
