Obe Jọn Ọsosuọ 2:1-29
2 Emọ esese mẹ, me bi kere eware nana se owhai re wha gbẹ raha uzi hi. Rekọ otẹrọnọ ohwo jọ ọ raha uzi, ma wo ofiobọhọ* nọ ọ rrọ kugbe Ọsẹ na, Jesu Kristi,+ nọ ọ rrọ ohwo okiẹrẹe.+
2 Ọye họ idhe ẹruẹrẹhọ*+ rọkẹ izieraha mai,+ yọ orọnọ rọkẹ izieraha mai ọvo ho rekọ rọkẹ erọ akpọ na soso.+
3 Yọ onana ma re ro vuhumu nọ ma riẹ riẹ, koyehọ, nọ ma tẹ ruabọhọ bi koko ijaje riẹ.
4 Ohwo nọ ọ be ta nọ, “Mẹ riẹ riẹ,” rekọ o bi koko ijaje riẹ hẹ yọ ọtọrue, yọ uzẹme na o rrọ eva ohwo nana ha.
5 Rekọ ohwo kpobi nọ o bi ru lele ẹme riẹ, o bi dhesẹ nọ o gine you Ọghẹnẹ.*+ Ẹkwoma onana ma rẹ rọ riẹ nọ ma rrọ usu kugbei.+
6 Ohwo nọ ọ be ta nọ ọ rrọ usu kugbei, o gba riẹ họ nọ ọ rẹ ruabọhọ nya wọhọ epanọ ọyena ọ nya.+
7 Iyoyou, orọnikọ ujaje okpokpọ me bi kere se owhai hi, rekọ ujaje anwae nọ wha wo no emuhọ ze.+ Ujaje anwae nana yọ ẹme nọ wha yo no.
8 Ghele na, me bi kere ujaje okpokpọ se owhai, onọ ọyomariẹ o ru lele, wha te je bi ru lele iei re, keme ebi na ọ be vrẹ no, yọ uvi elo na o muhọ elo no.+
9 Ohwo nọ ọ be ta nọ ọ rrọ elo na ghele na o bi mukpahe+ oniọvo riẹ ọ gbẹ rrọ ebi.+
10 Ohwo nọ o you oniọvo riẹ ọ rrọ elo na,+ yọ oware ovo nọ o rẹ wha ezoruẹ ze o rrọ oma riẹ hẹ.
11 Rekọ ohwo nọ o mukpahe oniọvo riẹ ọ rrọ ebi yọ ọ be nya evaọ ebi,+ ọ riẹ obonọ ọ be nya ha,+ keme ebi na o tu rie aro no.
12 Me bi kere se owhai, emọ esese, keme a rọ izieraha rai rọvrẹ owhai no fiki odẹ riẹ.+
13 Me bi kere se owhai, esẹ, keme wha riẹ ọnọ ọ rrọ no emuhọ ze na. Me bi kere se owhai, emoha na, keme wha fi omuomu na kparobọ no.+ Me bi kere se owhai, emaha, keme wha riẹ Ọsẹ na no.+
14 Me bi kere se owhai, esẹ, keme wha riẹ ọnọ ọ rrọ no emuhọ ze na. Me bi kere se owhai, emoha na, keme wha rrọ gaga+ yọ ẹme Ọghẹnẹ ọ rrọ eva rai,+ wha te je fi omuomu na kparobọ no.+
15 Wha you akpọ na hayo eware nọ e rrọ evaọ akpọ+ na ha. Ohwo jọ o te you akpọ na, yọ uyoyou Ọsẹ na o rrọ oma riẹ hẹ;+
16 keme oware kpobi nọ o rrọ evaọ akpọ na—isiuru uwo na+ gbe isiuru ibiaro na+ gbe oma-udhesẹ orọ eware nọ ohwo o wo*—u no obọ Ọsẹ na ze he, rekọ akpọ na u no ze.
17 Ofariẹ, akpọ na ọ be vrẹ yọ ere isiuru riẹ re,+ rekọ ohwo nọ o bi ru oreva Ọghẹnẹ ọ rẹ jọ bẹdẹ bẹdẹ.+
18 Emaha, auwa urere na ma rrọ na, yọ wọhọ epanọ wha yo no vẹre inọ ọnọ ọ rọsuọ Kristi na ọ be nyaze,+ makọ enẹna ibuobu enọ e rọsuọ Kristi a romavia no,+ onọ u ru omai riẹ nọ auwa urere na ma rrọ na.
19 A no udevie mai vrẹ keme a wọhọ omai hi;*+ keme o hae jọ nọ a wọhọ omai, a hae gbẹ jọ kugbe omai. Rekọ a nyase omai ba re o ruẹsi dhesẹ oma via nọ orọnọ ahwo kpobi a wọhọ omai hi.+
20 Ọnọ ọ rrọ ọrẹri na ọ rọ ẹzi wholo owhai,+ yọ whai kpobi wha wo eriariẹ.
21 Orọnọ fikinọ wha riẹ uzẹme na ha+ me bi ro kere se owhai hi, rekọ fikinọ wha riẹ uzẹme na, gbe fikinọ ọrue ọ rrọ evaọ uzẹme na vievie he.+
22 Ono họ ọtọrue na, kọ ogbẹrọnọ ọnọ ọ be vro nọ Jesu họ Kristi na ha?+ Ọnana họ ọnọ ọ rọsuọ Kristi na,+ ọnọ ọ be vro Ọsẹ na gbe Ọmọ na.
23 Ohwo kpobi nọ ọ be vro Ọmọ na, ọ rrọ usu kugbe* Ọsẹ na ha.+ Rekọ ohwo kpobi nọ ọ rọwo Ọmọ na+ ọ rrọ usu kugbe Ọsẹ na.+
24 Rọkẹ owhai, jọ oware nọ wha yo no emuhọ ze na o gbẹ jọ eva rai.+ Otẹrọnọ oware nọ wha yo no emuhọ ze na o gbẹ rrọ eva rai, wha te gbẹ jọ usu kugbe Ọmọ na jẹ gbẹ jọ usu kugbe Ọsẹ na.
25 Ofariẹ, onana họ oware nọ ọyomariẹ ọ ya eyaa riẹ kẹ omai, uzuazọ ebẹdẹ bẹdẹ.+
26 Me bi kere eware nana se owhai kpahe ahwo nọ a be gwọlọ su owhai thọ.
27 Rọkẹ owhai, ẹzi nọ o ro wholo owhai ọ rrọ owhai oma,+ yọ wha du gwọlọ ohwo jọ nọ o re wuhrẹ owhai hi; ẹzi nọ o ro wholo owhai na o bi wuhrẹ owhai eware kpobi,+ uzẹme o rrọ, o rẹ ta ọrue he. Fikiere wha gbẹ jọ usu kugbei, wọhọ epanọ ọ rọ ẹzi na wuhrẹ owhai no na.+
28 Fikiere, emọ esese, wha gbẹ jọ usu kugbei, re okenọ a ti dhesẹ iẹe via ma vẹ sae ta ẹme ududu,+ ma gbe sioma rehọ fiki omovuọ evaọ oke ọzino* riẹ hẹ.
29 Otẹrọnọ wha riẹ nọ o kiẹrẹe, kiyọ wha riẹ re inọ ohwo kpobi nọ o bi ru oware nọ u kiẹrẹe yọ ọmọ riẹ.+
Eme-Obotọ
^ Hayo “amiunugu.”
^ Hayo “idhe omavoro; ọnọ a ro kie ofu.”
^ Hayo “yọ uyoyou Ọghẹnẹ o gbunu evaọ oma ohwo nana.”
^ Hayo “ehaise kpahe eyero akpọ nọ ohwo o wo.”
^ Hayo “a rrọ emai hi.”
^ Hayo “o wo.”
