Orọ Ọsosuọ Ro Se Ahwo Kọrint 3:1-23

  • Inievo Kọrint a gbe wo eriwo ohwo-akpọ (1-4)

  • Ọghẹnẹ o re ru ei rro (5-9)

    • Ibe iruiruo Ọghẹnẹ (9)

  • Rehọ ekwakwa nọ e rẹ to ho bọ (10-15)

  • Whai yọ etẹmpol Ọghẹnẹ (16, 17)

  • Areghẹ akpọ na yọ ugheghẹ evaọ obọ Ọghẹnẹ (18-23)

3  Fikiere, inievo, mẹ jẹ sae ta ẹme kẹ owhai wọhọ ahwo nọ ẹzi Ọghẹnẹ ọ be kpọ+ họ, rekọ wọhọ enọ i wo eriwo ohwo-akpọ,* wọhọ emọboba+ evaọ Kristi.  Ame-ivie mẹ rọ kuọ owhai, orọnikọ emu ọgbẹgbẹdẹ hẹ, keme oke yena wha re kpako te he. Ẹhẹ, makọ enẹna dede wha re kpako te he,+  keme wha gbe wo eriwo ohwo-akpọ.+ Nọ orọnọ ihri-eriọ gbe ẹwhọ e rrọ udevie rai na, kọ ogbẹrọnọ enọ i wo eriwo ohwo-akpọ+ wha rrọ je bi ru wọhọ ahwo akpọ na?  Keme nọ ọjọ ọ tẹ be ta nọ, “Mẹ ọrọ Pọl,” rekọ ọfa nọ, “Mẹ ọrọ Apọlọs,”+ kọ ogbẹrọnọ eruo ahwo akpọ na wha bi ru na?  Kọ ono họ Apọlọs? Ẹhẹ, ono họ Pọl? Egbodibo+ nọ i fiobọhọ kẹ owhai kurẹriẹ,* nwane wọhọ epanọ Olori na ọ kẹ omomọvo uvẹ riẹ.  Ẹkọ mẹ kọ,+ Apọlọs o te ku ame ku,+ rekọ Ọghẹnẹ o te bi ru ei rro,  fikiere ọnọ ọ kọ hayo ọnọ o ku ame ku a rrọ oware ovo ho, rekọ Ọghẹnẹ nọ o bi ru ei rro.+  Whaọ te ọnọ ọ be kọ gbe ọnọ o bi ku ame ku yọ ọvo,* rekọ omomọvo o ti wo osohwa riẹ wọhọ epaọ iruo riẹ.+  Keme mai yọ ibe iruiruo Ọghẹnẹ. Whai yọ udhu Ọghẹnẹ nọ ọ be kọ jẹ rẹrote, uwou Ọghẹnẹ.+ 10  Fiki uwowou ulogbo nọ Ọghẹnẹ o dhesẹ kẹ omẹ, mẹ wọ otọhotọ họ+ wọhọ ọnọ o wuzou ebabọ nọ o wo onaa,* rekọ omọfa jọ ọ be bọ họ ehru riẹ. Rekọ jọ omomọvo o muẹrohọ epanọ ọ be bọ fihọ ehru riẹ. 11  Keme ohwo ọvo ọ sae wọ otọhotọ ofa họ vi onọ a wọ họ no na ha, koyehọ Jesu Kristi.+ 12  Whaọ otẹrọnọ ohwo jọ ọ rehọ igoru, isiliva, itho eghaghae, ire, ẹbe ọyaya, hayo ebiesa bọ fihọ otọhotọ na, 13  a ti dhesẹ iruo omomọvo via wọhọ epanọ e rrọ,* keme ẹdẹ ọ te tha nọ a ti* dhesẹ iẹe via, keme a te rọ erae dhesẹ iẹe via,+ erae na i ti dhesẹ oghẹrẹ nọ iruo omomọvo e rrọ via. 14  Otẹrọnọ oware nọ ohwo ọ bọ fihọ ehru riẹ u gbe dikihẹ, o ti wo osohwa; 15  otẹrọnọ oware nọ ohwo ọ bọ o to, eware riẹ i ti vru, rekọ a ti siwi ọyomariẹ; ghele na, o te wọhọ ẹsenọ ọ vabọ no erae ze. 16  Kọ wha gbẹ riẹ nọ whai omarai yọ etẹmpol Ọghẹnẹ+ gbe inọ ẹzi Ọghẹnẹ ọ rrọ kugbe owhai?+ 17  Ohwo jọ ọ tẹ be raha etẹmpol Ọghẹnẹ, Ọghẹnẹ ọ te raha iẹe; keme etẹmpol Ọghẹnẹ ọ rrọ ọrẹri, yọ whai họ etẹmpol yena.+ 18  Ajọ ohwo ọvo ọ viẹ omariẹ họ họ: Ohwo jọ evaọ usu rai o te bi roro nọ o wo areghẹ evaọ uyero-akpọ* nana, jọ o ru omariẹ họ ohwo ogheghẹ, re ọ sai wo areghẹ. 19  Keme areghẹ akpọ nana yọ ugheghẹ evaọ obọ Ọghẹnẹ, keme a kere nọ: “O re mu iwareghẹ na evaọ ẹghẹ rai.”+ 20  Ofariẹ: “Jihova* ọ riẹ nọ iroro iwareghẹ na yọ ifofe.”+ 21  Fikiere ajọ ohwo ọvo ọ rehọ ahwo seha ha; keme eware kpobi erai, 22  makọ Pọl hayo Apọlọs hayo Sifas*+ hayo akpọ na hayo uzuazọ hayo uwhu, hayo eware nọ e rrọ enẹna hayo eware nọ e te tha, eware na kpobi erai; 23  yọ whai yọ erọ Kristi;+ Kristi kọ ọrọ Ọghẹnẹ.

Eme-Obotọ

Hayo “uwo.”
Hayo “zihe ruọ enọ e rọwo.”
Hayo “a wo ẹjiroro ọvona.”
Hayo “ọnọ o wuzou iruo nọ o wo areghẹ.”
Evaọ Griki, “a ti dhesẹ iruo omomọvo via vevẹ.”
Hayo “ẹdẹ na o ti.”
Hayo “oge.” Rri oria Otofa Eme.
A re je sei Pita.